Իմ դեմ նոր զրպարտություններ են տարածվում. Արամ Աթեշյան

Թուրքիայում լուրեր են տարածվել, թե Պոլսի պատրիարքական շրջանակները հայերին կոչ են անում, որ հունիսին սպասվող նախագահական ընտրություններին զորակցեն Թուրքիայի նախագահ Ռեջեփ Թայիփ  Էրդողանի կուսակցությանը:  Մասնավորապես նման մտահոգություն է հայտնել «Ակօս»-ի խմբագիր Բագրատ Էստուկյանը՝ մամուլին ասելով.

«Պատրիարքական շրջանակները կամ որոշակի համայնքային կառույցների շրջանակներ փառաբանում են Էրդողանին՝ նշելով, որ նրա նախագահության ժամանակ համայնքին վերադարձվեցին կալվածքներ, հետևաբար պետք է զորակցենք Էրդողանին: Այդպես են ասում նաև պատրիարքի փոխանորդ Արամ Աթեշյանը և համայնքային մի քանի առաջնորդներ, ինչպես Պետրոս Շիրինoղլուն և այլք: Բայց նրանք մեծ ազդեցություն դժվար թե ունենան»:

Լուրերը ճշտելու համար  SHANTNEWS-ը կապ հաստատեց Պոլսո Հայոց պատրիարքի փոխանորդ Արամ Աթեշյանի հետ: Վերջինս մեզ հետ զրույցում ասաց.

«Ըստ երևույթին նորից հայտնվել են մարդիկ, որոնք զբաղված են ստախոսությամբ: Վստահ կարող եմ ասել, որ համայնքում այդ առումով  ոչ մի ճնշում չի եղել,  ես ինքս ոչ մի խոսակցություն այս թեմայով չեմ ունեցել, ոչ մի հանդիպում չի եղել համայնքի ոչ մի ներկայացուցչի հետ, ոչ մի հաստատության, թաղային խորհրդի, հոգաբարձության, խնամակալության ներկայացուցչի կամ բարերարի հետ նման նյութեր չեն քննարկվել:

Այդ խոսակցություններն  ամբողջությամբ զրպարտություն են: Սփյուռքահայությանն իմ դեմ հանելու համար կրկին զրպարտություններ են կատարվում, քանի որ այլ կերպ չես կարող մեկանաբանել չեղած խոսակցություններն իրականության տեղ ներկայացնելը: Ընդհակառակը,  ես միշտ ասում եմ, որ յուրաքանչյուր մարդ ազատ է,  ում ուզում է, պետք է նրա օգտին էլ քվեարկի:  Ով ուզում է՝ քրդական կուսակցությանը թող քվեարկի, ով ուզում է՝ ազգայնամոլներին թող քվեարկի, ով էլ ուզում է՝ կրոնամոլներին թող քվեարկի,  ինձ ի՞նչ, ես ոչ մեկի ընտրությանը խառնվելու իրավունք չունեմ»:

Արամ արք. Աթեշյանից հետաքրքրվեցինք նաև, թե ընտրությունների արդյունքը արդյո՞ք կարող է մտահոգիչ լինել հայ համայնքի համար, ինչին ի պատասխան՝ ասաց.

«Առայժմ ամեն ինչ ընթանում է բնական հունով,  ոչ մի խնդիր չունենք, ամեն ինչ խաղաղ է, տեսնենք՝ ով պիտի հաղթի, մենք պիտի աշխատենք նրա հետ, լեզու պիտի գտնենք, քանի որ մեր համայնքի շահը այդ է պահանջում»: