Շիրակի մարզի Արեգնադեմ գյուղում մոդուլային դպրոց է կառուցվում 

Շիրակի մարզի հյուսիսի բնակավայր Արեգնադեմ, որտեղ վեց ամիսը ձմեռ է, գազաֆիկացված չէ։ Փոքրաթիվ տնտեսությունով գյուղն ունի միջնակարգ դպրոց։ Այն արդեն 30 տարի է գործում է հարմարեցված երեք շինություններում, որոնք նախկինում տներ են եղել։

Դասարանից դասարան տեղափոխումը այստեղ նման է տնից տուն անցնելուն։ Նախկին ադրբեջանաբնակ գյուղում որպես հայկական դպրոց այն սկսում է գործել 1989-ից:

«Արեգնադեմի միջնակարգ դպրոցը 1989 թվականին է հիմնվել։ Այստեղ նախկին Ազիզբեկով գյուղն էր՝ լրիվ ադրբեջանաբնակ է եղել։ Հայկական դպրոց որպես 1989 թվականի սեպտեմբերի 1-ից է հիմնադրվել և երեք շինություններում ժամանակավորապես էր գործելու, որ 4 տարուց պետք է նոր դպրոց լիներ, բայց ինչպես տեսնում եք չկա»,- նշել է դպրոցի տնօրեն Հասմիկ Սահակյանը։

Ընդամենը երեք դասաասենյակում ձևավորվել են երկկոմպլեկտ և եռակոմպլեկտ դասարաններ։ Աշակերտության թիվը վերջին տարիներին 50-ից չի անցնում։

Գյուղի դպրոցահասակ երեխաների մի մասն էլ տեղափոխվել են Ամասիա շրջկենտրոնի կամ Գյումրիի դպրոցներ, պատճառը պայմաններն ու կրթության ոչ բավարար հնարավորություններն են։

«Ես որ 2000-ականներին եկել էի այստեղ ուսուցիչ, 100-ից ավելի աշակերտ կար։ Մեր աշակերտների թիվը տարիների ընթացքում իջել էր 32 հիմա 50 է»,-նշում է դպրոցի տնօրենը։

Արեգնադեմը Ամասիա շրջկենտրոնից ընդամենը 4 կմ է հեռու։ Բնակավայրում դպրոց ունենալը համայնքը պահող հանգամանք է։ Գյուղի միջնակարգ դպրոցի համար նոր շենք կառուցելու առջարակներ ու ծրագրեր կազմվել են, անգամ 2012 թվականին նոր շենքի կառուցման հիմքեր գցվեցին, որոնք այդպես էլ մնացին անավարտ։

Հետո հաջորդ դպրոցաշինական նախագիծը կազմվել էր 2017 թվին, որը ևս ձախողվել էր։ Միայն 3 տարի անց, Արեգնադեմի դպրոցի կառուցումն ընդգրկվում է դպրոցաշինական ծրագիր։

Արեգնադեմի միջնակարգ դպրոցն ընդգրկվել է «Փոքրաքանակ երեխաներով համալրված հանրակրթական դպրոցների մոդուլային շենքերի կառուցում» պետական ծրագրում։ Հարմարեցված դպրոցից քիչ այն կողմ տարածքի տեղակապում է եղել։

Շինտեխնիկան տարածք է մտել ապրիլին, աշխատանքներն հիմա ընթանում են արդեն մեկ անգամ փոխված նախագծով, ըստ որի դպրոցի համար ապաստարան է կառուցվելու։

Մեկ հարկանի մոդուլային դպրոցը կունենա մոտավորապես 3000 քառ մետր մակերես, 100 աշակերտի համար դպրոցը ապահովված է լինելու համապատասխան քանակի դասասենյակներով, սպորտդահլիճով։ Չգազաֆիկացված գյուղի կրթական հաստատությունը նախատեսված է ջեռուցել արևային էներգիայով։ Արևային համակարգով աշխատող կաթսայատուն է կառուցվելու։

Այս տարի Արեգնադեմի դպրոցի վերջին զանգը կհնչի ընդամենը երկու աշակերտի համար։ Նոր ուսումնական տարում 5 առաջին դասարանցի են պատրաստվում ընդունել։ Դպրոցի աշակերտությունն ու մանկավարժները սպասում են, որ գոնե այս տարի կհաջողվի առաջին դասարանցիներին դիմավորել նորակառույց դպրոցում։