Հեղեղումների վտանգ Գյումրի գետակի մերձակա տարածքներում․ կոյուղատար գետակներ թափվող աղբի պատճառով խցանումներ են

Գյումրի գետակի հարակից տնակների համար հեղեղման վտանգի սեզոնն է։ Գարնանային անձրևներից ջուրն առատ է, հունից դուրս գալուն նպաստող պատճառներն էլ՝ շատ։ Հարակից տարածքում ու  այլ թաղերում ապրողները գետակը դարձրել են աղբի կուտակման տարածք։ Ջրի ճամփան փակվելու հետևանքները հարևան տներում ու տնակներում են, իսկ դրանցից անկանոն տեղադրվել են հենց գետակի բերանին՝ շատ խիտ դասավորությամբ։ Գետակի մի հատվածը Գյումրիի գլխավոր կամրջի տակով է հոսում, մի կողմում բնակելի տներն են, մյուսում՝ հողային պատնեշն ու ծառերը։

Գետակն աղբավայր դարձնելու հարցում մերձակա տների բնակիչներից ամեն մեկն իրեն անմեղ է համարում, բայց գետակը պարբերաբար ջրի երես է հանում հարևանի, հարակից թաղերի ու այլ թաղամասերից թափված աղբը։

Գյումրի գետակն աղբահավաք ավազան է ոչ միայն կամրջի հատվածում։ Քաղաքում միայն որոշ տարածքներում է գետակի հունը համեմատաբար մաքուր, ու դա միայն քիչ բնակեցված լինելու արդյունքում է։ Գետակի նեղ հատվածներում կամ կամրջակների տակ խցանումների և հեղեղումների վտանգն ավելի շատ է, այդ հատվածներում աղբը ջուրը նետելը գուցե հարմար տեղանք է, բայց մաքրման աշխատանքների համար դժվար հասանելի է։

«Տարածքներ ունենք, որտեղ տեխնիկա չմտնելու պատճառով չենք կարող աշխատանքներ կատարել, դոմիկներ են տեղադրված, հատվածներ ունենք, որտեղ ծառատունկն այնպես է կատարվել, որ տարիների ընթացքում ծառերը բարձրացել են, հնարավոր չի եղել մոտենալ։ Պլաստիկե տարաները ջրից հեռացնում ենք ձկնորսական սետկեքով, որտեղ ավելի ծանծաղ է, մտնում ենք ջուրը, ձեռքով հավաքում»,- ShantNews.am-ի հետ զրույցում նշել է Գյումրիի կոմունալ ծառայության տնօրենի տեղակալ Արտավազդ Ոսկանյանը։

Այդպիսի դժվարահաս տեղանքներ կան Սևյան, Խանջյան, Փանյան փողոցներում։ Նույն իրավիճակն է Ավտոկայան թաղամասում։ Գետակն անցնում է տնակային ավանով։ Խիտ դասավորված տնակների արանքում մաքրող տեխնիկա տեղաշարժել հնարավոր չէ, որոշ հատվածներում գետակն հոսում է տների տակով։ Խցանումները բացելու համար կոմունալ ծառայության բրիգադները լայնացնում և խորացնում են հունը։

Փետրվարին են մաքրել, բայց հիմա նորից անհրաժեշտություն կա Գյումրիի սելավատարների խցանումները բացելու։ Դրանցով ապահովվում են անձրևաջրերի հեռացումը փողոցներից։ Գյումրիի սելավատարների մեծ մասը նոր են կառուցվել՝ փողոցների հիմնանորոգման ժամանակ։ Խցանվում են հորդառատ անձրևներին ջրի հետ բերած հողով, քարերով, ինչի պատճառով շատ փողոցներ ջրածածկ են լինում։

 «Ջրի հոսքն է շատ լինում, սելավատարի տարողությունն էլ քիչ է, չի հասցնում քաշի։ Ասենք, Շիրակացի փողոցի վրա չունենք սելավատարներ, էդ ամբողջ ջրահոսքը գալիս, լցվում է Շիրազի փողոց»,- նշում է Գյումրիի կոմունալ ծառայության տնօրենի տեղակալը։

Գյումրիում համեմատաբար նորմալ գործող 320 սելավատար կա, որոնք հիմնականում քաղաքի կենտրոնական փողոցներում են, այլ հատվածներում կա՛մ դրանք բացակայում են, կա՛մ վաղուց խցանված են ու վնասված։ Սելավատարներ կառուցելուն կոմունալ ծառայությունը սպասում է փողոցաշինական ծրագրերի արդյունքում։ Նոր սելավատարների անհրաժեշտություն ունեն նաև Անի թաղամասի փողոցները։