Աշխարհի 4 ազդեցիկ կանանց կյանքի պատմությունը մեկ սյուժեում․ Գյումրիի թատրոնում «Բոհեմ» ներկայացման առաջնախաղն էր

Գյումրիի դրամատիկական թատրոնի «Մհեր Մկրտչյան» փոքր բեմում երեկ կայացավ «Բոհեմ» ներկայացման առաջնախաղը, որի հիմքում չորս հայտնի կանանց՝ Կոկո Շանելի, Էդիտ Պիաֆի, Ֆրիդա Կալոյի և Մարիա Ցվետաևայի կյանքի պատմություններն են՝ զուգորդված փաստագրությամբ ու ֆանտազիայով։

Աշխարհահռչակ ազդեցիկ չորս կանայք են, որոնք ապրել են բոհեմական կյանքով ու հասել մեծ նվաճումների: Նրանք դարձան շատերի համար ֆենոմենալ կերպարներ, որոնց փառքը չի մարել երկրային կյանքն ավարտելուց հետո էլ: Երիտասարդ դրամատուրգ Մարիա Ակոպովան մեկտեղել է  իրարից շատ տարբեր ու, միևնույն ժամանակ, իրար շատ նման չորս կանանց կյանքի պատմությունը։

«Դա թերևս ամենահետաքրքիր ու ինչ-որ տեղ ամենաբարդ պրոցեսն է եղել։ Իրականում առաջին հայացքից է թվում, թե իրենք շատ տարբեր են ու մեկը մյուսի հետ կապվելու ոչինչ չունեն։ Երբ արդեն պիեսը պատրաստ էր, ամենավերջում հասկանում ես, որ չէ, իրականում իրենք շատ թելեր ունեն, որոնցով կարող էին իրար կապվել, ու դժվարը ոչ թե  բերել, իրենց հավաքելն էր մի տեղում, այլ ապացուցել ու համոզել, որ այո՛, նրանք կարող են լինել նույն տեղում, ինչը, ինձ թվում է՝ ներկայացման դեպքում ստացվել է»,- ասում է ներկայացման դրամատուրգ Մարիա Ակոպովան։

Բեմադրությունը երիտասարդ ռեժիսոր Տաթև Ժաքյանինն է, կանանց  կյանքի պատմություններով հանդիսատեսին ցույց է տալիս փառքի հակառակ կողմն ու վարագույրի հետևում մնացած անձնական դժբախտությունները:

«Ընդհանրապես մարդկությանն է ուղղված ներկայացումը, առաջին հերթին երիտասարդությանը, որպեսզի հասկանան, որ ոչինչ հեշտ չի տրվում, և այն կերպարներին, որոնց հաճախ երիտասարդները ուզում են իրենց  կարիերայի ընթացքում նմանվել, իրականում այդքան էլ հեշտ չէ, այդքան հեշտ փափուկ ընթացքի արդյունք չէ»,- ասում է ներկայացման ռեժիսոր Տաթև Ժաքյանը։

«Բոհեմ»-ի առանցքում  հայտնի ու աշխարհահռչակ կանանց բոհեմական կյանքի հակառակ կողմն է, որը  աշխարհի ազդեցիկ չորս կանայք թաքցրել են հասարակությունից և մշտապես ներկայացել են ուժեղ ու անպարտելի կերպարներով:

«Ռեժիսորը և դրամատուրգը  խոսում են մի  շարք կարևոր բաների մասին՝ որն է դա, երբ որ մարդիկ ունեն անձնական տառապանք, ցավ, վիշտ, բայց չեն ընկճվում, հակառակը՝ իրենց անձնական վիշտը դարձրել են իրենց ոգեշնչման աղբյուրը և կարողացել են ստեղծագործել»,- նշում է Գյումրիի Վ․ Աճեմյանի անվան դրամատիկական թատրոնի տնօրեն և գեղարվեստական ղեկավար Լյուդվիգ Հարությունյանը։

Հանուն կարիերայի, բոհեմական կանայք զոհել են նաև իրենց անձնական երջանկությունը, անգամ հրաժարվել իրենց երեխաներից։ «Բոհեմ»-ում նաև զուգահեռներ են մեր օրերում ապրող  կանանց բնավորության, հաջողությունների հասնելու ձգտումների ու այդ ճանապարհին ի հայտ եկած անսպասելի ու թաքնված խոչընդոտների միջև: Փաստագրական ներկայացման ուղերձը մեկն է՝ ապրել այնպես, որ  ստեղծածդ դառնա մնայուն արժեք, հիշվի  բոլոր ժամանակներում, իսկ այդ ճանապարհին առանցքից դուրս չհայտնվի անձնական կյանքն ու երջանկությունը:

Դրամատիկական թատրոնում առաջին անգամ  դերասանուհիները մարմնավորել են ոչ թե գրական կամ հնարած հերոսների, այլ մի ամբողջ դարաշրջան փառքով ապրած իրական կանանց: «Բոհեմ»-ն առաջիկայում կներկայացվի նաև ռուսերեն և անգլերեն տարբերակներով: Իր փաստագրական-ֆանտաստիկ սյուժեով ու բեմադրական ոճով  կներկայանա նաև թատերական փառատոնների: