Կորոնավիրուսը և սպորտը. ի՞նչ իրավիճակ է մարզաշխարհում

Կորոնավիրուսը լարվածության մեջ է պահում նաև մարզական աշխարհը: Համաճարակը խաթարել է տարբեր մրցաշարերի բնականոն ընթացքը: Համաճարակի պատճառով հետաձգվել ու հետաձգվում են սպորտային բազմաթիվ խոշոր մրցաշարեր:

ՕԼԻՄՊԻԱԿԱՆ ԽԱՂԵՐ 

Անգամ աշխարհի ամենամեծ ու մասշտաբային սպորտային միջոցառման անցկացումն է հարցականի տակ: Չնայած միջազգային օլիմպիական կոմիտեն մարզիկներին կոչ է արել պատրաստվել խաղերին պլանավորվածի պես՝ Հունաստանում դադարեցվել է օլիմպիական ջահի փոխանցումավազքը: Պատճառն այն է, որ կրակը տեսնելու համար անսպասելիորեն մեծ բազմություն է հավաքվել, թեև իշխանությունները բազմիցս զգուշացրել էին բնակիչներին հեռու մնալ՝ կորոնավիրուսի տարածումը կանխելու համար: Ստացվում է, որ ութօրյա փոխանցումավազքը ավարտվեց 2-րդ օրը: Արդեն վառվող ջահը Հունաստանը կփոխանցի Տոկիոյի Օլիմպիական խաղերի կազմակերպիչներին մարտի 19-ին Աթենքի «Պանատինաիկոս» մարզադաշտում՝ առանց հանդիսատեսի: Իսկ Օլիմպիական խաղերը նշանակված են հուլիսի 24-ից օգոստոսի 9-ն ու կայանալու են Տոկիոյում:

ՖՈՒՏԲՈԼ

Օլիմպիական խաղերից բացի, այս տարի սպասվող մյուս մասշտաբային միջոցառումը ֆուտբոլի 2020 թվականի Եվրոպայի առաջնությունն է, որը նախատեսված է անցկացնել հունիսի 12-ից հուլիսի 12-ը, 12 քաղաքում: Նախնական տվյալներով` այն կարող է հետաձգվել ու անցկացվել 2021 թվականին: Ավելի հստակ` ՈՒԵՖԱ-ն կհայտարարի մարտի 17-ին` Եվրոպայի տարբեր երկրների ֆեդերացիաների հետ առցանց քննարկման միջոցով վերջնական որոշումը կայացնելուց հետո:

Մինչ այդ ՈւԵՖԱ-ն կորոնավիրուսի տարածման պատճառով արդեն անորոշ ժամանակով դադարեցրել է Չեմպիոնների լիգայի ու Եվրոպա լիգայի ընթացիկ մրցաշրջանի հանդիպումները: Դրանից առաջ խաղերը որոշ դեպքերում առանց հանդիսականի էին անցկացվում: Ավելի վաղ կորոնավիրուսի կանխարգելման նպատակով դադարեցվել էին եվրոպական մի շարք ազգային առաջնություններ ևս:  Սերիա Ա-ն, Լա Լիգան դադար են վերցրել: Անգլիայի Պրեմիեր լիգայի խաղերը ևս դադարեցվում են մինչև ապրիլի 3-ը: Կորոնավիրուսը պլանները խախտել է, շատերի երազանքի վրա՝ «քար գցել»: Ինչպե՞ս որոշել առաջնությունների հաղթողներին, հարցի պատասխանը ՈՒԵՖԱ-ում դեռ չունեն: Լիվերպուլը, որին երկու քայլ էր ընդամենը բաժանում չեմպիոնությունից, այն էլ վերջին երեսուն տարում առաջին անգամ, այդքան բաղձալի տիտղոսի ստանալը կասկածի տակ է: Չնայած սրան՝ թիմի գլխավոր մարզիչ Յուրգեն Կլոպը այսպես է արձագանքել.

«Ֆուտբոլը միշտ ամենակարևոր բանն է թվացել մեզ, բայց այսօր ֆուտբոլն ու ֆուտբոլային խաղերն ընդհանրապես կարևոր չեն: Չենք ցանկանում խաղալ դատարկ տրիբունաների ներքո ու չէինք էլ ցանկանում, որ մրցաշարերը դադարեին, սակայն եթե դա կօգնի գոնե մեկ մարդու առողջ մնալ, ապա մենք կանենք դա առանց որևէ հարցի: Ռիսկի մի՛ դիմեք, առողջությունն ամենակարևորն է»:

