Սննդաբաններն անվանել են առողջության համար օգտակար ըմպելիքները

Ամերիկացի սննդաբանները պատմել են, թե ինչ ըմպելիքներ է հարկավոր խմել ավելի հազվադեպ հիվանդանալու և իմունային համակարգն ամրապնդելու համար։ Лента պարբերականի փոխանցմամբ՝ սննդաբանների խորհուրդը հրապարակել է Eat This, Not That! հարթակը։

Առողջ ըմպելիքների թվում մասնագետները նշել են մաքուր ջուրը, կեֆիրն ու մածունը, բուսական և կանաչ թեյը։ Նրանք խորհուրդ են տվել սովորական թեյին ավելացնել կիտրոն և կոճապղպեղ, ինչպես նաև դիտել ուշադրություն դարձնել խնձորի սիդրին և հատապտղային սմուզիներին:

Սննդաբաններն առաջին հերթին խորհուրդ են տալիս ամեն օր խմել բավարար քանակությամբ հեղուկ։

«Ջուրն օգնում է մաքրել օրգանիզմը և թթվածնով հագեցնել արյունը: Բացի այդ, ջուրը մասնակցում է ավշի արտադրությանը, որն ամբողջ օրգանիզմով տեղափոխում է արյան սպիտակ բջիջները և իմունային համակարգի բջիջները, իսկ դա օգնում է ճիշտ պայքարել բակտերիաների և վիրուսների դեմ», – ասում է սննդաբան Իսա Կույավսկին:

Նրա գործընկեր Քերի Լեմը խորհուրդ է տալիս ուշադրություն դարձնել բուսական թեյերին, առաջին հերթին՝ խատուտիկի կամ մասուրի թեյին: Առաջինն օգնում է օրգանիզմից հեռացնել տոքսինները, իսկ երկրորդը պարունակում է վիտամին C, կվերցետին, կատեխիններ և էլագիկ թթու։ Այս նյութերն օգնում են մաքրել օրգանիզմը և պայքարել բորբոքային գործընթացների դեմ։ Այնուամենայնիվ, Լեմը խորհուրդ է տալիս նախքան բուսական թեյ խմելը խորհրդակցել բժշկի հետ:

Սննդաբան Ռեյչել Դայքմանը խորհուրդ է տալիս ամեն օրը սկսել կոճապղպեղով և կիտրոնով թեյով։ Նրա կարծիքով՝ այս ըմպելիքն օգնում է ինչպես բնածին, այնպես էլ ձեռքբերովի իմունիտետին ավելի արագ արձագանքել վարակին։

Դայքմանը նաև խորհուրդ է տալիս կանոնավոր կերպով խմել կեֆիր և մածուն: Նա բացատրել է, որ իմունիտետի աշխատանքը մեծապես կախված է ստամոքսաղիքային տրակտի առողջությունից, և դրա միկրոբիոմը պահպանելու լավագույն միջոցներից մեկը ֆերմենտացված կաթնամթերքի օգտագործումն է:

«Վերջին հետազոտությունները ցույց են տվել, որ պրոբիոտիկ պարունակող ֆերմենտացված սննդամթերքների օգտագործումը, ինչպիսին է կեֆիրը, բարելավում է մեր աղիքներում բնակվող մանրէների բազմազանությունը: Սա, իր հերթին, դրական է ազդում իմունային համակարգի վրա», – ասել է Դիքմանը:

Սննդաբան Հիդեր Հենքսը խորհուրդ է տալիս կանաչ թեյ խմել մեղրով և կիտրոնով։ Կանաչ թեյի մեջ պարունակվող միացությունները նպաստում են T-լիմֆոցիտների քանակի ավելացմանը, հետևաբար՝ իմունային համակարգի ամրապնդմանը։ Իրենց հերթին մեղրը և կիտրոնն օգնում են ուժեղացնել այս ազդեցությունը:

Սննդաբան Ջեֆ Հոնգը պնդում է, որ առողջության պահպանման համար խնձորի սիդրը ևս մեկ օգտակար ըմպելիք է, քանի որ այն պարունակում է վիտամին C և ունի հակամանրէային ազդեցություն։

Բացի այդ, կիվին և ելակը նույնպես հարուստ են վիտամին C-ով։ Ֆիթնեսի մարզիչ Ջեյմի Դիկին խորհուրդ է տալիս այս հատապտուղներով սմուզիներ պատրաստել՝ ավելացնելով կաթ, որը հարուստ է D վիտամինով, որը նվազեցնում է շնչառական վարակների վտանգը։