Պուտինի մեծ ասուլիսի կարևոր շեշտադրումները. ՌԴ նախագահը հանդիպում է լրագրողների հետ

Ռուսաստանին հնարավոր չէ հաղթել: Հնարավոր է միայն ներսից քանդել: Նման հայտարարություն է արել ՌԴ նախագահ Վլադիմիր Պուտինը իր մեծ ասուլիսի ընթացքում:

Ուկրաինայի մասին

Անդրադառնալով  Ուկրաինային՝ նա ասել է, որ տպավորություն է, որ այնտեղ ռազմական օպերացիա են նախապատրաստում:

«Եվ մեզ չեն զգուշացնում՝ մի միջամտեք: Բայց մենք պետք է արձագանքենք»,- ասել է Պուտինը:

Ըստ նրա՝ այժմ տարածաշրջանում խնդրի կարգավորմանը խանգարում է Կիևի կողմից Մինսկի պայմանավորվածությունների չկատարումը: Կրակի դադարեցման և զորքը հետ քաշելու փոխարեն, Ուկրաինայում կենտրոնացել են սահմանին և ապստամբների վրա են կրակում:

Պուտինի խոսքերով՝ լարվածությունը ավելանում է ԱՄՆ-ի ակտիվությամբ, որը սպառազինություն է մատակարարում Ուկրաինային և զորավարժություններ անցկացնում Սև ծովում:

Ռուսաստանի անվտանգությունն ու  Արևմուտքի հետ հարաբերությունները

Անվտանգության երաշխիքների համակարգի թեմային անդրադառնալիս ՌԴ նախագահ Վլադիմիր Պուտինը նշել է, որ գնդակն այժմ Արևմուտքի ձեռքում է:

Հիշեցնենք, որ մինչ այս Ռուսաստանը ԱՄՆ-ին էր հանձնել ՆԱՏՕ-ի հետ հարաբերությունների և անվտանգության երաշխիքների մասին իր առաջարկները: Պուտինն այսօր մանրամասնել է այդ թեման և ասել, որ իրենք հստակ հարց են դրել, որ ՆԱՏՕ-ն ոչ մի դեպքում չպետք է ընդլայնվի դեպի արևելք:

«Մենք պետք է մտածենք մեր անվտանգության հեռանկարների մասին, թե ինչպես ապրել Ուկրաինայում տեղի ունեցողին հայացք գցելով»,- ասել է Պուտինը:

ՌԴ-ն մինչ այս անվտանգության համակարգերին առնչվող առաջարկներ ներկայացնելիս պահանջել էր չեղյալ հայտարարել 2008 թ-ի Բուխարեստի պայմանավորվածությունը, ըստ որի՝ Վրաստանը և Ուկրաինան կարող են  հավակնել ՆԱՏՕ-ի անդամ դառնալուն:

Պուտինը նաև հույս է հայտնել, որ ԱՄՆ-ի հետ հարաբերություններում բանակցությունները կառուցողական ուղով կընթանան:

 Ռուսաստան – Չինաստան հարաբերություններ 

Ռուսաստանի և Չինաստանի հարաբերությունները վստահելի են: Այդ մասին ասել է ՌԴ նախագահը՝ անդրադառնալով Չինաստանին վերաբերող հարցին:

«ՌԴ -ի և Չինաստանի փոխհարաբերությունները կայունացնող գործոն են միջազգային ասպարեզում»,- նշել է Պուտինը: 

Նաև երկու երկրները միասին զենք են մշակում:

«Ռուսաստանն ու Չինաստանը բարձր տեխնոլոգիական զենք են մշակում»,- ասել է Պուտինը: 

Ըստ ՌԴ նախագահի՝ Ռուսաստանը նաև պատրաստ է էներգակիրներ մատակարարել Չինաստանին նաև 2060 թ-ից հետո:

Կորոնավիրուսի դեմ պատվաստումների մասին 

ՌԴ նախագահը դժգոհ է երկրում կորոնավիրուսի դեմ պատվաստումների մակարդակից: Մասնավորապես, նրան չի գոհացնում հավաքական իմունիտետի ձևավորման մակարդակը:

«Մոտ 70 մլն մարդ առաջին պատվաստումն է արել, 70-ից մի քիչ ավելին՝ երկրորդը, բայց դա բավարար չէ»,- ասել է Պուտինը: