Ազատանի միջնակարգ դպրոցի համար նոր մասնաշենքեր են կառուցվում

Ազատանի միջնակարգ դպրոցի կառուցման աշխատանքները մեկնարկել են։ 2018 թվականից էր այն ներառվել  դպրոցաշինական ծրագրում։ Ուսումնասիրությունների արդյունքում մարզային 26 դպրոցների մասնաշենքերի հետագա շահագործումը համարվել է խիստ վտանգավոր։ Շիրակի մարզում այդպիսիք են համարվել Արթիկի թիվ 2 հիմնական և Ազատանի միջնակարգ դպրոցները: Արթիկի դպրոցի շինարարությունը սկսվել էր 2021 թվականի նոյեմբերից։ Երկու համայնքներում դպրոցների կառուցման ծրագիրն իրականացվում է ՀՀ կառավարության և տարածքային զարգացման հիմնադրամի համատեղ միջոցներով:

Ազատանի միջնակարգ դպրոցի հին ու ամենամեծ տիպային շենքը կառուցվել է 1986 թվականին: 88-ին վնասվել է, դասերն անցկացնել այս շենքում արգելվել է, դպրոցը  տեղակայվել է վրաններում, հետո տնակներում: Բայց վթարային շենքը դատարկ չի մնացել, տեքստիլ արտադրամաս է գործել:

1993-94 թվականներին, սակայն, դպրոցը վերադարձել է իր վթարային ու վտանգավոր մասնաշենք, որտեղ գյուղի 740 աշակերտներից սովորում է մոտ 450-ը, մյուսները դպրոց են գնացել մոտ երկու կմ հեռու գտնվող այլ մասնաշենքում :

«Սեյսմիկ ծառայության կողմից տրվել է համապատասխան եզրակացություն։ 2011 թվականին ուսումնասիրել են, 3-րդ աստիճանի վթարայնության շենք է, նաև կիսանկուղային հարկը ջրով լցվելու արդյունքում բավականին ճաքերը  շենքում շատացել են, նստվածքներ կան։ Հիմնավոր մեր  ներկայացրած փաստարկներից հետո էր  երևի,որ դպրոցական մասնաշենքի կառուցումը  ընդգրկվեց պետության  կարևոր ծրագրերի շարքում»,- նշել է Ազատանի միջնակարգ դպրոցի նախկին տնօրեն Համլետ Ոսկանյանը։

Ըստ մասնագիտական եզրակացության, դպրոցի մասնաշենքը հետագա շահագործման համար վտանգավոր է, ենթակա է քանդման: Բայց հիմա այստեղ են տեղափոխվել նաև մյուս մասնաշենքի աշակերտները: Դպրոցն անցել է երկհերթ  գրաֆիկի:

Գյուղի դպրոցի մյուս  մասնաշենքը կառուցվել է 2005 թվականին, աշակերտության թվակազմը հաշվի առնելով, նախատեսվում էր, որ Ազատանը  պետք է ունենար երկու դպրոց, սակայն ծրագիրը այդ թվերին չի հաստատվել, և որոշվել է դպրոցի աշակերտական համակազմը բաժանել երկու մասի:

17 տարի առաջ կառուցված դպրոցի հարևանությամբ նոր մասնաշենքերի հիմքեր են գցվում։ Նորի կառուցումը դպրոցների սեյսմիկ անվտանգության բարելավման ծրագրի շրջանակներում է:

«Շատ բարձր սեյսմակայունությամբ մասնաշենքեր են լինելու, որովհետև ամբողջովին կրող մասը երկաթբետոնյա կոնստրուկցիաներ են, իսկ ինչպես գիտեք, երկաթբետոնյա կոնստրուկցիան ամենադիմացկունն է այս պահի դրությամբ շինարարության մեջ»,- նշել է «ԱՐ ՀՈՎ ՇԻՆ» ընկերության ինժեներական գծով պատասխանատուն։

Նախագծման փուլում տեղանքում մասնագիտական ուսումնասիրություններ են կատարվել: Տրված եզրակացության հիման վրա թույլատրվել է  եռահարկ մասնաշենքեր կառուցել: Նոր կառուցվող մասնաշենքերը միանալու են գործող երկհարկանի դպրոցին, որտեղ միայն վերանորոգման անհրաժեշտություն կա ։

Ազատանի դպրոցի նոր մասնաշենքերի կառուցումը կավարտվի երկու տարում։ Այդ ընթացքում 740 աշակերտները դասերը կշարունակվեն վթարային ու հին մասնաշենքում, որը ենթակա է քանդման։ Նախագծանախահաշվային աշխատանքների ընթացքում վերջապես  կարգավորվել է նաև դպրոցի հարակից տարածքի պատկանելիության հարցը, այն կառավարության որոշմամբ հատկացվել է կրթօջախին: 2005 թվականին կառուցված  դպրոցը  չի ունեցել սեփականության կադաստրային վկայական: