Գյումրիի ավագանին գումարել է այս տարվա առաջին նիստը՝ ավագանու անդամների ոչ լրիվ կազմով

Այսօր կայացել է Գյումրիի ավագանու այս տարվա առաջին նիստը՝ ավագանու անդամների ոչ լրիվ կազմով։ Կորոնավիրուսով վարակված լինելու պատճառով «Քաղաքացիական պայմանագիր» խմբակցության անդամների մեծ մասը չի մասնակցել։

Օրակարգային հարցերի քննարկումից առաջ ձևավորվեց ավագանու ժամանակավոր հաշվիչ հանձնաժողովը, հաստատվեց կազմը։ Տարվա առաջին նիստի օրակարգի հիմնական հարցերը ֆինանսական էին։ Քաղաքապետի ֆինանսական գծով խորհրդական Լենա Ջիլավյանը առաջարկեց նախորդ տարվա ընթացքում տնտեսած  մոտ մեկ միլիարդ դրամ ազատ միջոցները ֆոնդային մաս տեղափոխել, գումարը ծախսել քաղաքի կարիքների համար։

«Մենք նախատեսում ենք էս գումարով  հիմնականում «Անի» թաղամասի ասֆալտապատման աշխատանքներ  իրականացնել, ընտրանքային կարգով  ուզում ենք մի քանի շենքերի արտաքին ջերմամեկուսացում իրականացնենք, բացի դրանից, մենք կոմունալ ծառայության համար  մեքենաներ ենք ձեռք բերելու՝ ձյուն մաքրող մեքենաներ, ամեն դեպքում՝ մենք պարտավոր ենք էս գումարը ծախսել»,- հայտարարել է քաղաքապետի խորհրդականը։

Բյուջեում առաջարկվող փոփոխությունն ընդունվեց միաձայն, 600 հազար դրամ էլ նախատեսվեց հատկացնել Մարիամ և Երանուհի Ասլամազյան քույրերի պատկերասրահին։ Բարերարի միջոցներով  վերանորոգման աշխատանքներ են  կատարվել, իսկ  քաղաքի բյուջեից գումարը նախատեսվում է ծախսել փայտե հատակը փոխելու համար։

Օրակարգային հարցերի քննարկումից հետո ավագանու անդամները քաղաքացիներին հուզող հարցերն ուղղեցին  քաղաքապետին և բաժինների ղեկավարներին։ Դարձյալ  թափառող շների խնդիրը մնում է մտահոգող։

«Նոր կազմակերպություն կա, որը մի քանի օր առաջ արդեն հաղթել է մրցույթը, հանձնարարականներ կա տրված, մենք հետևում ենք թափառող շների խնդրին։ «Անի» թաղամասում աշխատանքներն արդեն սկսված են, 3 օրվա ընթացքում արդեն 60 շուն է տարվել ստերջացման»,- հայտնել է Գյումրիի քաղաքապետ Վարդգես Սամսոնյանը։

Շների համար նախատեսված ապաստարանը այս տարի ևս գործելու է, թե  երբվանից, հստակ ժամկետներ չեն նշվում։

Ավագանու անդամներից հարց եղավ Սևյանի մշակույթի պալատի շենքի պահպանության և  վերակառուցման մասին։ Գյումրիի գլխավոր ճարտարապետը հայտնեց, որ նախագծային աշխատանքներն  ավարտված են, «Բալետ 20-21» հիմնադրամին հատկացված շինությունը կվերականգնվի մինչև 2026 թվականը։

«Նախագծային ու էսքիզային տարբերակները պատվիրված է հիմնադրամի կողմից, ամերիկացի ճարտարապետներ են աշխատել, շատ հետաքրքիր  կոնցեպտ է ստացվել, շենքը միացված է Կայարանի շենքի հետ, շատ հետաքրքիր ու կրեատիվ  լուծումեր ունի»,- նշել է Գյումրիի գլխավոր ճարտարապետ Հենրիկ Գասպարյանը։

Իսկ թիվ մեկ պոլիկլինիկայի շենքը, որը Գյումրիի պատմամշակութային շինություններից մեկն է, վերակառուցումից հետո  արդյո՞ք կմնա  քաղաքի հաշվեկշռում, այս հարցը ևս քաղաքի գլխավոր ճարտարապետին։ Վերջինս էլ պատասխանեց, որ այն մնում է համայնքային ենթակայության տակ, իսկ  վերանորոգման աշխատանքների ընթացքում ամեն ինչ  կհամաձայնեցնեն  քաղաքաշինական նորմերին, արտաքին ձևափոխություններն արգելված են։