Կարևորության առաջնահերթությամբ պայմանավորված՝ Հայաստանի ֆուտբոլի ֆեդերացիան էլ կայացրել է որոշում՝ մինչև մարտի 23-ը դադարեցնել ֆեդերացիայի հովանու ներքո անցկացվող բոլոր մրցաշարերը: Հետաձգվեց նաև Հայաստանի հավաքականի նորանշանակ գլխավոր մարզիչ Խոակին Կապարոսի՝ մարտի 13-ին նախատեսված ասուլիսը: Իրավիճակը, սակայն, ավելի սուր է եվրոպական ակումբների պարագայում: Մադրիդի «Ռեալ»-ի բասկետբոլային թիմի խաղացողներից մեկի մոտ էլ, որի անունը չի հաղորդվում, կորոնավիրուս է հայտնաբերվել, ինչի պատճառով «Ռեալ»-ի թե՛ բասկետբոլային, թե՛ ֆուտբոլային թիմերի համար կարանտին է հայտարարվել: «Արքայական ակումբի» պաշտոնական կայքի հաղորդմամբ՝ ֆուտբոլային և բասկետբոլային թիմերը մարզվում են նույն մարզաբազայում և հենց այդ պատճառով է կարանտին սահմանվել նաև ֆուտբոլային թիմի համար: Բացի այդ, որոշում է կայացվել փակել ամբողջ մարզաբազան, և այնտեղ աշխատող անձնակազմի համար նույնպես կարանտին սահմանել: Մարզադաշտում տարբեր են ու հակառակորդներ, բայց այս դեպքում նույն իրավիճակում են: Բարսելոնան էլ չեղարկել է բոլոր միջոցառումները:

ՎԱՐԱԿՎԱԾ ՖՈՒՏԲՈԼԻՍՏՆԵՐ

Ֆուտբոլային հանդիպումները չեղարկվում են, զուգահեռ հայտնի դառնում մարզիկների անուններ, որոնց կորոնավիրուսը չի շրջանցել: Նրանց թվում են «Յուվենտուսի» պաշտպան Դանիելե Ռուգանին, «Արսենալի» գլխավոր մարզիչ Միկել Արտետան, «Չելսիի» կիսապաշտպան Քալում Հադսոն Օդոին, «Սամպդորիայի» հարձակվող Մանոլո Գաբիադինին, «Հանովերի» պաշտպան Թիմո Հյուբերզը, նույն թիմի խաղացող Ջեյմզ Հորնը և այլք: Մեկուսացվածների թվում է նաև արգենտինացի լեգենդար ֆուտբոլիստ Դիեգո Մարադոնան, քանի որ գտնվում է ռիսկային խմբում: Իսկ աշխարհահռչակ մեկ այլ ֆուտբոլիստ Կրիշտիանո Ռոնալդուն էլ դիմել է մարդկանց հոգատարության և ուշադրության կոչով` ընդգծելով, որ հիմա խոսում է ոչ որպես ֆուտբոլիստ, այլ որպես զավակ, որպես հայր և վերջապես մարդ, ով անհանգստացած է ողջ աշխարհի վրա ազդող զարգացումներով․

«Կարևոր է, որ բոլորս հետևենք Առողջապահության համաշխարհային կազմակերպության խորհուրդներին և իշխանություններին, թե ինչպես վարվել ստեղծված իրավիճակում։ Մարդկային կյանքի պահպանումը վեր է ամեն ինչից։ Իմ համերաշխությունն այն բոլոր մարդկանց, ովքեր պայքարում են վիրուսի դեմ, ինչպես իմ խաղընկեր Դանիելե Ռուգանին, և իմ անվերապահ աջակցությունն եմ հայտնում այն հիասքանչ բուժաշխատողներին, ովքեր, իրենց կյանքը վտանգելով, օգնում են ուրիշներին»,- հայտարարել է Ռոնալդուն:

ԸՄԲՇԱՄԱՐՏ ԵՎ ԾԱՆՐԱՄԱՐՏ

Կորոնավիրուսը կանգնել է նաև հունահռոմեական ոճերի մարզիկների ճանապարհին: 2020 թվականի Տոկիոյի օլիմպիական խաղերի համար Հունգարիայում և Բուլղարիայում անցկացվելիք ըմբշամարտի վարկանիշային մրցաշարերը նույնպես հետաձգվել են: Հնարավոր է նշած վարկանիշայինները կայանան մայիս և հունիս ամիսներին: Նույն իրավիճակում են նաև ծանրամարտիկները: Ապրիլի 2-ին Մոսկվայում նախատեսված Եվրոպայի առաջնությունը նույնպես հետաձգվել է:

Միմյանց օգնելու պատրաստակամությունը հիմա ազգություն ու ոլորտ չի ճանաչում, հակառակորդ լինելու գաղափարը հետին պլան է մղվել: Մարզաշխարհում դա ակնհայտ է, անկախ ամեն ինչից, սպորտն իր խաղաղասեր տարերքի մեջ է, թեկուզ կարանտինում: