Ինչ տրանսպորտային միջոցներով ու ինչ որակի ուղևորափոխադրումներ են իրականացնում Շիրակի մարզում գործող ընկերությունները

Ինչ տրանսպորտային միջոցներով ու ինչ որակի ուղևորափոխադրումներ են իրականացնում Շիրակի մարզում գործող ընկերությունները։ Այս մասին այսօր խոսել են ընկերությունների ներկայացուցիչներն ու միջազգային փորձագետները: Տրանսպորտային միջոցի և վարորդի ընտրությունը՝ սրանք են  ուղևորափոխադրումների լավ ծառայություն ապահովող գործոնները: Իսկ հմուտ վարորդներին, նախ և առաջ, անվտանգ երթևեկության կանոնները պահպանելու պահանջ է ներկայացվում:

Շիրակի մարզում գործող տասից ավելի ընկերություններ են մասնակցել քննարկում-դասընթացին, որի ընթացքում նրանց է ներկայացվել ուղևորափոխադրումների կազմակերպման միջազգային փորձը:

Ուղևորափոխադրող ընկերությունների ու ճանապարհաշինական ընկերությունների ներկայացուցիչները հաճախ չէ, որ միասին մեկ տեղում են հավաքվում, թեև նրանց գործառույթները կապակցված են: Այս շղթայում կարևոր են ճանապարհները, որոնցով երթևեկում են տրանսպորտային միջոցները, և թե ով է ղեկին: Միջազգային փորձագետների ու տեղի տրանսպորտային հանգույցների ներկայացուցիչների քննարկումը առաջինն առնչվում էր վարորդների ընտրությանը: Ընկերությունները վարորդի ընտրության հարցում երկար պետք է մտածեն, նախ պետք է հաշվի առնեն նրա փորձառությունը։

«Վարորդի թույլ տված յուրաքանչյուր սխալ՝ նաև ընկերության սխալն է, ու առաջին հերթին հարվածում է նրա հեղինակությանը»,- այս մասին SHANTNEWS.am-ի հետ զրույցում ասել է Անգլիայի արևելյան գործընկերության դաշինքի ղեկավար Դմիտրի Սամբուկը։

Ճանապարհային երթևեկության կանոնների խախտման ու, ըստ այդմ պատահարների թվի աճ կա հանրապետությունում: Սա փաստում է ճանապարհային անվտանգության ազգային խորհուրդ կազմակերպության ղեկավարը։ Պողոս Շահինյանը նշում է, որ հիմնականում խախտումներն ու պատահարներն ավելի շատ վարորդների, քան վատ ճանապարհների մեղքով են: Վարորդները հմուտ չեն, տրանսպորտային միջոցներն էլ հին ու մաշված: Սա մարզում ուղևորափոխադրումների մեկ այլ լուրջ խնդիր է: Վարորդները երբեմն ճանապարհի կեսին են մնում: Թույլատրվում է շահագործել մինչև 15 տարեկան տրանսպորտային միջոցները, բայց մարզի միջհամայնքային ուղղությունները շատ ավելի հին ավտոբուսներ ու միկրոավտոբուսներ են սպասարկում:

Մեքենաների շահագործման ժամկետները լրացել են, բայց գիծը սպասարկող ընկերությունները հնարավորություն չունեն դրանք նորացնելու: Միջազգային փորձագետներն էլ օրինակներ են բերում եվրոպական երկրներից, որտեղ ժամկետանց մեքենաները խոտանում են: Սա հայաստանյան իրականությունից դեռ շատ հեռու է:

Փորձագետների կատարած ուսումնասիրություններում երկրորդ կարևոր բաղադրիչն էլ վերաբերում էր տրանսպորտային պատահարների ժամանակ պատասխանատվության բեռի բաշխմանը: Վարորդներին ու ուղևորափոխադրող ընկերությունների ղեկավարներին բացատրեցին՝ եթե վարորդը խախտել է երթևեկության կանոնները, պատասխանատվության մեծ բաժինը ընկերությունն է կրելու: