Հանրապետության վնասվածքաբան-օրթոպեդները Գյումրիում մասնակցել են մասնագիտական վերապատրաստումների

Հունիսի 11-14-ը Գյումրիում կազմակերպվել են կոտրվածքների ապարատային բուժման պրակտիկ դասընթացներ, որոնք անցկացրել են Ռուսաստանից հրավիրված նեղ բժիշկ-մասնագետները։ Մոսկովյան հիվանդանոցներից մեկի առաջատար օրթոպեդ-վնասվածքաբան Անդրեյ Վոլնան տեղի բժիշկներին ներկայացրել է կոտրված ոսկրերի համար Ելիզարովի ապարատի ճշգրիտ կիրառումը, որը թեև ունիվերսալ, բայց բարդ մեխանիզմ է, վնասվածքների ժամանակ թույլ է տալիս անշարժացնել ոսկորը՝ առանց ներսից իմպլանտ տեղադրելու, այլ դրսից՝ ապարատի միջոցով։

Այս ապարատի կիրառության խիստ անհրաժեշտությունը մասնագետները զգում են աղետների կամ պատերազմական իրավիճակներում, երբ անհրաժեշտ է ֆիքսել կոտրվածքը և տուժածին տեղափոխել հիվանդանոց։ Տեղի բժիշկներից շատերն այն առաջին անգամ կիրառել են 44-օրյա պատերազմում։

«Մենք շատ բժիշկներ ունենք, որոնք ֆանտաստիկ աշխատանքային փորձ ունեն տրավմատիկայի նեղ ուղղվածության մեջ, բայց փորձը ցույց է տվել, որ արտաքին ֆիքսացիայի ապարատ կիրառելու փորձի պակաս ունեին։ Ոչ մի անգամ արտաքին ֆիքսացիայի ապարատ չէին տեղադրել, բայց պատերազմի ժամանակ ստիպված են արել»,- ShantNews.am-ի հետ զրույցում նշել է օրթոպեդ-վնասվածքաբան Գարսևան Մալխասյանը։

Արտաքին անշարժացման ապարատի կիրառման և դետալային առանձնահատկություններին գործնական քառօրյա վերապատրաստումների ընթացքում ծանոթացել և փորձարկել են Հայաստանի տարբեր բուժհաստատությունների փորձառու և սկսնակ վնասվածքաբանները։

«Կոտրվածքների ժամանակավոր ֆիքսացիայի ապարատ է, որ շտապ դեպքերի ժամանակ կարողանանք ֆիքսել։ Արագ հավաքում ենք, տեղադրում ենք հիվանդին, որից հետո նոր մնացածը շարունակում»,- իր հավաքած արտաքին ֆիքսացիայի ապարատը ներկայացրել է վնասվածք-օրթոպեդ Լևոն Մկրտչյանը։

Ելնելով վնասվածքի տեսակից և աստիճանից, զուգահեռ ունեցած այլ հիվանդություններից, բուժման տևողությունը տարբեր է՝ սկսած 6 շաբաթից։ Ոսկրային վնասվածքները հիմնականում արտակարգ դեպքերով են պայմանավորված, հետևաբար թիվը մեծ է։ Վիճակագրական թվեր է ներկայացրել «Գյումրի» ԲԿ վնասվածքաբանության և օրթոպեդիայի բաժնի վարիչ Խաչատուր Կարապետյանը․

«Տարեկան մեր մարզում ստացիոնար պայմաններում վիրահատվում են 450-500 հիվանդ։ Դիմելիությունը 1000-ից ավելի է, միջամտությունն արվում է և ուղարկվում ամբուլատոր բուժման»։

Դասընթացը բազային, ստանդարտ առաջնային միջամտություն կատարելու գործնական հնարավորություն է հատկապես երիտասարդ բժիշկների համար։ Շատ կարճ ժամանակում տուժածին անշարժացնել և հիվանդանոց տեղափոխելու արագությունից ու արհեստավարժությունից է կախված նաև տուժածի հետագա բուժման արդյունքը։