Հայաստանի մարզերում 300 բժշկի կարիք կա

Այսօր կառավարությունում «ՀՀ-ում 2018-2019 ուստարվա պետության կողմից ուսանողական նպաստների ձևով ուսման վարձի լրիվ փոխհատուցմամբ անվճար, առկա ուսուցմամբ, ինտերնատուրայի և կլինիկական օրդինատուրայի ընդունելության տեղերը հաստատելու մասին» նախագծի քննարկման ժամանակ անդրադարձ է եղել մարզերում բժիշկների պակասին: ՀՀ առողջապահության նախարար Արսեն Թորոսյանը նշել է, որ Հայաստանի մարզերում բժիշկների մոտ 300 թափուր տեղ կա, իսկ ԱՆ-ի և ԿԳՆ-ի միջև կնքված պայմանագրի համաձայն՝ նրանք պարտավորվում են առնվազն 5 տարի աշխատել նույն տեղում:

«Կոչ եմ անում տեղական մարմիններին, որպեսզի աջակցեն այդ բժիշկներին, ովքեր գնում են մարզեր աշխատելու, որպեսզի նրանք մնան մարզերում և չուզենան ավարտելուց հետո վերադառնալ Երևան»,- ասել է Թորոսյանը:

ՀՀ կրթության և գիտության նախարար Արայիկ Հարությունյանը մատնանշել է Սկանդինավյան երկրների փորձը:

«Անկախ նրանից, թե դու ինչ տեղ ես զբաղեցրել օրդինատուրայում մեծ քաղաքներում աշխատանքի անցնելուց առաջ, դու սահմանային կամ ոչ քաղաքային բնակավայրերում պետք է որոշակի տարիների փորձ ունենաս հիվանդանոցներում աշխատելու»,- ասել է Հարությունյանը:

ՀՀ աշխատանքի և սոցիալական հարցերի նախարարը հետաքրքրվել է, թե ինչ է լինում այն դեպքում, եթե պայմանագիրը ստորագրում, բայց մարզային աշխատանքի չեն գնում։

«Նախորդ տարիներին գործել է կարգ, երբ գումարը վերադարձվել է, հիմա մենք, նաև քննարկումների արդյունքում, կարգ կսահմանենք, որով փոխհատուցումը շատ մեծ կլինի, եթե նրանք հրաժարվեն գնալ այդ նպատակային տեղերում աշխատանքը շարունակելու: Դա երկու կամ երեք անգամ ավել կլինի այն վարձից, որը պետությունն իր միջոցներով տրամադրում է անվճար ուսուցման համար»,- հավելել  է ՀՀ կրթության և գիտության նախարար Արայիկ Հարությունյանը:

Ըստ առողջապահության նախարարի՝ խրախուսման միջոցներն անհրաժեշտ է, որ շահագրգռություն էլ լինի մնալու և աշխատելու, ոչ թե դա անեն ստիպված, ելքեր մտածեն տեղափոխվելու: Ըստ Թորոսյանի՝ գումարները վերադարձրել է միայն 5 տոկոսը:

ՀՀ արդարադատության նախարարը հիշեցրել է, որ ժամանակին տարկետման իրավունքով խնդիրը լուծվում էր: Մարդիկ բանակում ծառայելու փոխարեն ուսուցիչ կամ բժիշկ էին աշխպատում մարզային հաստատություններում: Ի պատասխան ասվածին՝ ՀՀ պաշտպանության նախարար Դավիթ Տոնոյանն ասել է, որ այս ընթացքում մեկ հոգու է միայն այդպիսի հնարավորություն տրվել Մեղրիում ծառայելու համար ու այդ հնարավորությունը տրվել է մեծ դժվարությամբ:

Կառավարությունը միաձայն ընդունել է որոշումը՝ հաստատելով ուսանողական նպաստների ձևով ուսման վարձի լրիվ փոխհատուցմամբ անվճար, առկա ուսուցմամբ, ինտերնատուրայի և կլինիկական օրդինատուրայի ընդունելության տեղերը, որոնք այս տարի ավելի են նախորդ տարվա համեմատ: