«Նոր Հոլիվուդի առաջնորդներ 2021» ցուցակում 3 հայ կա

Անգլիացի 3 հայեր այս շաբաթ ժամանցային արտադրության ոլորտում իրարանցում են առաջացրել: Նրանք հանրահայտ են դարձել Variety և The Hollywood Reporter  առաջատար  պարբերականների  տարեվերջյան  աղյուսակում առաջնորդների վարկանիշային  տեղեր գրավելու շնորհիվ:

Արամ Յակուբյանը, ով Netfilx-ի անիմացիոն ֆիլմերի տնօրենն է, ընդգրկվել է   Variety-ի «Հոլիվուդի 2021 թվականի նոր առաջնորդների» ցուցակում, որը հրապարակվել է հինգշաբթի։

Յակուբյանն  այժմ  ղեկավարում է  անկախ անիմացիոն ստորաբաժանումը, որը վերահսկում է  անկախ անիմացիոն  արտադրանքի աղբյուրը և մշակումը:

«Շարժապատկերը մեծ ազդեցություն ունեցավ ինձ վրա, երբ դեռ երեխա էի: Դա բացեց իմ աչքերը   և ցուցադրեց  շատ ավելի մեծ աշխարհ, քան ես կարծում էի,  թև տվեց  իմ երևակայությանը», – ասել է Յակուբյանը Variety-ին: «Երբ մեծացա, իմ  մտահորիզոնն ընդլայնվեց և սկսեցի նորովի գնահատել  անիմացիոն պատմությունները: Մեդիան անսահման հնարավորություն ունի պատմելու  հնարավոր ու անհնար  բոլոր զգացմունքների մասին»:

«Ժամանցային արտադրությունը զգուշորեն դեպի բնականոն հուն է շարժվում համավարակից հետո, առաջնորդների նոր սերունդը պատրաստ է ընդունել նորարարությունները: Այն մարդիկ, ում կարիերան զարգացել է Հոլիվուդի համար ամենասև օրերին, պատրաստ են դիմակայել մեկուսացման մարտահրավերներին, այդ թվում՝ տնտեսական անորոշությանը»,- գրում է պարբերականը:

Անցյալ շաբաթ The Hollywood Reporter-ը հրապարակեց իր «Next Gen 2021. The Hollywood Reporter’s 35 Rising Executives 35 and Under»-ը, որում ներառված էին Proximity Media-ի 34-ամյա համահիմնադիր Քև Օհանյանը և նրա  փաստաբան քույրը՝ 31-ամյա Ռամելան։

Որպես Amazon Studios-ի  խորհրդական՝ Ռամելա Օհանյանը փիլիսոփայություն է  սովորել, այնուհետև շարունակել  կրթությունը որպես իրավաբան, 2016 թվականին աշխատանքի է  ընդունվել որպես պրոդյուսերական փաստաբան Awesomeness TV-ում: Երբ ընկերությունը զանգահարեց հարցազրույց խնդրելու, նա արդեն երկու մրցակցային առաջարկ ուներ սեղանին:

The Hollywood Reporter-ին Ռամելան պատմել է, որ  կցանկանար աշխատել իր եղբոր՝ 2021 թվականի Next Gen-ի պատվավոր  անդամ Քև Օհանյանի հետ։ «Մենք յուրաքանչյուրս ինքնուրույն հաջողության հասանք այս  ոլորտում, բայց մենք կցանկանայինք մի օր միասին աշխատել», – ասել է նա:

Քև Օհանյանին The Hollywood Reporter-ը անվանել է «հազվագյուտ գործիչ, ով կարող է բանակցություններ վարել բիզնեսում և զարգացնել երկխոսությունը»:

Օհանյանը մեկնել է Սանդենս՝ իր նկարահանած ֆիլմերով (2013-ի Fruitvale) և գրած (2018-ի Searching) ֆիլմերով։

Երբ The Hollywood Reporter-ը նրան հարցրել է, թե ում հետ կցանկանար մեկ օրով  փոխանակել տեղերը, նա պատասխանել է՝ « Քրոջս  հետ կցանկանայի: Այդ դեպքում գուցե պարզեի, ի՞նչ  է  նշանակում լինել ծնողներիս սիրելին»: