Նախկին դպրոցի տեղում նորն է կառուցվում․ Կապս բնակավայրը կունենա մոդուլային տիպի դպրոց 

Կապս գյուղի նախկին դպրոցը վթարային էր դարձել երկրաշարժից հետո, որտեղ 30 և ավելի տարիներ դասեր էին անցկացնում գյուղի աշակերտները։ Մի քանի տարի առաջ կատարված ուսումնասիրություններով՝ շենքի վթարայնությունը գնահատվել էր 4-րդ աստիճանի, իսկ պատերին ներսից ու դրսից  կատարվել էին երկաթե ամրակայումներ։ 30 տարիների ընթացքում գրեթե միշտ  ընդգրկվում էր դպրոցաշինական հրատապ ծրագրերում, բայց հետո ծախսատարության պատճառով հայտնվում ծրագրերից դուրս։

Դպրոցի նախկին շենքի տարածքն այժմ շինհրապարակ է։ Աշխատանքները նոր մտել են հիմնային փուլ։ Դպրոցի նախագծով շինարարները երկաթբետոնե կառուցատարրերն են հավաքում։ Հանրապետության տարբեր բնակավայրերում կառուցվող այն դպրոցներից մեկն է, որը մոդուլային նախագծով է։

Փոքրաքանակ երեխաներով համալրված դպրոցների կառուցման պետական ծրագրով շինարարության առաջին փուլի համար հատկացվել է 339 մլն դրամ, իսկ ընդհանուր արժեքը  683 մլն 915 հազար դրամ է։

«Շիրակի մարզում մոդուլային  տիպի դպրոցներ կառուցվում են 3 բնակավայրերում՝ Արեգնադեմում, Բերդաշենում և Կապսում։ Մոդուլային դպրոցն իրենից ներկայացնում է պատրաստի նախագծանախահաշվային փաստաթղթեր, բազմակի օգտագործման են, կատարվում է միայն տեղանքի տեղակապում, և այդ մոդուլային նախագծով  դպրոցները կառուցվում են»,- ShantNews.am-ի հետ զրույցում նշել է Շիրակի մարզպետարանի քաղաքաշինության վարչության պետ Խաչատուր Խնձրցյանը։

Կապսի մոդուլային տիպի դպրոցը նախատեսված է շուրջ 100 աշակերտի համար։  Շինարարական ընկերությունը երևանյան է, աշխատուժը՝ տեղի համայնքի բնակիչներն են։ Գյուղից մշտական արտագնա աշխատանքի մեկնող բրիգադն է, որն այս տարի չի գնացել Ռուսաստանի Դաշնություն։ 25 հոգանոց շինարարական խմբով իրենց գյուղի դպրոցն են կառուցում։

Ներկայումս Կապսի միջնակարգ դպրոցում աշակերտների թիվը 50 է։ Դասերը հիմա կազմակերպում են գյուղի մանկապարտեզում, որի մի մասնաշենքը վերանորոգվել է ու ժամանակավոր հատկացվել դպրոցին։ Նեղլիկ դասասենյակներում, երկկոմպլեկտ ձևաչափով են դասերն անցկացնում ու, հավանաբար, այստեղ կշարունակեն դասապրոցեսը մեկ տարուց ավելի։

Երկու փուլով ընթացող շինարարության ավարտի ժամկետ է սահմանված 2023 թվականի աշունը։