Գյումրեցի վարպետները կառուցում են «Բարեկամության» այգու վերնիսաժային տաղավարները

«Բարեկամության» այգու տարածքում երկու ամիս է  ամբողջ ծավալով շինարարություն է ընթանում։ Այժմ արտաքին ինժեներական ենթակառուցվածքների, լուսավորության և հիմնական ճեմուղիների կառուցման աշխատանքներն են։

Այգու հանգստի գոտիներից մեկը նախատեսված է վերնիսաժային տաղավարների համար, որոնք կտրամադրվեն արվեստագետներին, այգու տարածքում կներկայացնեն արվեստն ու արհեստը, կանցկացվեն նաև վարպետության դասեր։

 «Ամեն տաղավարը մոտ 4,5 քմ է և այնպես է լինելու, որ հնարավոր լինի   ամբողջ տարին օգտագործել, կկազմակերպվեն տոնավաճառներ, որտեղ կցուցադրվեն գյումրեցի վարպետների աշխատանքները, պարբերաբար կկազմակերպվեն նաև վարպետաց դասեր երեխաների համար»,- նշում է  «Զբոսաշրջության և քաղաքաշինության» բարեգործական հիմնադրամի Գյումրիի զարգացման ծրագրի ղեկավար Ելենա Մուրադյանը։

Վերնիսաժային տաղավարների կառուցման դիզայնը մշակելիս օգտագործվել են հայկական ճարտարապետության տարրերն ու նախշազարդերը, որոնք նման կլինեն ազգային կարպետի մոտիվներին։

Տաղավարները կառուցում են գյումրեցի վարպետները, դրանք պատրաստում են այնպես, որ ունենան ձևափոխելու և տեղափոխելու հնարավորություն, կարող են ստանալ ալիքաձև կամ շրջանաձև դասավորվածություն։

Յուրահատկություններից մեկն էլ տաղավարների պատրաստման տեխնոլոգիան է։ Տեղումներից պաշտպանելու համար գյումրեցի վարպետները փայտից կոնստրուկցիաները հատուկ մշակման են ենթարկել։

«Մենք  փայտը մշակել ենք հատուկ պենոտեքս անվանումով նյութով, որն իր մեջ պարունակում է մեղրամոմ, ուլտրամանուշակագույն ճառագայթների և անձրևների դեպքում շատ դիմացկուն է, բայց ամեն դեպքում 2-3 տարի հետո փայտը պետք է անպայման վերամշակել»,-ասում է «Տեխնոսիթի» ընկերության հիմնադիր Արտյոմ Միքայելյանը։

Փորձնական ծրագրով պատրաստվող վերնիսաժային 25 տաղավարների կառուցման  աշխատանքներին արհեստանոցում մեծ հետաքրքրությամբ էին հետևում դոնոր կազմակերպությունների ներկայացուցիչները։ Գյումրեցի վարպետների ձեռքի աշխատանքները կկազմեն «Բարեկամության» զբոսայգու կարևոր մասը, որը գրավիչ վայր կդառնա քաղաք այցելող զբոսաշրջիկների համար։

«Անհրաժեշտ է տուրիստական արտադրանքը դիֆերսիֆիկացնել։ Այգու կառուցումը հիանալի հնարավորություն է  ոչ միայն Գյումրիի, այլև  Հայաստանի համար ցուցադրելու բոլորին ունեցած  տուրիստական պրոդուկտը։ Այս պարագայում մարդիկ հնարավորություն կունենան և՛ ձմռանը, և՛ ամռանը՝ տարվա բոլոր եղանակներին այցելել Գյումրի և հիանալ քաղաքի գեղեցկությամբ»,- նշում է ITTD ծրագրի թիմի ղեկավար Վիլհելմ Հուգոն։

Քաղաքի ինքնատիպ ճարտարապետությունը արհեստավորների քաղաքի անձնագիրն է, իսկ մի վայրում գյումրեցի վարպետներին առանձնահատուկ միջավայրում ներկայացնելը ինքնին կարող է  մարդակենտրոն տուրիզմի զարգացման հեռանկար ստեղծել։

Վերնիսաժային տաղավարները «Բարեկամության» զբոսայգում կտեղադրվեն ամռանը, որոնք կհամարվեն բաց ու ազատ միջավայր գյումրեցի արվեստագետներին ստեղծագործելու համար։ Տաղավարներից ու ատրակցիոններից բացի, մինչև տարեվերջ զբոսայգին կբացի նաև սահադաշտը, որի կառուցման համար Հայաստան կներկրվեն հատուկ տեխնոլոգիայով մշակված, սառույցի շերտ ապահովող բազմաֆունկցիոնալ ներքնակներ։