Ինձ համար խայտառակություն կլինի, եթե ՀՀ-ում ունենանք քաղբանտարկյալներ. Նիկոլ Փաշինյան

Հայաստանում բոլոր քննչական մարմինները, բոլոր իրավապահները գիտեն՝ համոզվել են, որ որևէ գործի քննության համար չկա որևէ սահմանափակում: Այս մասին հուլիսի 20-ին լրագրողների հետ հանդիպմանը հայտարարեց ՀՀ վարչապետ Նիկոլ Փաշինյանը: Նա նշեց՝ չի լինելու քրգործ, որը քաղաքական որոշմամբ կանգնեցվի, և սրանով ամեն ինչ ասված է, բայց նաև չի լինելու այնպիսի քրգործ, որը վարող քննիչի դերում հայտնվի ՀՀ վարչապետը:

Լրագրողները հիշեցրին, որ ՀՀ երկրորդ նախագահ Ռոբերտ Քոչարյանը պատրաստակամություն է հայտնել գալ և հարցաքննվել Մարտի 1-ի գործով, ապա հետաքրքրվեցին՝ ո՞րն է նրա ինքնավստահության պատճառը, արդյո՞ք Սահմանադրությամբ իմունիտետ ունի:

«Ես չեմ կարծում, թե որևէ մեկը, այդ թվում՝ Ռոբերտ Քոչարյանը, Սահմանադրությամբ բացարձակ իմունիտետ ունի, եթե պարզվի, որ նրան մեղադրանք առաջադրելու հիմք կա: Դա թյուրընկալում է, թյուրըմբռնում, իրավաբանները պետք է խոսեն, բայց ես այնքան էլ վստահ չեմ, որ դա ճիշտ ընկալում է, մնացածը քննչական մարմինների գործն է: ՀՔԾ նոր պետին ներկայացնելով՝ ես հստակ ասել եմ այն խնդիրները, որ դրված են ՀՔԾ առաջ, դրանց մեջ կարևորագույն տեղ ուներ Մարտի 1-ի դեպքերի ամբողջական քննությունը ու բացահայտումը»,- ասաց նա:

Փաշինյանն ուրախությամբ հայտնեց, որ այստեղ լրջագույն տեղաշարժեր կան, հույս հայտնեց՝ դրանք լրջագույն արդյունքների կբերեն: Վարչապետը, սակայն, ընդգծեց՝ կարևոր է համարում, որ նախաքննությունն ընթանա բոլոր հնարավոր ներգրավված անձանց իրավունքների և ընդհանրապես օրինականության բացարձակ պահպանությամբ:

«Սա իսկապես շատ կարևոր է: Ես սա ասում եմ ոչ միայն որպես ՀՀ վարչապետ, այլև որպես վարչապետ, որը նախկինում ՀՀ-ում եղել է քաղբանտարկյալ: Ինձ համար կլինի մեծագույն խայտառակություն, եթե ՀՀ-ում մենք ունենանք քաղբանտարկյալներ: Մենք չենք ունենա քաղբանտարկյալներ, բայց որևէ քրգործ չի կանգնելու՝ որևէ անձով պայմանավորված: Ցանկացած անձ, ում քրեական պատասխանատվության ենթարկելու համար օրենքով բավարար հիմքեր կլինեն, կենթարկվի պատասխանատվության»,- նշեց վարչապետը:

Փաշինյանը տեղեկացրեց, որ ՀՔԾ-ից իրեն չեն հրավիրել հարցաքննության: Վարչապետից հետաքրքրվեցին նաև՝ արդյո՞ք դժվար է հայտնաբերել պաշտպանության նախկին նախարար Միքայել Հարությունյանին, որը պետք է հարցաքննվի Մարտի 1-ի գործով, և որը հետախուզման մեջ է:

«Իրավապահները դեռ նոր են նրան մեղադրանք առաջադրել. ես շատ մանրամասներով տեղյակ չեմ այդ գործողություններին՝ ինչ են անում: Ես ուղղակի համոզված եմ, որ իրենք իրենց աշխատանքը պատշաճ կանեն, բոլոր միջոցները կձեռնարկվեն»,- ասաց նա:

Վարչապետին տեղեկացրին, որ Մարտի 1-ի զոհերի հարազատները ցանկանում են հանդիպել նրա հետ, հետաքրքրվեցին՝ պատրաստվո՞ւմ է նրանց հետ հանդիպել:

«Մարտի 1-ի զոհերի հարազատների հետ, իհարկե, կհանդիպեմ, հուսով եմ՝ այդ հանդիպումը տեղի կունենան այնպիսի պայմաններում, երբ մենք ինչ-որ արդյունքներ արձանագրած լինելու մեջ համոզված կլինենք, չնայած այդ հանդիպումը կարող է լինել ցանկացած պահի, բոլորի հետ լավ հարաբերություններ ունենք»,- ասաց նա:

Փաշինյանը խոստացավ, որ նման հանդիպում կկազմակերպեն: