«Թարգմանչաց տոն» գրական միջազգային փառատոնի վերջին օրն անցկացվել է Գյումրիում

«Թարգմանչաց տոնը» Գյումրիում նշելը կազմակերպիչները կարևորում են երկու պատճառով` մեկը, որ քաղաքի պատմամշակութային ժառանգությանը ծանոթանալու առիթ է, և այն, որ դասական հայ գրականության հանճարների ծննդավայրն այստեղ է:

Ռուսաստան, Լեհաստան, Վրաստան, Իրան, Կանադա… Այս երկրներից ժամանած գրականագետները 5-օրյա միջազգային  փառատոնի ընթացքում ներկայացրել են  իրենց հրատարակած  թարգմանչական գործերը: Հայ գրողները օտարազգի  ստեղծագործությունների, իսկ արտասահմանյան գրողները հայ գրականության թարգմանություններով են հանդես եկել:

Լեհ գրող Կալինա Իզաբելլա Զիոլան 7 գրքի հեղինակ է: Գրում է բանաստեղծություններ, պոեմներ ու արձակ ստեղծագործություններ: Մեկ տարի առաջ լույս է տեսել նրա «Երկխոսություն Հայաստան-Լեհաստան» գիրքը, որտեղ երկու երկրներում հրատարակված պոեզիայի անթոլոգիան է: Լեհ բանաստեղծուհին հայ գրողների ստեղծագործությունների  թարգմանությամբ սկսել է զբաղվել 10 տարի առաջ։ Փառատոնին իր թարգմանություններից ներկայացրել է Կոմիտասի գործերից ու իր բանաստեղծությունը Կոմիտասի մասին։

«Կոմիտասի գործերին ինձ ծանոթացրել է Գագիկ Դավթյանը: Երբ կարդում էր ստեղծագործությունները, շտապում էի գրի առնել, որ հետո դրանք թարգմանեմ  լեհերեն: Դու հանճարի գործն ես թարգմանում, այնտեղ ամեն բառ ու արտահայտություն պետք է ճիշտ ու դիպուկ լինի: Բացի թարգմանությունից, ես նաև Կոմիտասի մասին եմ գրել»,- SHANTNEWS․am-ի հետ զրույցում ասել է լեհ բանաստեղծուհին։

Հայ ժամանակակից գրողների հինգ տասնյակից ավելի ստեղծագործությունների  թարգմանությունների հեղինակ է։ Իսկ վրացի գրողներին ոգեշնչել է հայ գրականությունը նաև այն պատճառով, որ հայ դասականները ստեղծագործական կյանքի որոշ փուլ ապրել են Թիֆլիսում։ Վրաստանի գրողների միության անդամ Մաղվալա Գոնաշվիլին Հավլաբարում է մեծացել, պատմում է, թե իր գրական ստեղծագործական ուղին որտեղից է  սկսվել։

«Պապս էր պատմում, թե մեր հայկական թաղամասերից մեկում ինչպես են հավաքվել հայ գրականության դասականները: Հովհաննես Թումանյանի հիմնած «Վերնատուն» գրական ակումբում են անցել հայ գրականագետների անտիպ երկերի քննարկումները: Հետո արդեն Թումանյանի տուն-գիտամշակութային կենտրոնի ստեղծումը ինձ համար մեծ խթան հանդիսացավ՝ ուսումնասիրելու Հովհաննես Թումանյանի ստեղծագործությունները: Տնօրենը` Գայանեն, ինձ բառ առ բառ թարգմանել է Թումանյանի գործերը, որոնց հիման վրա ծնվել են իմ բանաստեղծությունները»,- ասում է Մաղվա Գոնաշվիլին:

Մինչև տարեվերջ լույս կտեսնի Մաղվալա Գոնաշվիլիի նոր գիրքը` նվիրված Հովհաննես Թումանյանի 150-ամյակին, գրքում և´ թարգմանություններ են, և´ բանաստեղծուհու նոր ստեղծագործությունները: Արտասահմանյան շատ գրողներ են հետաքրքրված ոչ միայն հայ դասականներով, նաև ժամանակակից գրականությամբ: Նրանց ստեղծագործությունները ճանաչելի դարձնելու, հանրայնացնելու ցանկություն ունեն շատերը։

Իրանահայ բանաստեղծ, թարգմանիչ Վարանդ Քիորքչյանը ցանկանում է արագ փոփոխվող աշխարհում գրական կյանքը ապրեցնել այնպես, որ չմոռացվեն հայ դասականները և նրանց կողքին չմոռացվեն ժամանակակից գրողները:

Այսօր գրական ասպարեզում կան գրողներ, որոնք քիչ են հայտնի, բայց ունեն արժեքավոր ստեղծագործություններ:

Գրական միջազգային փառատոնի վերջին օրը հայ և արտասահմանցի գրողների, թարգմանիչների համար Գյումրիում  ավարտվելու էր շրջայցով: Հյուրերին արդեն պատմել էին, որ այս քաղաքի պատմական միջուկում շատ բան ունեն տեսնելու: