9-րդ դասարանում միասնական քննություն կհանձնեն նաև մաթեմատիկա առարկայից 

Այս տարի 9-րդ դասարանի մաթեմատիկա առարկայի ավարտական քննությունը կանցկացվի կենտրոնացված կարգով: Հիմնական դպրոցի ավարտական քննությունների շարքում մինչ այս տարի կենտրոնացված անցկացվում էր միայն հայոց լեզվի քննությունը: Ուսումնական տարվա երկրորդ կեսին կատարված փոփոխությունը հավելյալ ծանրաբեռնվածություն է առաջ բերել հանրակրթական գործընթացում։ Փոխարենը դպրոցների ուսումնական պլանում չեղարկվել են տարին երկու անգամ կազմակերպվող կիսամյակային գրավորները։ Սա հնարավորություն կտա ուսումնական հաստատությանը ինքնուրույն որոշել՝ ինչպես ստուգել աշակերտի կիսամյակային գիտելիքները։

Կենտրոնացված քննության կարգը 9-րդ դասարանցիների համար կիրառվեց այն ժամանակ, երբ դպրոցները բաժանվեցին հիմնականի և ավագի։ Որպես հիմնական դպրոցի ավարտական դասարան, անցած 4 ուսումնական տարիներին, միայն հայոց լեզվի քննությունն էր կենտրոնացված։ Իսկ ուսումնական տարվա երկրորդ կեսին հայտնի դարձավ, որ հայոց լեզվին ավելանում է նաև մաթեմատիկա առարկայից քննությունը։ Հիմնական դպրոցն ավարտող աշակերտական թվակազմի համար այս առարկան, որպես քննական հաստատելը, ուսուցիչների կարծիքով ոչ բոլորի համար է հաղթահարելի:

«Բերեք հասկանանք, թե արդյո՞ք մաթեմատիկան հասանելի է բոլորին, երեխա կա, ի վիճակի չէ մաթեմատիկա հասկանալու, հիմա ի՞նչ, դրա համար քննությունից կտրվի ու ատեստատ չստանա՞։ Նախ մենք պատրաստ չէինք, գոնե բդի տարեսկզբից տեղյակ պահեին, որ կենտրոնացված է լինելու քննությունը, հետո էս համաճարակի պայմաններում բացակայությունների հետ կապված, երեխաները ինչ-որ բաներ ունեն բաց թողած, որը դժվարությունների առաջ կկանգնեցնի» – նշում է մաթեմատիկայի ուսուցչուհի Կարինե Մովսիսյանը։

Դպրոցական ծրագրին զուգահեռ հիմա քննական թեստերն են համեմատում ու փորձում հասկանալ՝ մինչև տարեվերջ ինչ կհասցնեն սովորել։ Հին ու նոր թեստերի միջև տարբերությունները զգալի են և անկախ ժամանակի սղությունից, պետք է հասցնել բացը լրացնել։ Առարկայի ուսուցիչներն հիմա օրվա մեջ, ամենաշատ դասաժամանակը տրամադրում են քննության թեստերի առաջադրանքները յուրացնելուն։ Հարցաշարերը շատ են, թեմաները բավական ընդգրկուն։ Մինչև հունիս, քննությունների օրերը նաև լրացուցիչ դասաժամեր են ծախսելու աշակերտներին անցած տարիների թեմաները հիշելու։

Մաթեմատիկայի միասնական քննության հարցում եթե մանկավարժներն, այնուամենայնիվ, մտահոգություններ ունեն՝ հաշվի առնելով աշակերտության մի մասի գիտելիքների պաշարը, ապա 2-րդ կիսամյակում կատարված մեկ այլ փոփոխությունը՝ կիսամյակային գրավորների չեղարկումը, համարում են ճիշտ քայլ, թեև այս մեկն էլ խախտելու է տարեկան ուսումնական պլանները։

«Որովհետև արդյունքում մեկ գնահատականը ազդում էր երեխայի ամբողջ կիսամյակի գնահատականի վրա, կարող է երեխան ամբողջ կիսամյակի ընթացքում թեմատիկ, բանավոր, գործնական աշխատանքներից բարձր է ստանում, բայց կիսամյակայինի ժամանակ մի բան խանգարում է, ցածր է ստանում և երկու գնահատականի միջինը գալիս է ավելի ցածր»,- նշում է Գյումրիի թիվ 15 հիմնական դպրոցի ուսումնական գծով փոխտնօրեն Անահիտ Բաղդասարյանը։

Դպրոցներ են արդեն հասել 2021-2022 ուսումնական տարվա երկրորդ կիսամյակում գնահատման նոր մեթոդական ցուցումները։ Այս կիսամյակից սկսած դպրոցն ինքն է որոշելու, թե ինչպես պետք է գործի միավորային գնահատումը, իսկ դրա համար առաջարկվում է բաղադրիչների մի շարք՝ բանավոր հարցում, գործնական աշխատանք, նախագծային աշխատանք, թեմատիկ աշխատանքներ կամ բացառիկ դեպքերում ամփոփիչ աշխատանք։ Կրթական նորամուծությունների արդյունքները հայտնի կդառնան ուսումնական տարվա ավարտին։ Իսկ ավարտական դասարանների կենտրոնացված քննությունների անցկացման օրերը հայտնի կդառնան ավելի ուշ, դրանք հաստատելու է գնահատման և թեստավորման կենտրոնը։