Պարզ պատահականություն է, որ մինչև օրս Գյումրու ծննդատունը գոյատևում է. Արսեն Թորոսյան

Այսօր աշխատանքային այցով Գյումրիում էր առողջապահության նախարար Արսեն Թորոսյանը: Նա շրջայց է կատարել «Գյումրու մոր և մանկան ավստրիական հիվանդանոցում» և «Գյումրի» բժշկական կենտրոնում: Նախարարին ներկայացվել են բուժհասատատությունների խնդիրները և վերջին մեկ տարում ունեցած ձեռքբերումները: Իսկ քննարկման առանցքում նոր ծննդատան հարցն էր, որը Գյումրիում կառուցվելու է շվեյցարահայ բարերար Վարդան Սերմաքեշի ներդրումներով:

Արսեն Թորոսյանին ներկայացվել են, թե ինչ փուլում են նախագծային աշխատանքները, և ինչ ժամկետներում հնարավոր է ծննդօգնության մեկ կենտրոն ունենալ: Արսեն Թորոսյանը հայտարարել է, որ շենքի կառուցումը ենթադրում է Գյումրիի ծննդատան և «Գյումրու մոր և մանկան ավստրիական հիվանդանոցի» ծննդաբերական բաժանմունքի օպտիմալացում: Իսկ մինչ շենքի շահագործումը, հնարավոր է, Գյումրիի ծննդատունը լուծարվի:

Նոր տարածքում միավորվելու են «Գյումրու մոր և մանկան ավստրիական հիվանդանոցի» ծննդաբերական բաժանմունքն ու Գյումրիի ծննդատունը: Շենքային պայմանները լավը չեն, ծնունդների թիվը քիչ է, ըստ այդմ, ծննդատունը պարտքեր է կուտակում: Սրանք այն պատճառներն են, որոնք, ըստ Արսեն Թորոսյանի, Գյումրիի ծննդատան լուծարումն անխուսափելի են դարձնում:

«Վստահ չեմ, որն Գյումրու ծննդատունը մինչև շենքի բացումը կգոյատևի ընդհանրապես, որովհետև ծննդատունն այնքան պարտք ունի, որ եթե պարտապանները սկսեն սնանկացման գործընթաց, կարող է փակվել ցանկացած օր: Պարզ պատահականություն է, որ մինչև օրս Գյումրու ծննդատունը գոյատևում է: Մենք ունենք զարգացման ծրագրեր այսօրվա համար, որը կարող էր լինել շատ անցավ թե՛ կոլեկտիվի համար, թե՛ մարզի համար: Դժբախտաբար այն դեռևս ծննդատան և մարզային իշխանությունների կողմից չի ընդունվել և մենք այս պահին մեզ տարանջատել ենք այդ պրոցեսից»,- SHANTNEWS-ին ասել է առողջապահության նախարար Արսեն Թորոսյանը:

Նախարարությունն առաջարկել է ծննդատունը լուծարել, աշխատակիցներին էլ տեղավորել «Գյումրու մոր և մանկան ավստրիական հիվանդանոցում», «Ախուրյանի մոր ու մանկան առողջության կենտրոնում»: Առաջարկը ծննդատանն ու մարզպետարանում մերժել են: Իսկ ինչպիսին է վստահությունը շվեյցարահայ գործարարի նոր ծննդատուն կառուցելու ծրագրին, երբ նույն գործարարի անունն առնչվում է Գյումրիում լուծարված «Սաստեքս» գործարանին, ըստ առողջապահության նախարարի, իրենք ֆինանսավորման հարցերին չեն միջամտելու, բայց ծրագիրը համատեղ է լինելու:

«Գյումրի» բժշկական կենտրոնում հրատապ լուծումներ են պետք հեմոդիալիզի բաժանմունքը բեռնաթափելու համար: Հիվանդները շատ են, սարքավորումները՝ քիչ, որի հետևանքով բաժանմունքը 4 հերթով է աշխատում:

«Գյումրի» բժշկական կենտրոնի տնօրինությունը դիմել էր նախարարություն Արթիկի տարածաշրջանի հիվանդների համար Արթիկի հիվանդանոցում հեմոդիալիզի սարք տեղադրելու հարցը: Բուժծառայությունը կենտրոնացնելու որոշում նախարարությունը կայացրել է նաև հակատուբերկուլյոզային դիսպանսերների համար: Գյումրիի ու մի քանի այլ քաղաքների դիսպանսերները լուծարվել են ու կկենտրոնացվեն Աբովյանում:

Օպտիմալացման տարբերակը հնարավոր է կիրառվի նաև Աշոցքի հիվանդանոցի ծննդաբերական բաժանմունքի համար:

Ըստ պաշտոնական տվյալների՝ այս տարի Աշոցքի հիվանդանոցում 45 երեխա է ծնվել, ու ըստ նախարարի, այստեղ ևս ուսումնասիրություններ են կատարելու բաժանմունքի հետագա աշխատանքը կանոնակարգելու համար: