Գյումրիի հիվանդանոցներում սուր շնչառական վարակներով դիմելիության աճ է գրանցվել

Սուր շնչառական վարակի H1N1 տեսակի վիրուսը հայտնաբերվել է Երևանում հոսպիտալացված մի շարք հիվանդների մոտ: Անգամ մահվան ելքով դեպք է գրանցվել: Վիրուսի ակտիվացումը, ըստ բժիշկների, սեզոնային բնույթ է կրում: Այդ մասին է վկայում նաև Գյումրիի հիվանդանոցների ծանրաբեռնվածությունը: Սուր շնչառական վիրուսներով դիմողների աճ կա Գյումրիի Մոր ու մանկան ավստրիական և Ինֆեկցիոն հակատուբերկուլյոզային հիվանդանոցներում, հայտնում է SHANTNEWS.am-ի թղթակիցը:

Առայժմ մարզի բուժհաստատություններում գտնվող հիվանդներին H1N1-ի հայտնաբերման համար լաբորատոր փորձաքննության ենթարկելու հանձնարարական չկա:

H1N1 կամ կամ խոզագրիպ անվանումով հայտնի սուր շնչառական վիրուսի այս տեսակը գլուխ է բարձրացնում ամեն ձմեռ: Այն սեզոնային է, բայց դա չի նշանակում, թե բոլոր հոսպիտալացվածների մոտ H1N1 է հայտնաբերվել: Բարձր ջերմություն, հազ, տենդ ու թուլություն… Այս ախտանշանները նույնն են սովորական հարբուխի ու խոզի գրիպի դեպքում: Բոլոր հոսպիտալացվածները նույն գանգատներով են դիմել: Ջերմությունը պահպանվել է մեկ շաբաթից ավելի, հազը՝ վերածվել բրոնխիտի ու թոքաբորբի: Մոր և մանկան ավստրիական հիվանդանոցի մանկական բաժանմունքում մահճակալները 30-ն են, հոսպիտալացվածները՝ 42-ը: Բաժանմունքը աշխատում է ծանրաբեռնված:

«Մեկ հիվանդասենյակում 5,6,7 երեխա է պառկած, բայց այլընտրանք չունենք, սա է բաժանմունքի հնարավորությունը: Ես չեմ բացառում, որ սովորական գրիպը, դու մի ասա, H1N1-է, որը լավացավ, գնաց տուն: Այնպես չէ, որ H1N1-ը դատավճիռ է: Ուղղակի վիրուսի տարածման ժամանակ վիրուսի այս տիպը հայտնաբերվում է կամ ոչ»,- SHANTNEWS.am-ի հետ զրույցում ասել է Գյումրիի մոր և մանկան ավստրիական հիվանդանոցի տնօրեն Աշոտ Կուրղինյանը:

Իսկ «Գյումրի» բժշկական կենտրոնում սուր շնչառական վիրուսներով համեմատաբար ավելի քիչ դիմողներ ունեն՝ հիմնականում սիրտ-թոքային խրոնիկ հիվանդություններով տառապողներն են, որոնք շնչառական վիրուսների նկատմամբ խոցելի են: Նրանց մոտ հարբուխը շատ արագ կարող է բարդանալ ու  վերածվել թոքաբորբի: Շնչառական սուր վիրուսներով հիվանդներին «Գյումրի» բժշկական կենտրոնից ուղեգրում են ինֆեկցիոն հիվանդանոց: Այստեղ ազատ հիվանդասենյակներ չկան: Հիվանդների մեջ մեծ թիվ են կազմում հղիները, որոնք նույնպես խոցելի խումբ են համարվում:

«Հիվանդները շատ են, պալատներում զույգել ենք հոսպիտալացվածներին: Մենք հրահանգ չունենք, որ Շիրակի մարզում հիվանդներին անպայման հետազոտության ուղարկենք: Երևանում հետազոտությունները կազմակերպվում են, բավական շատ քանակով անջատվել է H1N1 վիրուսը: Ըստ այդմ էլ հայտարարվեց, որ հանրապետությունում շրջանառության մեջ է H1N1-ը»,- SHANTNEWS.am-ի թղթակցին տեղեկացրել է Գյումրիի ինֆեկցիոն հակատուբերկուլյոզային հիվանդանոցի մեծահասակների բաժանմունքի վարիչ Կարինե Հովհաննիսյանը:

Ինֆեկցիոն հիվանդանոցում իրենց բաժանմունքներում հոսպիտալացվածների վիճակագրությամբ փաստում են, որ այս տարի սուր շնչառական վիրուսներով հիվանդների թիվն ավելացել է: Բայց առայժմ մարզերում H1N1-ը հայտնաբերելու համար ուսումնասիրություններ նախատեսված չեն: Վիրուսի տարածումը բժիշկները չեն պայմանավորում հարևան Վրաստանից ներթափանցմամբ: Ցուրտ եղանակը և հիվանդների մեկուսացման բացակայությունը համարում են օդակաթիլային վարակի տարածման հիմնական պատճառ: