«Շիրակի ձմեռ-2022» փառատոն Մեծ Սարիար գյուղում․ սակավ ձյան պատճառով ձմեռային մարզաձևերը չեն ներկայացվել

Այսօր անցկացվել է «Շիրակի ձմեռ-2022» փառատոնը։ Առաջին անգամ միջոցառման վայր ձյունառատ Աշոցքի փոխարեն ընտրվել էր Մեծ Սարիար գյուղի հարակից անտառապատ տարածքը, որը  ձմռան ամիսներին  առաձնանում էր իր հաստ ձնածածկույթով։ Սակայն, երեկ երեկոյան, տեղացած անձրևը այլ  իրավիճակ էր  ստեղծել ձմեռային սպորտաձևերի սիրահարների համար։

Փառատոնի անցկացման վայրը Մեծ Սարիարի անտառն էր, որտեղ հասնելու համար ստիպված անցնել էր պետք ցեխապատ երկար ճանապարհով, այդ հատվածը  իսկական փորձություն դարձավ նույնիսկ ամենագնաց ավտոմեքենաների վարորդների համար։ Ճանապարհին  մի քանի մեքենաներ արգելափակվել էին ցեխաշերտի մեջ, մի մասն էլ  շրջանցիկ ճանապարհներ էին որոնում։

Փառատոնին մասնակցելու համար մարզի տարբեր տարածաշրջաններից ու հանրապետության  այլ բնակավայրերից եկել -հասել էին Մեծ Սարիար գյուղ ։ Անտառի մի փոքր հատվածում, այնուամենայիվ, ձյուն գտնվեց, այդտեղ էլ անցկացվեց դահուկավազքի սիրողական առաջնություն։ Ու սա միակ ձմեռային մարզաձևն էր, որը  փառատոնի շրջանակներում ներկայացվեց։

Նախապես ծրագրված սպորտային  միջոցառումներն իրենց տեղը զիջել էին ցուցադրական ելույթներին։ Ռոբոտաշինության խմբակի պատանի ծրագրավորողները ցուցադրեցին իրենց  նախագծած ռոբոտները, իսկ ավիամոդելային խմբակի երեխաները մրցեցին  սավառնող իրենց ինքնաթիռներով։

Միջոցառման անբաժանելի մաս էր կազմում համտեսը։ Առանձնացված տաղավարներում մարդիկ ճաշակում էին թխվածքներն ու ճաշատեսակները։ Միջոցառմանը ներկա  պրոֆեսիոնալ  զբոսավարների հայկական ասոցիացիայի անդամներն էին փաստում, որ Շիրակի մարզը շարունակում է մնալ ամենապահանջված զբոսաշրջային ուղղությունը Հայաստանում։

«Գյումրին դարձել է մեր Հայաստանի այցեքարտերից մեկը, տուրիստական ընկերությունների ցանկալի ուղղություններից մեկը։ Եթե էքսկուրսիաներ են ցանկանում, միանշանակ առաջարկվում է Գյումրին, որովհետև հայրաքաղաքում պահպանված են հնությունները։ Եթե ուզում  ես  հանգստանալ, վայելել հին հայկական մշակույթն ու ճարտարապետությունը, միանշանակ պետք է գալ Գյումրի»,-նշում է  պրոֆեսիոնակ զբոսավարների Հայկական ասոցիացիայի զբոսավար Դավիթ Բաբայանը։

Ըստ զբոսավարների մարզում տուրիզմի զարգացմանը խանգարում են  ենթակառուցվածքների անհարմարությունները։ Վերջին տարիներին Հանրապետության գյուղական բնակավայրերում զարգանում է նաև էկոտուրիզմը։

«Շիրակի մարզի զբոսաշրջային հնարավորությունների մեջ ձմեռային տուրիզմը մեծ դեր ունի՝ հաշվի առնելով բնակլիմայական պայմաններ, և Շիրակի ձմեռ միջոցառումը հենց  դրան է ուղղված։ Իհարկե կարծում եմ, որ պետք է  էս միջոցառումը անցկացնել ձմռան սկզբում, ոչ թե վերջում, այս տարվանից մենք մոտեցումը կփոխենք, որպեսզի  փառատոնով մենք ազդարարենք  սեզոնի սկիզբը և զբոսաշրջիկներին հրավիրենք Շիրակի մարզում ձմեռային տուրիզմով զբաղվելու»,- նշել է ՀՀ էկոնոմիկայի նախարար Վահան Քերոբյանը։

«Շիրակի ձմեռ-2022» փառատոնը առիթ էր ներկայացնելու  մարզի զբոսաշրջային պոտենցիալը։ Այն նաև տարբեր բնակավայրերի երիտասարդներին միմյանց հետ շփվելու հնարավորություն տվեց։