Ռոբերտ Քոչարյանի կալանավորումը Հայրիկյանը քաղաքական վենդետա չի համարում

ԱԻՄ առաջնորդ Պարույր Հայրիկյանը ճիշտ չի համարում ՀՀ երկրորդ նախագահ Ռոբերտ Քոչարյանին կալանավորելը: Որպես նախկին քաղբանտարկյալ՝ նա հիվանդագին է նայում նման երևույթներին ու կարծում է, որ քանի դեռ չկա դատարանի որոշում, նման քայլի գնալը տեղին չէ:

«20 տարի բռնադատվել եմ, ներառյալ բռնի արտաքսումը և հետո արդարացվել: Ոչ թե կալանավորվել եմ, այլ 4 անգամ դատվել, մի անգամ էլ արտաքսվել, հետո պարզվել է, որ ես սխալ չեմ եղել, և այդ պայմաններում մոտդ հիվանդագին է դրսևորվում մարդուն առանց դատարանի կալանավորելու փաստը, ով էլ ուզում է լինի, ինչ հանցագործություն էլ լինի, միայն բացառիկ դեպքերում, երբ փախչում է կամ էլ նման ինչ-որ բան կա: Այնպես որ, որևէ մեկի կալանավորումը, նույնիսկ ամենածանր հանցագործի, ես համարում եմ ոչ տեղին, մինչև դատարանի որոշումը, մանավանդ երբ կա քաղաքական լարված վիճակ»,- նշել է ԱԻՄ առաջնորդը:

Ռոբերտ Քոչարյանի այն տեսակետը, որ իր նկատմամբ քաղաքական հետապնդում է սկսվել այն պատճառով, որ ինքը պատրաստվում էր խորհրդարանական ընտրություններին, Հայրիկյանը «քաղաքական շահարկում» է համարում:

«Մինչ այդ հարցազրույցը ես չեմ հիշում որևէ հայտարարություն Ռոբերտ Քոչարյանի կողմից առ այն, որ ինքը պատրաստվում է ընտրությունների: Եթե ինքը պատրաստվում էր ընտրությունների և դրա համար իր նկատմամբ գործ հարուցեցին, գոնե դրանից առաջ ինքը մեկին պիտի ասած լիներ դրա մասին՝ որևէ լրատվամիջոցի, չի եղել այդպիսի բան կամ ես դրա մասին չգիտեմ: Ես չեմ ընդունում, որ ինքը փորձում է դրան քաղաքական ուղղվածություն տալ: Ազնիվ չէ»,- նշել է Հայրիկյանը:

Ինչ վերաբերում է ինչ-որ մարդկանց կամ քաղաքական ուժերի կողմից Ռոբերտ Քոչարյանին քաղաքական բանտարկյալ ներկայացնելու փորձերին, ապա, ըստ Հայրիկյանի, այդ ամենը կախված կլինի գործի ընթացքից, Քոչարյանին ներկայացվող մեղադրանքից ու հիմնավորումներից: Հաշվի առնելով անմեղության կանխավարկածը` Հայրիկյանը այդուհանդերձ հորդորել է Քոչարյանի և բոլոր մեղադրյալների հարցում չափավոր արտահայտվել, քանի դեռ չի եղել դատարանի որոշումը:

Ինչ վերաբերում է այն խոսակցություններին, որ Փաշինյանը քաղաքական վենդետա է իրականացնում Քոչարյանի ու նրա թիմի նկատմամբ, ապա, ըստ Հայրիկյանի, Փաշինյանը նման բան չի կարող իրականացնել բառի դասական իմաստով:

«Դու ապրում ես պետության մեջ, դու չես կարող, եթե դու վենդետա ես անում, նշանակում է, դու ապրում ես օրենքներից դուրս: Իսկ իրավական վենդետայի առումով որևէ մեկը իրավունք չունի ասել կանեմ կամ չեմ անի»,- նշել է Հայրիկյանը՝ միաժամանակ ավելացնելով, որ այն, ինչ այսօր կատարվում է, իր մեջ պարունակում է որոշակի քաղաքական դիրքորոշում և նկատառում, բայց դա Հայրիկյանը վենդետա անվանելը սխալ է համարում՝ պնդելով, որ երևույթը կարելի է բնութագրել որպես «իրավական կառույցների բնականոն գործունեություն»: