Քիչ քնելը որովայնի հատվածում վնասակար ճարպի կուտակում է առաջացնում

Գիտնականները կրկին հաստատել են, որ քնի պակասը, սննդի ազատ հասանելիության հետ միասին, ավելացնում է կալորիաների ընդունումը։ Այս մասին հաղորդում է Вести լրատվամիջոցը։ Միևնույն ժամանակ նրանք պարզել են, որ դա հանգեցնում է որովայնի հատվածում վնասակար ճարպի կուտակմանը։

Մի շարք հրապարակված հետազոտություններ կապ են գտել վատ քնի և ճարպակալման, ինչպես նաև դրա հետ առնչվող վիճակների, այդ թվում՝ նյութափոխանակության խանգարման և հիպորտոնիայի միջև։ Ցուցադրելով նույն կապը՝ այլ հետազոտությունները ցույց են տվել, թե ինչպես լրացուցիչ քունը կարող է հանգեցնել կալորիաների դեֆիցիտի և ինչպես է այն նվազեցնում գիրության վտանգը:

Մի խումբ գիտնականներ ԱՄՆ-ից, որտեղ գիրության խնդիրը շարունակում է մնալ առողջության գլխավոր սպառնալիքներից մեկը, որոշել են ավելի մանրամասն ուսումնասիրել քնի պակասի ժամանակ ճարպի կուտակման գործընթացը։ Գիտնականներն ընտրել են 12 առողջ, ճարպակալում չունեցող մարդկանց, որոնցից յուրաքանչյուրը երկու անգամ 21 օր անցկացրել է հիվանդանոցում՝ գիտնականների մշտական հսկողության ներքո: Առաջին 21 օրվա ընթացքում մասնակիցները պատահականության սկզբունքով բաժանվել են վերահսկիչ խմբի (նորմալ քուն) և սահմանափակ քնի խմբի:

Երեք ամիս անց խմբերը կրկին 21 օր անցկացրել են հիվանդանոցում, սակայն քնի «հակառակ» ռեժիմով։ Հետազոտության ընթացքում բոլոր մասնակիցներն ազատ ընտրել են իրենց սնունդը:

Գիտնականները վերահսկել և չափել են էներգիայի ստացումը և ծախսը, մասնակիցների մարմնի քաշը և կազմը, ճարպերի բաշխումը, ներառյալ ներքին օրգանները շրջապատող ճարպը և արյան մեջ ախորժակի կենսամարկերները:

Առաջին չորս օրը «ընտելացման» շրջան էր՝ բոլոր մասնակիցները քնել են ինը ժամ: Հաջորդ երկու շաբաթվա ընթացքում քիչ քնող խմբին թույլատրվել է չորս ժամ քնել, իսկ վերահսկիչ խմբին` ինը ժամ: Այնուհետև երեք գիշեր անընդմեջ բոլոր մասնակիցները վերականգնվել են՝ կրկին ինը ժամ քնելով:

4 ժամ քնած մասնակիցներն օրական ավելի քան 300 հավելյալ կալորիա են օգտագործել (քնի սահմանափակման ժամանակահատվածում): Նրանք սկսել են 13%-ով ավելի շատ սպիտակուցներ և 17%-ով ավելի շատ ճարպեր օգտագործել՝ համեմատած կլիմայականացման փուլի հետ։

Եթե մասնակիցները չանցնեին համակարգչային տոմոգրաֆիա, գիտնականները բաց կթողնեին հետազոտության ամենակարևոր հայտնագործությունը՝ քնի սահմանափակումը կամավորների մոտ որովայնի հատվածում ճարպի կուտակման պատճառ է դարձել: Ընդ որում, նրանց քաշի ավելացումը բավականին աննշան է եղել՝ մոտ 450 գրամ։

Գիտնականները բացատրում են, որ սովորաբար ճարպը կուտակվում է հիմնականում մաշկի տակ։ Այնուամենայնիվ, քնի պակասը, ակնհայտորեն, ճարպը «ուղղորդում է» որովայնի խոռոչ, որտեղ դրա ավելցուկը շատ ավելի վնասակար է առողջության համար։

Կարևոր է նշել, որ չնայած մասնակիցների կողմից կալորիաների ընդունումը և քաշը նվազում էին վերականգնող քնի ժամանակ, սակայն որովայնի ճարպը շարունակում էր կուտակվել: Սա հուշում է, որ առնվազն կարճաժամկետ հեռանկարում քնի ռեժիմի վերականգնումը լիովին չի վերացնում որովայնի ճարպի կուտակումը:

Աշխատանքի հեղինակները հետևյալ եզրակացությունն են անում՝ մարդիկ, ովքեր չեն կարողանում խուսափել անկանոն քնից, պետք է հետևեն հատուկ սննդակարգի և մարզումների։