Ո՞վ է էդ թուրքը, որ գա և հարվածի իմ որդուն իմ արոտավայրում. բողոքի ակցիա՝ Ախալքալաքում

Այսօր Թորիա գյուղի բնակիչները բողոքի ցույց են անցկացրել Ախալքալաքի ոստիկանության շենքի դիմաց: Նրանք պահանջում են ազատել կալանավորված երիտասարդներին, որոնց դեմ դատարանն այսօր նախնական կալանքը որպես խափանման միջոց ընտրեց:

Հիշեցնենք, որ  օգոստոսի 23-ին Նինոծմինդայի շրջանի Թորիա գյուղի բնակիչների և Գարդաբանիի շրջանից ժամանած ազգությամբ ադրբեջանցիների միջև ծեծկռտուք գործով այսօր ՝ օգոստոսի 26-ին, Ախալքալաքի շրջանային դատարանում տեղի ունեցավ դատական ​​նիստ: 11 քաղաքացու որպես խափանման միջոց սահմանվեց նախնական կալանք 2 ամիս ժամկետով: 11-ից երեքը Թորիա գյուղի բնակիչներ են, ուոնց  մեկուսարան տեղափոխելու դեմ էլ կայացել է այսօրվա բողոքի ակցիան: Մինչ այդ, ակցիայի մասնակիցները սպասում էին դատարանի որոշմանը՝ հավատալով իշխանությունների խոստմանը, թե ձերբակալվածներին ազատ կարձակեն:

«Նինոծմինդայի քաղաքապետը մեզ խոստացավ, որ մեր տղաներին ազատ կարձակեն 48 ժամվա ընթացքում, բայց ինչպես տեսնում եք, նրանց ձերբակալել են… Մենք պահանջում ենք ազատել երիտասարդներին, քանի որ նրանք պաշտպանում էին անչափահասի: Հունձքի ժամանակ խնդիր է առաջացել, մեզ վրա են հարձակվել թուրքերը և ծեծի են ենթարկել անչափահասի»,- JNEWS- ին ասել է Ախալքալաքի շենքի դիմաց հավաքված ցուցարարներից մեկը:

JNEWS- ին տված հարցազրույցում ցույցի մասնակիցներն իրենց դժգոհությունն ու մտահոգությունն են արտահայտել շրջանում, մասնավորապես` արոտավայրերի շուրջ  ստեղծված իրավիճակի վերաբերյալ`իշխանություններից  պահանջելով լուծում:

«Տարածաշրջանում, բոլորը նշում են, որ թուրքերը ճնշում են նրանց: Այս խնդիրը լուծելու համար պետք է ակտիվացնել երկու շրջանները, հակառակ դեպքում, մեկ գյուղ ոչինչ չի փոխի: Ընտրությունների ժամանակ նրանք ասում են. «Որտե՞ղ են Թորիայի բնակիչները»: Հիմա թող գան ու պաշտպանեն: Բանդայի առաջնորդն ազատորեն շրջում է Նինոծմինդայի շրջանում, իսկ մեր տղաները ձերբակալվում են», – ասել է  Խաչատուր անունով ակցիայի մասնակիցներից մեկը:

«Որդիս դանակահարված է, թուրքը հարվածել է նրան: Ո՞վ է էդ թուրքը, որ գա և հարվածի իմ որդուն իմ արոտավայրում: Մենք գնացինք հնձելու մեր նախնիների հարյուրամյա հողերը: Թուրքն ասում է , թե մենք դրանք չպետք է հնձենք»,- ասել է մեկ այլ մասնակից:

Թորիա գյուղի բնակիչները լքել են Ախալքալաքի ոստիկանության շենքի տարածքը` պայմանով, որ 4-5 օրվա ընթացքում տղաները ազատ կարձակվեն, հակառակ դեպքում` նրանք այլ քայլեր կձեռնարկեին:

Հիշեցնենք, որ օգոստոսի 23-ին ծեծկռտուք է սկսվել Նինոծմինդայի քաղաքապետարանի Թորիա գյուղի բնակիչների և  շրջանում վերաբնակեցված ադրբեջանցիների միջև: Փաստն այն է, որ ադրբեջանցիները ոչխարներ են արածեցնում Թորիա գյուղի բնակիչներին պատկանող արոտավայրերում, գյուղացիները կենդանիներին հեռացնում են, որից հետո ծեծկռտուք է սկսվել, կան վիրավորներ և ձերբակալվածներ:

Վրաստանի ՆԳՆ-ն հետաքննություն է սկսել։