Անի խոշորացված համայնքի 17 գյուղի միակ ծննդաբերական բաժանմունքը փակվում է

Այս տարվա հոկտեմբեր ամսին Մարալիկի ծննդաբերական բաժանմունքը ունեցել է 18, նոյեմբերին՝ 8, դեկտեմբերի կեսերին` 5 ծնունդ։ Ամսական նվազումների կողքին Մարալիկի հիվանդանոցն այս տարվա ծնունդների թիվ  էլ է նշում` Անի խոշորացված համայնքի 17 գյուղերից իրենց մոտ 106 ծնունդ են ընդունել` անցած տարվա համեմատ 20-ով պակաս:

Ծնելիության ցուցանիշի նվազումը ամեն նախորդ տարվա համեմատությամբ է: 21 հազարից ավելի բնակչություն ունեցող Անիի տարածաշրջանում  ծնելիության ցածր ցուցանիշի պատճառը առաջին հերթին համարում են արտագնա աշխատանքը՝ մեկնում են, հետո ընտանիքներին տանում։

Բաժանմունքի  երկարամյա աշխատակիցը` տիկին Նարինեն, ասում է, որ ինքը 6 զավակ ունի, հարսներին էլ հորդորում է գոնե 3 երեխա ունենալ։ Իր խորհուրդ-հորդորները տալիս է նաև Մարալիկի ծննդաբերական բաժանմունք այցելող ծննդկաններին, բայց ինչպես իր հարսների դեպքում է, հետևորդներ չունի:

Ծնելիությունը նվազում է, միևնույն ժամանակ, Մարալիկի հիվանդանոց էլ քիչ են դիմում` Անիի տարածաշրջանից հղիները տեղափոխվում են Գյումրիի կամ Ախուրյանի ծննդատներ: Մարալիկի բժիշկները դրա պատճառներն էլ են հիմնավորում: Շատ գյուղերի հետ տրանսպորտային երթուղի չկա: Խնդիրը նոր չէ, տասնյակ տարիներ շարունակ 11 գյուղեր Մարալիկ հասնելու տրանսպորտ չունեն: Ընդամենը 4 մահճակալ ունեցող բաժանմունքը օրերով ծննդկաններ չի ունենում: Թերբեռնվածությունը հաշվի առնելով էլ առողջապահության նախարարությունը տարեսկզբին ծննդաբերական բաժանմունքին  ունեցած նվազագույն առաջին կարգից էլ են զրկել:

Ծնունդներ իրենց մոտ ընդունելու, տեղափոխելու բոլոր տարբերակները կիրառել են, բայց սա ելք չի համարվել բուժհաստատության լուրջ խնդիրները կարգավորելու: Նեղ մասնագետների պակասն այստեղ մեծ է: Ծնունդ ունենալու դեպքում մարզի այլ ծննդատներից են բժիշկների հրավիրում: Տարեսկզբին նախարարության արձանագրած թերությունները այժմ շտկել են, ձեռք են բերել նոր բուժսարքավորումներն, հիվանդասենյակներն են կոսմետիկ նորոգել, բայց դրանք չեն նպաստել իրավիճակի փոփոխությանը:

Առողջապահության նախարար Արսեն Թորոսյանը երկու օր առաջ Գյումրիում խնդրի առնչությամբ SHANTNEWS.am-ի թղթակցի հարցին իր պարզաբանումն է տվել և ներկայացրել հիմնավորումները, թե ինչու է անիմաստ Մարալիկի ծննդատան հետագա գործունեությունը:

«Իմաստ չկա, անկեղծ եմ ասում, շենքը վերանորոգվել է, բայց սարքավորումներով չի հագեցել։ Մարալիկի հեռավորությունը, եթե Գյումրիից նայեք, շատ հանգիստ ստացիոնար ծառայությունը կարող են մատուցել Գյումրիի համապատասխան հիվանդանոցներում։ Մարալիկում, ամեն դեպքում, ճիշտ կլինի, որ մնա առողջության պահպանում, ինչպես օրինակ` այլ փոքր բնակավայրերում, որտեղ հիվանդանոց չկա»,- մեր թղթակցի հետ զրույցում ասել է Արսեն Թորոսյանը։