Վիրտոուզ-ջութակահար գյումրեցի Հմայակ Դուրգարյանը ղեկավարել է Գյումրիի սիմֆոնիկ պետական նվագախումբը

Հայտնի ջութակահար և դիրիժոր, 77-ամյա Հմայակ Դուրգարյանը երեկ ղեկավարել է Գյումրիի սիմֆոնիկ պետական նվագախումբը: Այս մասին հայտնում է SHANTNEWS.am-ի թղթակիցը։

«Մոսկվայի վիրտուոզներ» կամերային անսամբլի նախկին մենակատար, Հայաստանի պետական կամերային նվագախմբի համահիմնադիր մաեստրոն ծննդավայրում, երաժշտական վարպետության դասերից բացի, համերգով հանդես եկավ: Ծննդավայրի՝ Գյումրիի մասին, կարոտով է խոսում` ասելով, թե ծննդավայր վերադառնում է գործնական առիթներով:

Հմայակ Դուրգարյանի անունն առաջին հերթին կապվում է 1962 թվականին արվեստի վաստակավոր գործիչ Զարեհ Սահակյանցի հետ միասին Հայաստանի պետական կամերային նվագախմբի ստեղծման պատմությանը: Նույն նվագախմբի մենակատարն էր, իսկ 80-ականներին հրավեր ստացավ լինել «Մոսկվայի վիրտուոզներ» կամերային անսամբլի մենակատարը: Այսօրվա պես հիշում է աշխարհահռչակ ջութակահար, դիրիժոր Վլադիմիր Սպիվակովի հետ երաժշտական անցած իր ուղին ու ամենակարևորը` վիրտուոզ երաժշտի հետ հանդիպումները Լենինականում գտնվող իր տանը:

«Սպիվակովի հետ հիմա էլ ջերմ հարաբերություններ ունենք։ Հիշում եմ, երբ Սպիվակովի, մեր մյուս երաժիշտների հետ հանդիպեցինք մեր տանը, նման բան ոչ մի երկրում չես տեսնի` այդքան երաժիշտ մեկ հարկի տակ, մի լավ քեֆ արեցինք։ Հարևանս գիշերը ժամը 03։00-ին դուռը թակեց, մտածեցինք, թե բողոքելու է, բայց ոչ, նրանք մեզ հրավիրեցին սուրճ խմելու, զարմացանք»,- SHANTEWS.am-ի թղթակցին իր հիշողություններն է պատմել մաեստրոն։

10 օր է` վիրտուոզ երաժիշտը հայրենիքում է, իր ծննդավայրում: Հանդիպել է երաժիշտ գործընկերների հետ, վարպետության դասեր տվել ջութակահար ուսանողներին, իսկ ամենակարևորը` այս օրերը առիթ էին մաեստրոյի համար շրջել քաղաքում, այցելել այն տունը, որտեղ ապրել է: Հայրական տունն Աբովյան փողոցում է` «Հոկտեմբեր» կինոթատրոնի հարևանությամբ:

Իսպանիայում է ապրում, բայց Հայաստան այցելության առաջին կանգառը միշտ իր քաղաքն է: Երկու տարի առաջ նա իր 75-ամյակը նշեց Գյումրիում, հիմա այցը հոբելյանական առիթով չէ, բայց պակաս կարևոր չի համարում՝ ապագա երաժիշտների հետ վարպետության դասեր, գործընկերների հետ փորձի փոխանակում համերգային ծրագրերի շրջանակում:

Գյումրիի պետական սիմֆոնիկ նվագախմբի հետ համատեղ համերգային ծրագիր է պատրաստվել: Հայտնի ջութակահարը ամեն անգամ Գյումրիի սիմֆոնիկի երաժիշտների հետ հանդիպումից նոր բացահայտումներ է անում: Երիտասարդ երաժիշտներ են ավելանում, իսկ դասական երաժշտությունը գնահատողների պակաս քաղաքը չունի:

Հայտնի դիրիժոր, Երևանի կոնսերվատորիայի պատվավոր պրոֆեսոր Հմայակ Դուրգարյանը ևս մեկ համերգային երեկո ունի Երևանում: Նոյեմբերի 28-ին Կոմիտասի անվան կամերային երաժշտության տանը կներկայանա հանդիսատեսին: