«Արսենալ»-«Էստերստունդ» խաղն այսօր է՝ «Շանթի» եթերում. մանրամասներ սպասվող հանդիպումից

Փետրվարի 15, 22:00: Այսօր ու այդ ժամին «Արսենալը» կրկին կլինի խաղադաշտում:  

«Յամկրաֆտ Արենա»-ում զինագործներին կհյուրընկալի շվեդական Էստերսունդը: Լոնդոնյան ակումբի համար դեպի չեմպիոների լիգա տանող ամենակարճ ճանապարհն այս պահին, թերևս, «Եվրոպա լիգայում» հաղթելն է: Չնայած զինագործների գլխավոր մարզիչը դեռ հույսը չի կորցրել Պրեմիեր լիգայում տեղը բարելավելու և այդ կերպ Չեմպիոների լիգայում հայտնվելու համար.

«Ես ընդհանրապես կարծում եմ, որ Չեմպիոների լիգայի ուղեգիրը Եվրոպա լիգան հաղթելով նվաճելը ճիշտ չէ, բայց եթե նման հնարավորություն լինի, մենք դա կանենք: Ամեն դեպքում մեզ համար առաջնահերթ կարևորություն ունի Պրեմիեր լիգան»,-նշել է «զինագործների գլխավոր մարզիչ Արսեն Վենգերը:

Ոչ միայն Արսենալը, այլև եվրոպական մյուս գրանդները հաճախ են թերահավատորեն մոտենում Եվրոպա լիգային: Բայց անցած տարի տեղի ունեցածը ցույց տվեց, որ այս մրցաշարը հաճախ նաև օգնում է: Նախորդ մրցաշրջանում «Մանչեսթեր Յունայթեդի» համար հաղթող դառնալը Չեմպիոնների լիգայում հայտնվելու միակ ճանապարհը դարձավ: Չնայած զինագործների մարզիչը հույսը լիովին այս մրցաշարի հետ չի կապում, բայց հայտարարում է՝ խաղին մարտական տրամադրությամբ են մոտենալու:

«Ես ամեն դեպքում հիմնական կազմի խաղացողների եմ դաշտ դուրս բերելու, քանի որ մինչև այս հանդիպումը մենք այլ խաղ չունենք: Չեմ կարող բաց թողնել այս հնարավորությունն այն պատճառով, որ մենք չենք խաղում Անգլիայի Գավաթում: Ես խաղացողներին հանգիստ տալու պատճառ չունեմ»,- ասել է Վենգերը:

 Տրամադրվածությունը մարտական է, սպասվող խաղն էլ՝ բարդ: Ծնկի վնասվածք ունի Ալեքսանդր Լյակազետը, որը կբացակայի 4-ից 6 շաբաթ: 

Մխիթարյան-Օբամեյանգ դուետն էլ կմասնատվի՝ Եվրոպայի Լիգայի կանոնադրության պատճառով: Գաբոնցու նախկին թիմը՝ Դորտմունդի «Բորուսիան», մրցաշրջանը սկսել է Չեմպիոնների լիգայում, սակայն խմբային փուլում զբաղեցրել է 3-րդ տեղը և հիմա Եվրոպա լիգայի փյեյ-օֆում է: Կանոնների համաձայն՝ ֆուտբոլիստը չի կարող ՈՒԵՖԱ-ի հովանու ներքո անցկացվող 1 մրցաշարում խաղալ 2 տարբեր թիմերի կազմում: Այսպիսով, Օբամեյանգին մինչև մրցաշրջանի ավարտը Եվրոպա լիգայում չենք տեսնի՚։ Սա նշանակում է, որ զինագործների խաղում հնարավոր է լինեն տակտիկական որոշակի փոփոխություններ և խաղադաշտում դերերի վերաբաշխում:

Ըստ բրիտանական լրատվամիջոցների՝ «Արսենալի» հավանական մեկնարկային կազմում առաջ քաշված հարձակվողը կլինի Ուելբեքը: Նրան թիկունքից կօգնեն Իվոբին, Օզիլը և Մխիթարյանը: Ի դեպ, հայ ֆուտբոլիստի մոտ փոփոխություն ևս կլինի: Մարզաշապիկի վրա գրված 7-ին մեկ 7 էլ կավելանա ևՄխիթարյանն այս մրցաշարում հանդես կգա 77 համարի ներքո՝ էլի կանոնադրության պահանջով: Այն սահմանում է՝ Միկին չի կարող հանդես գալ Եվրոպայի լիգայի խաղարկությունում 7 համարի ներքո, քանի որ «Արսենալ»-ի նախկին ֆուտբոլիստ Ալեքսիս Սանչեսն այս մրցաշրջանում արդեն կրել է այդ համարի մարզաշապիկը:

Այս լուսանկարները շվեդական ակումբի հանդերձարանից են: Հանդիպումից առաջ թվիթերյան իրենց էջում հրապարակել են և կից մի գրառում արել:

We are ready for you @Arsenal ! Did we mentioned our new locker rooms? #vigerossaldrig #EuropaLeague #iglooadventure pic.twitter.com/c5SJQplYE3

— Östersunds FK (@ofk_1996) 12 февраля 2018 г.

