17-ամյա գյումրեցի Աշխարհի չեմպիոնը պատրաստվում է 2022-ին մասնակցել ծանրամարտի երիտասարդների Եվրոպայի առաջնությանը

Հայկական ծանրամարտում  արժանի սերնդափոխություն է։ Վերջին  միջազգային  մրցաշարերից պատանի ու երիտասարդ  հայ ծանրորդները վերադառնում են հաղթանակներով։ Հերթական հաղթանակը  գրանցվեց հոկտեմբերի 5-12-ն անցկացված ծանրամարտի աշխարհի պատանեկան առաջնությանը, որտեղ  Հայաստանի հավաքականը ներկայացնում էին երեք ծանրորդներ։ Նրանցից  երկուսը գյումրեցիներ էին: Հայաստանի հավաքականի միակ ոսկե մեդալը նվաճեց 17-ամյա գյումրեցի ծանրորդ Ալեքսանդր Լազարյանը՝ իր բարձրացրած կիլոգրամներով մրցակիցների համար մնալով անպարտելի։ 61 կգ քաշային կարգում, մյուս գյումրեցի մարզիկը՝ 16-ամյա Ռաֆիկ Մինասյանը վաստակեց բրոնզե մեդալ:

Ալեքսանդր Լազարյանին առաջին անգամ ծանրամարտի մարզադպրոց է բերել պապիկը, երբ 13 տարեկան էր։ Տան մեծ հայրը ուղղորդել էր սպորտով զբաղվել զուտ կեցվածքն ուղղելու և լավ կազմվածք ունենալու համար։ Ալեքսը պրոֆեսիոնալ  սպորտով զբաղվելու նպատակ չի էլ ունեցել: Բայց կարճ ժամանակում գրանցում է անսպասելի արդյունքներ ու զարմացնում մարզիչներին:

«Ինքն ուներ  ողնաշարի հետ կապված խնդիրներ, բացարձակ չէինք պատկերացնում, որ կարող է Լազարյան Ալեքսանդրը աշխարհի չեմպիոն դառնար, ողնաշարի վրա աշխատանք տանելուց հետո ստացանք լուրջ արդյունք, էդ արդյունքները սկսեցինք արդեն ավելի շատ ամրապնդել, արդեն սկսեցինք մտածել լուրջ կիլոգրամների մասին»,- նշում է վաստակավոր մարզիչ Կարեն Կարապետյանը։

Անխնա մարզումների արդյունքներից առաջինը 3 տարի առաջ է գրանցել՝  2018 թվականին դարձել է ծանրամարտի պատանիների Հայաստանի չեմպիոն, հաջորդ տարի մասնակցել է Եվրոպայի առաջնությանն ու դարձել Եվրոպայի փոխչեմպիոն, որտեղ հրում վարժությունում գրանցած կրկնակի  ռեկորդները դեռ մնում են անգերազանցելի:

«Հրում վարժության ռեկորդը 139 կգ-ն էր, ես բարձրացրի 164 կգ ու սահմանեցի  երկու ռեկորդ, դրանք  մինչ օրս դեռ գերազանցված չեն»,- ասում է նորընծա աշխարհի չեմպիոն Ալեքսանդր Լազարյանը։

Ընդամենը մեկ շաբաթ առաջ էր, 89 կգ քաշային կարգում Ալեքսը երկամարտում 323 կիլոգրամ արդյունքով  աշխարհի չեմպիոնի կոչումը նվաճեց, մրցակիցների համար այդպես էլ մնաց անգերազանցելի։ Մինչև 17 տարեկանների ծանրամարտի Աշխարհի առաջնության ոսկե մեդալը այժմ նրա ձեռքում է։

Ընդամենը 4 տարի ծանրամարտով զբաղվող պատանին գրանցում է իր տարիքայինների խմբում անգերազանցելի արդյունք։ 17-ամյա մարզիկը  բարձրացրած կիլոգրամներով հաղթել է այն նույն ռուս և  երկու թուրք մարզիկներին, որոնց ամիսներ առաջ պարտվել էր Եվրոպայի առաջնությունում։

«Եվրոպայի  առաջնության ժամանակ երկու թուրք և ռուս մարզիկներին եմ պարտվել, իսկ աշխարհի առաջնությանը ես հենց նույն այդ երկու թուրք և ռուս մարզիկներին հաղթեցի ու արժանացա աշխարհի չեմպիոնի տիտղոսին, դա իմ համար հպարտություն էր»,- SHANTNEW.am-ի հետ զրույցում նշել է գյումրեցի չեմպիոնը։

Չեմպիոնի ընտանիքում վեց երեխա է մեծանում։ Հայրը պահեստազորի սպա է։ Նրանց դաստիարակությամբ զբաղվում է  մայրը, որն ազգությամբ ռուս է: Վեց երեխաներից 4-ը աղջիկ են, երկուսը՝ տղա: Քույրերի ու եղբայրների հետ գրեթե ժամանակ չի լինում զբաղվելու, մարզումներն ու հավաքները թույլ չեն տալիս։

Դպրոցական է, սովորում է 12-րդ դասարանում, մարզական քոլեջի աշակերտ է, դրա համար էլ բացակայություններին ըմբռնումով են մոտենում։ 2022 թիվը ևս մեծ առաջնությունների տարի է, մասնակցելու է մինչև 20 տարեկանների Եվրոպայի առաջնությանը, այս տարիքում նաև հնարավորություն կստանա Հայաստանը ներկայացնելու մինչև 20-23 տարեկանների աշխարհի առաջնությանը: Լազարյանը  հաջորդ տարվանից 89 կգ-ի փոխարեն հանդես կգա 96 կգ քաշային կարգում։