Շինարարական որակի թերություններ ու ժամկետների խախտումներ Գյումրիում իրականացված սուբվենցիոն ծրագրերում․ 2018-ից անավարտ է Մուշ թաղամասի հրապարակի շինարարությունը

2022-ին Գյումրիում նախատեսված է իրականացնել 14 մլրդ դրամի կապիտալ շինարարության պետական ծրագիր, որից 3,4 մլրդը բաժին է ընկնում սուբվենցիոն ծրագրերին։ Այս մասին հայտնել է Շիրակի մարզպետը Գյումրիի քաղաքապետարանում անցկացված աշխատանքային խորհրդակցությանը։ Մարզպետարանի և քաղաքապետարանի ոլորտային պատասխանատուների հետ քննարկվել են պետական բյուջեի միջոցներով իրականացված շինարարական աշխատանքների որակին, հայտնաբերված թերություններին ու ժամկետներում արձանագրվող ուշացումներին առնչվող հարցերը։

Թերացումներով կատարված շինարարություններից մեկը հին սուբվեցիոն ծրագիր է, և խոսքը Մուշ-2/2 թաղամասի հրապարակի կառուցմանն է վերաբերում։

2018 թվականից սկսված շինարարությունը, պարզվում է, դեռ անավարտ է, որի արժեքը մոտ 105 մլն դրամ է։ Աշխատանքների ավարտական ակտ չկա,  կատարվել են թերություններով։ 70-30 համաֆինանսավորմամբ թերի իրականացված շինարարության գումարը, որը կառավարությանն է, շինարարին չի հատկացվել, ի պահ է տրվել քաղաքապետարանին։ «Վահրադյանշին» ընկերությունն այս պահին գտնվում է դատական գործընթացներում։ 2022 թվականի հունիսի 9-ին կազմված նոր նախագծանախահաշվային փաստաթղթերի հիման վրա առաջիկայում նոր մրցույթ է հայտարարվելու, և չծախսված գումարը՝ մոտ 32 մլն դրամը կհատկացվի հրապարակի շինարարության ամբողջական ավարտի համար, ժամկետ նշվեց մինչև տարեվերջ։

«Երբ որ թաղամասի բնակիչների համար պետական ծրագիր է իրականացվում, և վերջնական արդյունքը 3 և ավելի տարի չի տեսնվում, դա արդեն իսկ խնդիր է։ Միգուցե շինարարի հետ է կապված, բայց այստեղ մենք պետք է հետևողականություն ցուցաբերենք, և այն անբարեխիղճ շինարարները, որոնք մասնակցում են մրցույթներին ու թերություններով են իրենց պարտավորությունները կատարում, նրանց  նկատմամբ պետք է գործուն մեխանիզմներ կիրառվեն, ընդհուպ մինչև «սև ցուցակ» մտցնել, որպեսզի հնարավորություն չունենան հետագայում պետական կամ համայնքային նշանակության մրցույթներին մասնակցել»,- նշել է Շիրակի մարզպետ Նազելի Բաղդասարյանը։

Չկարգավորված կամ ձգձգումներով ընթացող խնդիրներից դիտարկվել է նաև ինքնակամ շինությունների հարցը։ Մասնավորապես, հարցն առնչվել է Գյումրիի քաղաքային զբոսայգուն և Սայաթ-Նովա փողոցին հարող նոր կառուցված այգուն։ Խնդրի կարգավորումը համայնքապետարանի լիազորություններում է, քանի որ, ըստ մարզպետի, քաղաքային զբոսայգին չի կարող լինել ինչ-որ մեկի սեփականությունը։ Զբոսայգին համայնքի սեփականությունն է, և համայնքին պատկանող գույքը տնօրինելու իրավունքը հենց իրենն է։

«Օրենսդրական այն փոփոխությունները, որ հունվար ամսին կատարվեցին, ենթադրում է, որ ցանկացած տեսակի ինքնակամ շինություն, որն իրականացվում է  համայնքի տարածքում, ենթակա է ապամոնտաժման, և համայնքապետը պարտավոր է այդ տարածքը բերել  նախնական տեսքի»,- նշել  է Շիրակի մարզպետը։

«Գորկու այգում մենք արդեն մի քանի հատված ապամոնտաժել ենք, մնացած ապօրինի շինությունները ևս ընթացքի մեջ են, հուսով եմ՝ մենք կկարողանանք արագ դա կազմակերպել, որպեսզի Գորկու այգին դառնա մեր քաղաքացիների համար զբոսնելու շատ լավ վայր»,- նշել է Գյումրիի քաղաքապետը։