Սփյուռքահայ կամավորների խումբը Գյումրիում երիտասարդների համար ինտերակտիվ դասընթացներ է անցկացնում

«Դեպի Հայք» ծրագրով Գյումրիում կաշխատեն  Եգիպտոսից,Կանադայից, Լոս Անջելեսից, Շվեյցարիայից  ժամանած կամավորներ։ Նրանք  գյումրեցի երիտասարդների ու աշակերտների համար անցկացնում են օտար լեզվի կարողությունների զարգացման, կենսաբանության, մաթեմատիկայի ու երաժշտության դասընթացներ, այդ ընթացքում իրենց համար բացահայտում են նաև Գյումրին: Կամավորներն աշխատում են Գյումրիի երիտասարդական պալատում, որը դարձել է  սփյուռքահայերի ու գյումրեցիների շփման ակտիվ հարթակ։

Արմեն Կարիբյանը Գյումրի է եկել Շվեյցարիայից: Մայրը լիբանանահայ է, հայրը՝ եգիպտահայ: Գյումրեցի երեխաների հետ հաղորդակցվում է վարժ հայերենով: Օտար հողում հայեցի մեծանալու ու լեզուն պահպանելու գործում պարտական է ծնողներին, տանը խոսում են միայն հայերեն։

Արմենը մասնագիտությամբ կենսաբան- մաթեմատիկոս է, նոր է ավարտել բուհը։ «Դեպի Հայք» ծրագրով եկել է Հայաստան և  գյումրեցի դպրոցականներին կենսաբանություն է դասավանդում: Կիրառում է ինտերակտիվ դասավանդման մեթոդը։ Արմենը  երեխաներին  ներկայացնում է նաև  իր իսկ կատարած թեմատիկ ուսումնասիրությունների արդյունքները, դրանք  գործնականում  ցուցադրում է մանրադիտակի ոսպնյակի միջոցով:

Արմենը դասավանդում է նաև Շվեյցարիայում, զուգահեռ, դարձյալ  կամավոր, հրշեջի աշխատանք է կատարում։ Հաջորդ տարի ծառայության է անցնելու Շվեյցարիայի բանակում, խոստանում է ծառայությունից հետո նորից գալ Գյումրի։

«Ինձ համար միշտ հետաքրքիր էր Հայաստան գալը, իմ համար միշտ սիրտ ունիմ, սեր ունիմ Հայաստանի համար։ Ինձ այստեղ դուր եկավ ապրելակերպը, մարդոց հյուրընկալությունը, ուղղակի ես սիրահարվել եմ Գյումրիին, շատ լավ քաղաք է»,- ասում է Արմեն Կարիբյանը։

Ժիլբերտ Նազարին ծնվել ու մեծացել է Լոս Անջելեսում: Ծնողները իրանահայեր են: 30 տարի առաջ Թեհրանից տեղափոխվել  են Միացյալ Նահանգներ։ Հայաստանում եղել էր  6 տարեկանում։  23 տարեկանում վերադարձել է որպես կամավոր աշխատելու Գյումրիի երիտասարդների հետ։

Նոտաներից է սկսել ու հիմա արդեն իր գրած երաժշտական կոմպոզիցիաներն են խմբով նվագում: Գյումրեցի երիտասարդների հետ սիրողական  երաժշտական խումբ են ստեղծել, պատրաստվում են համերգի։ Նազարին երաժշտական կրթություն չի ստացել, ինքնուս է սովորել թմբուկների վրա նվագել: Դասավանդում է Լոս Անջելեսի դպրոցներում, նաև ստեղծագործում է։

«Եղավ հինգերորդ տարին, որ դպրոցներուն մեջ գործ ունիմ, երաժիշտներու խումբը, որ ունիմ դպրոցներուն մեջ ու մարշ են նվագում, դրանք իմ  գրած ստեղծագործություններս են։ Էստեղ որ եկա, 1-2 շաբաթ  մենակ նոտաներ եմ սովորեցրել, հետո ծափերով ռիթմը սովորեցին։ Ես էլ հայերենս ավելի կատարելագործեցի, որ նոր էի եկել Գյումրի, նախադասություն չէի կրնա սարքել, բառերը կիսատ էի խոսում, հիմի արդեն լրիվ հասկանում ու կխոսամ հայերեն»,- նշում է Ժիլբերտ Նազարին։

Արմենը, Ժիլբերտն ու երիտասարդական պալատում դասավանդող մյուս սփյուռքահայ երիտասարդներն իրենց կամավորական աշխատանքը Գյումրիում կավարտեն տարեվերջին, կվերադառնան  իրենց երկրներ։ Հաջորդ տարի սփյուռքահայ կամավորների նոր խմբի կընդունի Գյումրին։ Ոմանց համար Հայաստան վերադարձը «Դեպի Հայք»-ի  շնորհիվ դառնում է ընդմիշտ։