Մտավախություն ունե՞ք, որ որոշ ուժեր, կաբինետ չներկայացնելով, ավելի մեծ առավելություն կունենան. Սերգեյ Բագրատյանը՝ Խոսրով Հարությունյանին

ԱԺ «Ծառուկյան» խմբակցության անդամ Սերգեյ Բագրատյանը հուլիսի 24-ին խորհրդարանում Ընտրական օրենսգրքի քննարկման ժամանակ անդրադարձավ ՀՀԿ խմբակցության անդամ Խոսրով Հարությունյանի առաջարկին, այն է՝ ընտրություններին մասնակցելիս քաղաքական ուժերը պետք է ներկայացնեն իրենց կառավարության կազմը:

«Դուք կարող եք դա կիրառել ձեր կուսակցությունում, ներկայացնել ձեր կաբինետը: Հնարավո՞ր է, որ մտավախություն ունեք, որ այսօրվա պայմաններում կան քաղաքական ուժեր, որոնք, կաբինետը չներկայացնելով, ավելի մեծ առավելություն են ունենում, դիցուք՝ հանրապետականի նկատմամբ, և այս տեխնոլոգիան նպատակ ունի չեզոքացնելու այդ առավելությունը: Իսկ հնարավո՞ր է, որ նախընտրական մրցապայքարում չարդարացնեն նշված նախարարներից 5-10-ը, հանրությունը հիասթափված զգա, որ կառավարությունը փոխում է նշված նախարարներին»,- ասաց նա:

Բագրատյանը հետաքրքրվեց՝ այդ պարագայում կարո՞ղ է հանրության մոտ հարց առաջանալ, որ իրեն խաբել են, ներկայացրել են հայտնի մասնագետների, հետո փոխել կազմը: Պատգամավորը նաև հարց ուղղեց՝ արդյոք կոալիցիոն կառավարություն կազմելիս խնդիր չի՞ առաջանա, որ ավելի բարձր քվե ունեցող քաղաքական ուժը պարտադրի ավելի քիչ քվե ունեցող ուժին՝ եթե ուզում են կոալիցիայի մաս դառնալ, պետք է զբաղեցնեն երկրորդական պաշտոններ, քանի որ ինքն իր կաբինետը ներկայացրել է:

Հարությունյանն արձագանքեց՝ նշելով, որ սա առաջարկ է, որը հնարավորություն է տալիս ձևավորել որակյալ քաղաքական համակարգ: Պատգամավորը հորդորեց առաջարկը չկապել պահի հետ, տեղեկացրեց, որ ինքն այս առաջարկով հանդես է եկել դեռ 2001-ին:

«Ես մշտապես եղել եմ այն կարծիքին, որ նման առաջարկը այդ կուսակցությանը դարձնում է ավելի պատասխանատու: Սա տեխնոլոգիա չէ, համակարգաստեղծ առաջարկ է, որը օգտակար է բոլոր քաղաքական կուսակցությունների համար: Կուսակցությունը կարող է մերժել այն, իհարկե դա չի կարող պատճառ դառնալ, որ այդ ուժը չմասնակցի ընտրություններին, բայց դա նրան կդնի անհավասար պայմանների մեջ, որովհետև ապագա պոտենցիալ գյուղնախարարների դեբատներ կլինեն, այդ կուսակցությունից մարդ չի մասնակցի»,- ասաց նա:

Հարությունյանն ասաց, որ ՀՀԿ-ն մի քանի անգամ կոալիցիոն կառավարություն է կազմել, ապա հիշեցրեց՝ պորտֆելների բաժանումն ինչ սկզբունքով էր լինում, օրինակ՝ կրթության ոլորտը վստահում են դաշնակցությանը, որովհետև նրա ծրագրում կրթական բարեփոխումներն ավելի լավն են, այսինքն՝ հաշվի էին առնում ոչ թե՝ ով որտեղ ինչ մասնագետ ունի, այլ թե որ կուսակցության, որ ներկայացուցիչը այդ ոլորտում հանրության սպասելիքները կարող է բավարարել:

Պատգամավորը հետաքրքրվեց՝ արդյո՞ք կա հնարավորություն մեկին ներկայացնել նախընտրական մրցապայքարում, մյուսին՝ նշանակել: Նա նշեց՝ եթե մեկին ներկայացրել են որպես գյուղնախարարի, սակայն հետո կառավարության կազմում նրան չեն ներառում, ապա դա անհասկանալի կլինի: Եթե տվյալ նախարարը ձախողել է աշխատանքը, ապա կուսակցությունը հայտարարությամբ հանդես գա, իսկ եթե նման նախարարների թիվը շատ լինի, ըստ Հարությունյանի՝ այդ կուսակցությունը հաջողություններ դժվար թե արձանագրի: ՀՀԿ խմբակցության պատգամավորը նաև ասաց՝ իր ցուցակը կազմելիս ցանկացած ուժ վստահաբար կմտածի նաև փոխարինողների մասին: Նա հիշեցրեց՝ ժամանակին հանրությանը հետաքրքիր էր ընտրություններին մասնակցող կուսակցությունների ցուցակի առաջին եռյակը, հետագայում արդեն՝ ոչ միայն եռյակը, այլ 10-րդը, 40-րդը, թե ով որ տեղում է, ցուցակն ինչ տրամաբանությամբ է կազմված, արդյո՞ք այնտեղ հանրության համար հասկանալի, որոշումներ կայացնելու ունակ անհատներ են:

Բագրատյանը, դիմելով Հարությունյանին, նշեց.

«2001-ից ունեցել ենք 4 ընտրություն, բոլորում էլ ՀՀԿ-ն իշխանության է եղել, ինչո՞ւ այս առաջարկը չի ընդունվել մինչ այս պահը: Համաձայն եմ, որ այն ունի ներկուսակցական մշակույթը բարելավելու խնդիր, այդ մոտիվացիան հաստատ կա, բայց մյուս կողմից՝ եթե կարող են լինել կուսակցություններ, որ այս առաջարկը չընդունեն, այն պարտադիր նորմ չի համարվելու, ի՞նչ իմաստ ունի այն ընդունել ընտրական օրենսգրքում»:

Հարությունյանը խորհուրդ տվեց առաջարկը դարձնել քննարկման թեմա՝ հաշվի չառնելով՝ ովքեր են դեմ, ովքեր են կողմ դրան: