Դատախազը ներկայացրել է Մանվել Գրիգորյանի նկատմամբ քրեական հետապնդում հարուցելուն համաձայնություն տալու միջնորդագիրը

ԱԺ-ում ներկայացվել է Մանվել Գրիգորյանի նկատմամբ քրեական հետապնդում հարուցելուն համաձայնություն տալու միջնորդագիրը: Այն հրապարակել է ՀՀ գլխավոր դատախազ Արթուր Դավթյանը:

«ՀՀ ԱԺ պատգամավոր Մանվել Գրիգորյանի կողմից նախնանական համաձայնությամբ ապօրինի զենք, հրազեն, ռազմամթերք ձեռք բերելու և պահելու դեպքի առթիվ քրեական օրենսգրքի 235-րդ հոդվածի 2-րդ մասով ՀՀ վարչապետին առընթեր ՀՀ ԱԱԾ քննչական վարչությունում 2018 թվանակնի հունիս 18-ին հարուցվել է քրեական գործ: Քրեական դատավարության օրենսգրքի 53-րդ հոդվածի 2-րդ մասին 3-րդ կետով և 150-րդ հոդվածի 6-րդ մասով սահմանված կարգով՝ 2018  թվականի հունիսի 17-ին քրեական գործի նախաքննությունն իմ կողմից հանձնարարվել է ՀՀ Հատուկ քննչական ծառայությանը՝ միևնույն ժամանակ, հաշվի առնելով նշված քրեական գործի բարդությունը, մեծածավալ անհետաձգելի քննչական գործողություններ կատարելու անհրաժեշտությունը, քրեական դատավարության օրենսգրքի 53-րդ հոդվածի 2-րդ մասի 4-րդ կետով սահմանված կարգով Հատուկ քննչական ծառայության և ԱԱԾ-ի քննչական ծառայության ղեկավարներին իմ կողմից հանձնարարություն է տրվել խմբով կատարել քրեական գործի նախաքննությունը»,- ասել է գլխավոր դատախազը:

ՀՀ գլխավոր դատախազի խոսքով՝ արդեն իսկ ձեռքբերված տվյալներով հիմնավորվել է , որ Մանվել Գրիգորյանն ապօրինի կերպով ձեռք է բերել մեծ քանակությամբ հրազեն:

«Հունիսի 5-ից, ընտանիքի անդամների, ինչպես նաև այլ անձանց մասնակցությամբ սկսել է տեղափոխել, փոխադրել հրազեն հանդիսացող առարկաները տարբեր վայրեր՝ «մաքրելու» նպատակով: Այդուհանդերձ, հունիսի 16-ին, օրենքով սահմանված կարգով իրականացված խուզարկություններով, Մ. Գրիգորյանին պատկանող կամ նրա փաստացի տիրապետության տակ գտնվող առանձնատներում, ավտոմեքենաներում, շենքերում, շինություններում կատարվել են 6 խուզարկություններ, որոնց արդյունքում հայտնաբերվել և վերցվել են մեծ քանակությամբ նռնակներ, հակատանկային ականանետներ, տրոտիլային պայթաղյուսներ, ավելի քան 17.000 տարբեր տրամաչափի փամփուշտ, այլ ռազմամթերք ու հրազեն»,- ասել է գլխավոր դատախազը:

Դավթյանի ներկայացմամբ՝ խուզարկության արդյունքում, Մանվել Գրիգորյանի պատկանող տարածքներում հայտնաբերվել է նաև  71.760.000 ՀՀ դրամ, 80.000 ԱՄՆ դոլար, 67.350 եվրո, 246.500 ուկրաինական արժույթ:

«Բացի այդ, Արմավիրի մարզի Արշալույս գյուղի և Էջմիածին քաղաքի համապատասխան հասցեներում գտնվող շինություններում կատարված խուզարկությունների արդյունքում հայտնաբերվել է 33 տրանսպորտային միջոց, այդ թվում՝ «Ռոյս Ռոլս», «Տոյոտա Լանդ Կրաուզեր», «Մերսեդես», «Համմեր», «Ռենջ Ռովեր Սուպերչարջ», ինչպես նաև խորհրդային արտադրության՝ նաև կոլեկցիոն ավտոմեքենաներ, այդ թվում՝ զինվորական նշանակության տրանսպորտային միջոցներ»:

Գլխավոր դատախազի խոսքով՝ Արմավիրի մարզի Արշալույս գյուղի համապատասխան հասցեում կատարաված խուզարկությամբ՝ կենդանիներ պահելու համար առանձնացված հատվածում, հայտնաբերվել են Տավուշի մարզի Չորաթան գյուղի, Վերին Ծաղկավան գյուղի, Շիրակի մարզի Ախուրյանի, Երևանի մի քանի և Էջմիածնի դպրոցների աշակերտների և ուսուցիչների կողմից հավաքագրված գումարներով Ապրիլյան քառօրյա պատերազմի մասնակիցների համար որպես օգնություն ուղարկված մեծ քանակությամբ պարկերով և արկղերով սննդամթերք, բժշկական և հիգիենայի պարագաներ, դեղորայք, զինվորական նախշերով պայուսակներ, տուփերով ներքնաշոր:

Ավելի վաղ SHANTNEWS.am-ը հայտնել էր, որ  ԱԱԾ քննչական վարչությունում հունիսի 15-ին ՀՀ քրեական օրենսգրքի 235-րդ հոդվածի 2-րդ մասի հատկանիշներով հարուցված քրեական գործի նախաքննությամբ ձեռք բերված տվյալներով հիմնավորվել է, որ ԱԺ պատգամավոր, ԵԿՄ նախագահ Մանվել Գրիգորյանն, ապօրինի կերպով ձեռք բերելով մեծ քանակությամբ հրազեն, ռազմամթերք, պահել է դրանք իրեն պատկանող առանձնատներում, շինություններում, կամ փաստացի իր տիրապետության տակ գտնվող տարածքներում: