Բորիս Ջոնսոնի «հարբած ուրբաթներն» ու մյուս արկածները

Մամուլը մեծ հաճույքով հրապարակում է Դաունինգ սթրիթում տեղի ունեցած երեկույթների մանրամասները: Կարանտինի, համազգային լոքդաունի և նույնիսկ սգո արարողությունների ժամանակ Բորիս Ջոնսոնը բրիտանացիներին հորդորել էր ձեռնպահ մնալ հարազատների ու ընկերների հետ հավաքներից, մինչդեռ ինքն իր ծննդյան տարեդարձը նշել է մեծաթիվ ընկերների հետ։ Ընդդիմությունը հրաժարական էր պահանջում, ոստիկանությունը հետաքննություն էր սկսել: Բայց, ինչպես պարզվում է, վարչապետի ընդդիմախոսներն էլ դեմ չէին զվարճանալ՝ շրջանցելով խիստ սահմանափակումները։ Ի՞նչ պատմությունների մեջ է վարչապետն ընկել:

2020 թվականի մայիսին տեղի ունեցած տխրահռչակ երեկույթը, որի մասին հայտնի դարձավ ձմռան սկզբին, արդեն փչացրել էր Ջոնսոնի Սուրբ Ծնունդը։ Սակայն դա միակ երեկույթը չէր, ինչպես պնդում են նոր հետաքննության հեղինակները։
Կառավարության կողմից հավաքագրվում են Դաունինգ Սթրիթում կարանտինային խախտումների վերաբերյալ տվյալները։ Ավագ պետական ​​ծառայող Սյու Գրեյը հարցաքննել է Ջոնսոնին և խոստացել հրապարակել բացահայտումները փետրվարի սկզբին: Այսպես կոչված «Գրեյի  արձանագրության» մի մասն արդեն հայտնվել է մամուլում։

Այդ լուրերն ամենաքննարկվողն էին։ Ջոնսոնի արկածների մասին մամուլում տիրող աղմուկը նույնիսկ խլացրել էր Ուկրաինայի շուրջ ստեղծված իրավիճակը: Ամբողջ թագավորությունն արդեն գիտեր, որ վարչապետի նստավայրում լոքդաունի ժամանակ այնքան են խմել, որ նույնիսկ գինու համար հատուկ սառնարան են բերել ամենշաբաթյա «հարբած ուրբաթների» համար։ Daily Mirror թերթը հրապարակել է այդ սառնարանի լուսանկարը՝ մանրամասնելով, որ դրանում կա 34 շիշ ալկոհոլ։

Մեկ այլ հրատարակություն՝ The Telegraph-ը, հունվարի վերջին հաղորդում էր Դաունինգ Սթրիթում տեղի ունեցած ևս մի տհաճ միջադեպի մասին: Պարզվում է, որ 2021 թվականի ապրիլի 16-ին՝ արքայազն Ֆիլիպի հուղարկավորությունից անմիջապես առաջ, Ջոնսոնի աշխատակիցները մի ամբողջ ճամպրուկ ալկոհոլ են  բերել նստավայր՝ անմիջապես խմելու։ Վարչապետի խոսնակը շտապել է ասել. «Ցավալի է, որ դա տեղի է ունեցել համազգային սգո ժամանակ։ Դաունինգ սթրիթը ներողություն է խնդրում թագավորական պալատից»։

Բայց խնջույքը, ամենայն հավանականությամբ, ինքնաբուխ չի եղել։ Քննիչները պնդում են, որ «գինարբուք-միջոցառումները» անգամ նշված են եղել Դաունինգ Սթրիթի աշխատակիցների էլեկտրոնային օրացույցներում: Նույնիսկ հստակ ժամ է եղել սահմանված՝ երեկոյան չորսից մինչև առավոտյան յոթը։

Վարչապետի նախկին ավագ խորհրդական Դոմինիկ Քամինգսը, ասել է, որ պատրաստ է երդվել, որ Ջոնսոնին զգուշացրել է ալկոհոլային խնջույքներ կազմակերպելու վտանգի մասին։ Վարչապետը դիվանագիտորեն պաշտպանվում էր. «Կատարվածի ամբողջ պատասխանատվությունը ես եմ կրում, բայց ոչ ոք չի ասել, որ այս ամենը  հակասում է կանոններին»։

Մամուլը կառավարության ղեկավարին դատապարտում է առնվազն տասը «գինու ուրբաթ» կազմակերպելու համար:

Լրագրողների ուշադրությունից չի վրիպել այն փաստը, որ 2020 թվականի հունիսի 19-ին, երբ ամբողջ Մեծ Բրիտանիայում սկսվել էր առաջին լոքդաունը,  Ջոնսոնն իր ծննդյան օրը նշել է մեծ  ընկերական կազմով: Մինչդեռ հազարավոր  բրիտանացիներ, նրանց թվում նաև թագուհին զոհաբերում էին իրենց հավաքույթները՝ հանուն անվտանգության: «Կանոնները կարծես թե չէին վերաբերում Ջոնսոնին», -գրում էին սոցցանցերի օգտատերերը։

Վարչապետի աշխատակազմը ստիպված է եղել խոստովանել, որ կառավարության պաշտոնյաները հավաքվել են Դաունինգ սթրիթի գրասենյակում և տոնի հերոսին դիմավորել ծննդյան տորթով։ Բայց նրանք, իբր, երկար չեն տոնել, իսկ ինքը՝ Ջոնսոնը, մնացել է այնտեղ ընդամենը տասը րոպե։

Սկանդալից անմիջապես օգտվել են հակառակորդները: «Սյու Գրեյի զեկույցը պետք է հրապարակվի որքան հնարավոր է շուտ և առանց կրճատումների: Ոչ մի խմբագրում, ոչ մի կրճատում»,- պնդում էր Լեյբորիստական ​​կուսակցության առաջնորդ սըր Քիր Սթարմերը: Իսկ Ուոթերգեյթի նմանությամբ գինու երեկույթները նա անվանել է party-gate:
Վարչապետի խոսնակը պատասխանել է՝ Գրեյի բացահայտումները կհրապարակվեն։