Գյումրիի Անի փողային նվագախմբի համար կառուցված նոր շենքի մի մասը վիճելի տարածք է

Իսահակյան 85 հասցեն է` նախկին տնակային Պիոներ պալատի տարածքը, որտեղից չի ապամոնտաժվել միայն տնակային դահլիճը: Այն քարապատել են ու վերածել Անի փողային նվագախմբի համար դահլիճի: Կողքին էլ մեկ տարի առաջ սկսեցին նոր շենքի շինարարությունը: Ընդհանուրը 180 քառակուսի մետր տարածք է զբաղեցնում: Կառուցապատումն ավարտված է, բայց վիճելի հարցերը, այն էլ տարածքային, նոր են սկսվում: Սարքելու ընթացքում ու հետո ավելի լրջացավ մի խնդիր, որին շինարարության պատվիրատուն ընթացք չի տվել: Հողատարածքի մի մասը, որի վրա կառուցվել է Փողայինի նոր շենքը,  սեփականություն է:

Որ գնված 2 հողակտորներն օրինական են, սեփականատերը փաստաթղթերով է ապացուցում, որոնց վրա տեղադրված տնակները պատկանել են Պիոներ պալատին: Երկու հողակտորը միասին կազմել է 100 քառակուսի մետր տարածք, բայց միայն տնակները չէ, որ խանգարել են ժամանակին սկսել սեփական տան կառուցումը. շինթույլտվություն ևս չի ունեցել:

Տնակների ապամոնտաժմանը հողակտորների սեփականատերը սպասել է մինչև 2017 թվականը: Թե ինչ էր պատրաստում կառուցել, ցույց է տալիս հողակտորներից մեկի համար արված չափագրումներն ու նախագիծը, բայց 100 քառակուսի մետր սեփական հողակտորից մոտ 40 քառակուսին, ըստ սեփականատիրոջ, առանց իր թույլտվության վերցրել են իրենից ու շինարարություն սկսել:

Շինարարության մեկնարկի օրվանից մի քանի անգամ դիմել է, բողոքել քաղաքապետարանում, որ իր սեփականության իրավունքն անտեսել են: Մեկ տարի անպատասխան են թողել դիմում-նամակները, ինչի պատճառով ստիպված է եղել հարցը վիճարկել դատարանում: 4 դատական նիստից հետո քաղաքապետարանն էլ հակընդդեմ հայցով  է մտել դատարան՝ պահանջելով չեղյալ համարել Սամվել Գևորգյանի սեփականության իրավունքի վկայականը:

Քաղաքապետարանի ճարտարապետն ասում է` վերցրածն ընդամենը 2 քմ-ն է, բայց խոսքը 40 քառակուսու մասին է: Իսկ թե ինչ տարբերակով է հնարավոր վերադարձնել կամ գուցե փոխհատուցել, սեփականատիրոջ ու պաշտոնյայի հաշվարկները, մեղմ ասած, չեն համընկնում:

Տարածքի սեփականատերը պատրաստ է շարունակել վեճը դատարանում, շեշտեց, որ սեփականության իրավունքի վկայականի չեղարկման մասով քաղաքապետարանի հայցն էլ մերժվել է: Հողային պատկանելության հարցի վիճարկումը շարունակելի է, բայց փողային նվագախմբի նոր շենքի տարածքից հրաժարումը քաղաքապետարանը բացառում է: Դատարանում վիճակվող հարցին զուգահեռ, պատվիրատուն չի դադարեցրել շինարարությունը:

Փողային նվագախմբի գեղարվեստական ղեկավարին այս խնդիրները, կարելի է ասել, չեն մտահոգում. 35 տարի անց վերջապես նոր շենք են ունենալու: Վիճելի տարածքում էլ ներքին հարդարման աշխատանքներն անավարտ են, բայց նվագախումբը եկել, տնավորվել է` մի հատվածում շինարարություն է, մյուսում փորձեր են  անում: