Գյումրիում անցկացվել է «Հայաստան» երգչախմբային մրցույթ-փառատոն

Գյումրիում անցկացվել է «Հայաստան» երգչախմբային մրցույթ-փառատոն, որին մասնակցել են Շիրակի մարզի արվեստի և երաժշտական դպրոցների երգչախմբերը։ Փառատոնը նախաձեռնել է Գյումրիի քաղաքապետարանի մշակույթի և երիտասարդության հարցերի բաժինը և բաց է Հանրապետության բոլոր երգչախմբերի համար։

Մեկ մրցութային փուլով, 8 երգչախումբ՝ 207 մասնակցով հայտ էին ներկայացրել Գյումրիի «Հայաստան» երգչախմբային մրցույթ-փառատոնին։ Երգչախմբային մրցույթների անցկացման փորձ մշակույթի ոլորտի ներկայացուցիչները Գյումրիում ունեն, միայն թե այս մեկը տարբերվում էր իր կանոններով։ Փառատոնը ոչ այնքան լավագույններին առանձնացնելու համար էր, որքան երգչախմբային արվեստը զարգացնելուն միտված նախաձեռնություն։

«Բավականին խիստ չափանիշներ են դրված, մասնագիտական մոտեցում է արված։ Շատ մեծ աշխատանք է տարված, և սա հենց այնպես՝ գալ, բեմ բարձրանալ երգելու փառատոն չէ»,- ասել է փառատոնի ղեկավար Լիլիթ Թովմասյանը։

Երգչախմբերը Շիրակի մարզի երաժշտական և արվեստի դպրոցներն էին ներկայացնում։ Մրցույթ-փառատոնի պահանջն էր՝ հանդես գալ 3-ական կատարումներով, որոնցից մեկն ակապելլա էր, իսկ ստեղծագործության ընտրության հարցում ազատ էին, միայն պարտադիր էր մեկը ու բոլոր երգչախմբերի համար, այն Հայաստանի մշակույթի վաստակավոր գործիչ կոմպոզիտոր Էդգար Գյանջումյանի «Պիտի ապրենք» երգն էր։

«Այս փառատոնի առաջին օրվանից, երբ սկսել ենք մտածել, հակված էինք ունենալ այն վստահությունը, որ այս երկու բառը որպես ուղերձ է հնչում ոչ միայն լսողի, այլև երգողի համար, և եթե այսօր 200 և ավելի երեխա անդադար ասում է՝ պիտի ապրենք, ուրեմն՝ այլ տարբերակ, քան ապրելը, մեզ չի մնում, իսկ դա այսօր մեզ շատ անհրաժեշտ է»,- նշել է Լիլիթ Թովմասյանը։

Երգի վերնագիրն այս փառատոնի խորագիրն էր նաև։ Երգչախմբերում, հատկապես պատանիների ընդգրկվածությունը կարևորելով, փառատոնի ժյուրիի անդամները շեշտել են, որ այն երաժշտական կրթություն սերմանելուց զատ, նաև անհատ ձևավորելու միջոց է։

«Շատ կարևոր է երաժշտական լսողության զարգացման համար, կարևոր է գեղարվեստական հմտությունների ձևավորման համար, որպեսզի նրանք հասկանան, որ ոչ թե ուղղակի աշակերտական նոտա պիտի երգեն, այլ պիտի ներկայացնեն արվեստ, որից պիտի գեղագիտական հաճույք վայելեն ունկնդիրները։ Սովորեցնում է լինել միասնական, լինել թիմ»,- նշել է փառատոնի ժյուրիի անդամ, ՀՀ մշակույթի վաստակավոր գործիչ, կոմպոզիտոր Էդգար Գյանջումյանը։

Ժյուրիի անդամ, միջազգային մրցույթների դափնեկիր, խմբավար Մարինե Ալավերդյանը երգչախմբային արվեստի դերն այսօր առավել կարևոր է համարում։

«Ժամանակներն են այդպիսին՝ մարդը մարդու կարիքն ունի, միմյանց հետ շփվելու, ոգևորվելու, ջերմանալու, և երգչախումբը լավագույն դրսևորումն է այդ իմաստով»,- նշել է նա։

Նախկին ավանդույթները, երբ հանրակրթական դպրոցները նույնպես ունեին երգչախմբեր, որոնք հանդես էին գալիս տարբեր բեմերում, հիմա չեն պահպանվում, դրանք ձևավորվում են հիմնականում երաժշտական դպրոցներում։ Երգչախմբային այս փառատոնն ամենամյա դառնալու հեռանկար ունի, կազմակերպիչներն ակնկալում են, որ այն կդառնա համահայկական և նախատեսում են հաջորդ տարվանից մրցույթ-փառատոնին ներգրավել երգչախմբերի Հանրապետության տարբեր մարզերից։