Գյումրիի տեղական որոշ տուրքերի դրույքաչափերը նոր տարում կավելանան

2022 թվականին, 2021-ի համեմատ՝ Գյումրիի տեղական բյուջեի սեփական եկամուտների հավաքագրումն ավելին կլինի։ Սա կանխատեսում է, որը հիմնված է կոնկրետ հաշվարկների վրա, որոնց հիմքում տեղական տուրքերի դրույքաչափերի ավելացումն է։ Ամեն տարեվերջին ավագանու հաստատմանն են ներկայացվում հաջորդ տարվա տուրքերի դրույքաչափերը։ Որոշ տեղական տուրքերի դրույքաչափերն ավելացել են։ Խոսքը, մասնավորապես, վերաբերում է շինթույլտվությունների, արտաքին գովազդի, աղբահանության և թանգարաններ մուտքի վարձավճարներին։ Արդյունքում սեփական եկամուտների աճը կկազմի մոտ 2 տոկոս։

Կառուցապատման համար ծախսերը սկսվում են շինթույլտվությունից։ Ինչքան մեծ է կառուցվող շինությունը, այնքան թանկանում է շինթույլտվության համար սահմանված տուրքը։ Տեղական տուրքը հունվարի 1-ից կկրկնապատկվի կամ կեռապատկվի՝ կախված կառուցվող շինության զբաղեցրած մակերեսից։

Թանկացման հիմնավորումը տեղական բյուջեի մուտքերի ավելացումն է։ Իսկ մեծ շինություններ կառուցողները թեև շատ չեն, բայց, ըստ Գյումրիի քաղաքապետարանի ֆինանսատնտեսագիտական բաժնի պատասխանատուի, ֆինանսապես ի վիճակի են վճարել տեղական տուրքի սահմանված չափը։

«500-1000 քառակուսի մետր մակերեսով շենք-շինությունների համար օրենքով սահմանված 50 հազար դրամ դրույքաչափին կիրառել ենք 2 գործակից։ 1000-3000 քառակուսի մետրի համար կիրառվել է 3 գործակից, 50 հազար դրամ տեղական տուրքը կդառնա 150 հազար դրամ, իսկ 3000 քառակուսի մետրից ավելի մակերես ունեցող շինությունների համար նույնպես կիրառվել է 3 գործակից, 100 հազար դրամ տուրքը կդառնա 300 հազար։ 3000 քառակուսի մետրից ավելի մակերես զբաղեցնող շենքերը շատ չեն, դրանք թանկարժեք շինություններ են, և տեղական տուրքի ավելացումը կառուցապատողի համար էական փոփոխություն չի լինի, բայց քաղաքի բյուջեի համար 5-6 մլն դրամի լրացուցիչ մուտքեր ենք նախատեսում»,- SHANTNEWS-ին ասել է Գյումրիի քաղաքապետարանի ֆինանսատնտեսագիտական բաժնի պետի ժամանակավոր պաշտոնակատար Մենուա Մկրտչյանը։

Լրացուցիչ մուտքեր կապահովվի նաև աղբահանության վճարներից, որոնք հաջորդ տարվա սկզբից կթանկանան իրավաբանական անձանց համար։ Թանկացումը վերաբերում է արտադրական կառույցներին։ Կոմունալ ծառայության աշխատանքի ծավալներն ավելացել են, հետևաբար և, ծախսերը կավելանան։

Արտաքին գովազդի համար հարկվող գումարի չափը ևս կավելանա։ Մեկ քառակուսի մետր գովազդային պաստառի համար քաղաքի բյուջե ամսական կգանձվի 1500 դրամ։

Պահանջարկից կախված գնային փոփոխությունը կիրառելի է դարձել նաև Գյումրիի թանգարանների համար։ Այցելուների պակաս չունեն՝ ամռանն անգամ հերթեր էին։ Վերլուծությունները ցույց են տվել, որ թանգարանների մուտքի վճարները ոչ կտրուկ, բայց կարելի է ավելացնել։

«Թանգարանների պահանջարկը մեծ է, այցելուները շատ են և վերանայել ենք թանգարանների տոմսերի գները։ Նախկինում մշտական այցելությունները դպրոցականների, ուսանողների և թոշակառուների համար եղել է 200 դրամ, հիմա կդառնա 300 դրամ, մշտական այցելուների համար 400 դրամը կդառնա 700 դրամ և օտարերկրացիների համար սահմանվել է 1000 դրամ»,- ասել է Մենուա Մկրտչյանը։

Թանգարանների ֆինանսավորման մեխանիզմն այսպիսին է՝ հավաքագրված գումարները մուտքագրվում են տեղական բյուջե, հետո անհրաժեշտ չափով գումար է հատկացվում յուրաքանչյուր թանգարանի։ Ինչքան հավաքագրումները շատ են, այնքան թանգարանում ծրագրեր իրականացնելու հնարավորություններն են մեծ։ Իսահակյանի տուն-թանգարանում անհրաժեշտություն է շուրջօրյա ջեռուցումը։ Ֆինանսական միջոցները չեն բավականացնում, այն ցուցասրահները, որտեղ բանաստեղծի անձնական իրերն են, չեն ջեռուցվում։

Մուտքավճարների թանկացումից ստացվելիք հավելյալ գումարները, ըստ անհրաժեշտության, կտնօրինվեն թանգարանների կարիքների համար։ Ընդհանուր առմամբ՝ սեփական եկամուտների հավաքագրման ավելացման հաշվին Գյումրիի բյուջեի եկամուտների շուրջ երկու տոկոսանոց աճ է կանխատեսվում։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։