Շիրակի մարզի երեք գյուղերը սուբվենցիոն ծրագրով ամբողջությամբ կգազաֆիկացվեն 3 տարվա ընթացքում

Աշոցք խոշորացված համայնքի 3 գյուղերում՝ Բավրայում, Ղազանչիում և Սարապատում մեկնարկել են գազաֆիկացման աշխատանքները։ Աշոցքը գազաֆիկացման սուբվենցիոն հայտ էր ներկայացրել, որը հաստատվել է, և երեք գյուղերում ծրագիրը մեկնարկել է կառավարության 65 % և համայնքի 35 % համաֆինանսավորմամբ։

Հայաստանի հյուսիսում՝ Աշոցքում վառարանները տներից  չեն հանում տարին 12 ամիս։ 6 ամիս տաքանում են, մյուս 6 ամիսներին վառարանները կենցաղային հոգսերում են օգնում ։ Անփոխարինելի, այլընտրանքային, էկովառելիքն էլ աթարն է։ Դասավորում են վառարանների մոտ ու տան անդամներից մեկն էլ անպայման պետք է հսկի, որ կրակը չմարի։

Բնական գազին Բավրայում փոխարինում են պրոպանով լիցքավորված գազաբալոնները։ Գրեթե ամեն ամիս փող են տալիս լիցքավորման համար, արդյունքում ստացվում է, որ  տարեկան միայն խոհանոցում գազ ունենալու համար բավական մեծ ծախսեր են անում։

«Հաշվարկել ենք, որ բնական գազի պարագայում գյուղացիները տարեկան կտրվածքով տնտեսումներ կունենան։ Օրինակ՝ Բավրա գյուղի պարագայում հաշվարկները ցույց են տվել, որ ամբողջ գյուղի տնտեսությունները հանրագումարում տարեկան մոտ 7 մլն դրամի տնտեսում կունենան։ Հիմա ընդհանուր 60 մլն դրամի շինարարություն է իրականացվում, գազատարներ են անցկացվում։ 60 մլն-ից 27 միլիոնը համայնքի համաֆինանսավորումն է»,- SHANTNEWS-ին ասել է Աշոցք համայնքի ղեկավար Կարեն Մանուկյանը։

Ֆինանսական հաշվարկներից ելնելով էլ՝ Աշոցքի համայնքապետարանը որոշել է գազաֆիկացման սուբվենցիոն ծրագիր ներկայացնել։ Ընդգրկել են 3 գյուղ՝ Բավրան, Ղազանչին և Սարագյուղը։ Երեք գյուղերից միայն Ղազանչիում է խորհրդային տարիներին գազաֆիկացման ցանց անցկացվել, բայց կապույտ վառելիքը գյուղ չի հասել։ Նախկին ցանցի միայն մի մասն է պահպանվել, որը նոր ծրագրում օգտագործելի չէ։ Երեք գյուղերն ամբողջությամբ գազաֆիկացնելու համար, ըստ նախահաշվի, 270 մլն դրամ գումար կպահանջվի։ Նման հնարավորություն Աշոցքի տեղական բյուջեն չունի։ Որոշել են սուբվենցիոն ծրագրերով ու փուլային գազաֆիկացում կատարել։

«Ծրագիրը շարունակական է։ 3 տարում ենք ավարտելու։ Այս տարի երկաթի գնի 100 %-ով թանկացում տեղի ունեցավ։ Տարեսկզբից ուրիշ մասշտաբի աշխատանքներ էինք ծրագրել, բայց իրականության մեջ ստացանք ուրիշ։ Աշխատանքների ծավալները նվազեցին։ Ինչքան գումար պլանավորել էինք, այդ գումարի ավելի քիչ աշխատանք ունեցանք»,- ասել է Կարեն Մանուկյանը։

Գազաֆիկացման ծրագրին հատկացված գումարը մնացել է նույնը, բայց գնաճի հետևանքով աշխատանքների ծավալն է կրճատվել։ Ղազանչիում նախատեսված էր մեկ փողոցում գլխավոր գազատարն անցկացնել, բայց կարողացել են աշխատանքների միայն կեսն այս տարի կատարել։ Երեք գյուղերում գազաֆիկացումն ամբողջությամբ ավարտելու են 2023 թվականին։ Կապույտ վառելիքը գյուղացիներին կհասնի տնային միացումները կատարելուց հետո։ Ինչպես են դրանք արվելու, դեռ չեն քննարկել։ Համենայնդեպս, նախորդ տարիներին գազաֆիկացված համայնքներում տնային միացումները գյուղացիների հաշվին են եղել։