Ո՞ր տարածքի վրա է ստեղծվելու Քուրդիստան պետությունը:

Իրաքյան Քուրդիստանի ղեկավար Մասուդ Բարզանին հայտարարել է, որ այս պահին Իրաքի կենտրոնական իշխանությունների հետ բանակցելու ոչինչ չկա: Հանրաքվեն քրդական տարածքներում անցկացվելու է սեպտեմբերի 25-ին: Մինչ այդ, քվերակությունն արդեն մեկնարկել է մի շարք երկրներում, դրան մասնակցում են այդ երկրներում բնակվող Իրաքի քաղաքացի քրդերը:

— Չինաստանում այս պահի դրությամբ արդեն ընթանում է հանրաքվեն՝ այնտեղ բնակվող քրդերի համար։ Վաղը հանրաքվեն կընթանա Եվրոպայում բնակվող քրդերի համար, իսկ արդեն երկուշաբթի օրը՝ Քուրդիստանի 7+1 նահանգներում, — լրագրողների հետ հանդիպմանը նշել է փորձագետ Կարեն Հովհաննիսյանը։

Թվում է, թե Քրդական ինքնավարության անկախության պայքարն այլևս անբեկանելի է, սակայն այդ պայքարի միայն սկզիբն է: Անկախությանը կողմ քվեարկածների հաղթանակի դեպքում քրդական իշխանությունը բանակցություններ պետք է սկսի Բաղդադի հետ՝ անկախություն հռչակելու վերաբերյալ: Ավելին, ներկայում նույնիսկ հստակեցված չէ, թե որ տարածքի վրա է անկախանալու քրդական համայնքը:

Վիճելի հիմնական հատվածը Քիրքուկն է, որն Իրաքի սահմանադրության համաձայն չի մտնում քրդական ինքնավարության տարածքի մեջ, սակայն փաստացի վերահսկվում է Քրդստանի զինված ստորաբաժանումների՝ Փեշմերգայի կողմից:

— Քիրքուկ նահանգը ապահովում է ամբողջ Իրաքի նավթային արտահանման 40 տոկոսը։ Ամբողջ այս անհանգստությունը կայանում է ոչ թե ազգային անվտանգության շահերից ելնելով, այլ նավթի այս պաշարին տիրանալու համար է, — նշել է փորձագետը։

Երկուշաբթի մեկնարկող հանրաքվեն անցկացվելու է Իրաքի հյուսիսում գտնվող բոլոր քրդաբնակ տարածքներում՝ անկախ նրանից՝ դրանք ինքնավարության կազմի մեջ մտնում են, թե ոչ: Սրա հետ կապված նաև հարց է առաջանում՝ ո՞ր տարածքի վրա է ստեղծվելու Քուրդիստան պետությունը:

Բուն քրդական ինքնավարությունը Իրաքի հյուսիսում գտնվող 40.000 քառակուսի կիլոմետր տարածքով մի հատված է: Սակայն ինքնավարության բանակը վերահսկում է ավելի մեծ տարածք, որի մեջ մտնում է նաև Քիրքուկը:

Ավելին, անկախության ձգտող քրդերը հավակնություն ունեն քրդաբնակ բոլոր տարածքների վրա: Եվ հենց սա է լինելու քրդերի և Բաղդադի կենտրոնական իշխանությունների սակարկության թեման:

Գարիկ Հարությունյան