«Պատրաստ ենք ընդունել քեզ, «Արսենա՛լ»: Արդեն պատմե՞լ ենք մեր նոր հանդերձարանների մասին»:

Սա արդեն 3-րդ դեպքն է, երբ շվեդական այս ակումբը «զինագործների» հետ խաղին սարկազմով է մոտենում: Մի անգամ էլ՝ ԵԼ-ի վիճակահանությունից հետո, շվեդները խորհուրդ տվեցին լոնդոնցիների գլխավոր մարզիչ Արսեն Վենգերին ճիշտ կոճկել վերնազգեստը:

«Փետրվարին ձեզ կսպասենք «Յամտկրաֆտ արենայում»: Ժամանելուց առաց խնդրում ենք համոզվել, որ Վենգերը շտկել է վերնազգեստի խնդիրները: Մեզ մոտ ցուրտ է լինելու»,- թվիթերյան էջում գրել է շվեդական ակումբը:

See you at Jamtkraft Arena in february! Please make sure that Wenger has fixed his jacket before traveling, it’s going to be cold in Ostersund 😉 #vigerossaldrig pic.twitter.com/nHxPcZqLeh

— Östersunds FK (@ofk_1996) 11 декабря 2017 г.

 Բայց սա դեռ ամենը չէ: Մխիթարյանի թիմի նկատմամբ նաև եղանակն է ոչ բարենպաստ տրամադրված: Սպասվում է, որ խաղը կկայան -4 աստիճան ցրտի պայմաններում: Ակնհայտ է, որ լոնդոնյան համեմատաբար տաք եղանակի համեմատ զինագործների համար սառնամանիք է լինելու:

Բուքմեյքերական ընկերությունները «Էստերսունդ»-«Արսենալ» զույգի ֆավորիտ են համարում «զինագործներին», որոնց երկու խաղերի արդյունքով հաջորդ փուլ դուրս գալու հավանականությունը գնահատվում է 1.08 գործակցով, շվեդական ակումբինը՝ 6.5 գործակից: Այսօր կայանալիք խաղում «Արսենալի» հաղթանակը բուքմեյքերները գնահատում են 1.5 գործակցով, «Էստերսունդի» հաղթանակը 6.5, ոչ-ոքին 4.33 գործակից: Մինչդեռ  «Էստերսունդի» նախագահ Դանիել Կինդբերգը չի կասկածում, որ իր ակումբը հաղթահարելու է «Արսենալի» արգելքը Եվրոպա լիգայի 1/16 եզրափակչում: 

«Իհարկե, մենք կհաղթենք «Արսենալին»: Տեսնում եմ, թե ինչպիսի մարզավիճակում ենք մենք, և ինչպիսի` նրանք: Կսկսենք խնդիրը իրագործել հենց առաջին հանդիպումից, իսկ հետո ուրախությամբ կմեկնենք «Էմիրեյթս»: Երբ ես ասացի, որ կհաղթահարենք «Գալաթասարայի» արգելքը, մարդիկ ինձ խելագար համարեցին: Հիմա իսկական ժամանակն է ու մենք կարող ենք անցնել «Արսենալին» ու դուրս գալ 1/8 եզրափակիչ: Մեր նպատակն է հանդես գալ մրցաշարի եզրափակչում»,- «The Sun»-ին տված հարցազրույցի ժամանակ նշել է նա:

Ինչևէ, այս խաղում գոլ խփելու ամենահավանական թեկնածուն լոնդոնցիների հարձակվող Դենի Ուելբեկն է. նրա՝ գոլի հեղինակ դառնալու հնարավորությունը գնահատվում է 1.9 գործակցով: 

Հայաստանի ազգային հավաքականի և Լոնդոնի «Արսենալի» կիսապաշտպան Հենրիխ Մխիթարյանի գոլ խփելու հավանականությունը նույնպես մեծ է՝ 2.3:  «Էստերսունդի» ֆուտբոլիստներից գոլի հեղինակ դառնալու հավանականությունը, ըստ բուքմեյքերական ընկերությունների,  ամենաբարձրն է իրանցի հարձակվող Սաման Գոդդոսի մոտ, ում համար սահմանված է 4.25 գործակից: Բուքմեյքերները գործակիցներ են սահմանել նաև առանձին ֆուտբոլիստների՝ մեկից ավելի գոլ խփելու հավանականության համար։ Մխիթարյանի՝ դուբլի և հեթ տրիկի հեղինակ դառնալու հնարավորությունը գնահատվում է հետևյալ կերպ. Հենրիխի երկու գոլի համար սահմանված է 11 գործակից, իսկ երեք գոլը գնահատվում է 41 գործակցով: Այն, որ Մխիթարյանը կդառնա խաղում առաջին գոլի հեղինակը, գնահատվում է 6.5 գործակցով:

Հիշեցնենք, որ «ՇԱՆԹ» հեռուստաընկերությունը ձեռք է բերել ՈՒԵՖԱ-ի «Եվրոպա» լիգայի հանդիպումների  հեռարձակման բացառիկ իրավունքը։ Այսօր՝ ժամը 22.00-ին, «ՇԱՆԹ»-ի և «ՇԱՆԹ ՊՐԵՄԻՈՒՄ»-ի եթերում կարող եք դիտել «Էստերսունդ»-«Արսենալ» Եվրոպա լիգայի 1/16 եզրափակիչ առաջին հանդիպումը: Պատասխան խաղը մեկ շաբաթ անց է՝ փետրվարի 23-ին Երևանի ժամանակով 00:05-ին:Հեռուստաընկերությունը ձեռք է բերել ՈՒԵՖԱ-ի «Եվրոպա» լիգայի հանդիպումների հեռարձակման բացառիկ իրավունքը։