Աշխարհահռչակ երաժիշտ, դաշնակահար Անտոնիո Կոնսալեսը համերգ է տվել Գյումրու պետական սիմֆոնիկ նվագախմբի հետ

Հայ երաժիշտների հետ համերգային ծրագրով հանդես գալու և հայ կոմպոզիտորների ստեղծագործություններն այստեղ հնչեցնելու ցանկությունը իտալացի դաշնակահարին դարձյալ Հայաստան է բերել: Այս անգամ հայաստանյան շրջագայությունն այլ ուղղություն է վերցրել։ Աշխարհահռչակ դաշնակահարի` Անտոնիո Կոնսալեսի սեփական նախաձեռնությունն է եղել Գյումրիում ելույթ ունենալ Սիմֆոնիկ նավագախմբի  հետ: Այս մասին հայտնում է SHANTNEWS.am-ի թղթակիցը։

«Հայաստանցի իմ երաժիշտ ընկերներս են պատմել ձեր մշակութային ու պատմական քաղաքի մասին: Համոզվելու համար եկա, շրջեցի փողոցներով: Գյումրին  ինձ հիշեցրեց Իտալիայի մի քանի քաղաքներ: Սա ֆանտաստիկ գեղեցիկ քաղաք է: Գիտեմ, որ այս քաղաքում են ծնվել շատ հայտնի երաժիշտներ և, որ  ունեք լավ երաժիշտներ: Ես դրանում համոզվեցի սիմֆոնիկ նվագախմբի հետ աշխատելիս»,-SHANNEWS.am-ի թղթակցի հետ զրույցում ասել է իտալացի դաշնակահար Անտոնիո Կոնսալեսը։

Կոմիտասի 150-ամյակին նվիրված համերգն իտալացի հայտնի դաշնակահարը և Գյումրու պետական սիմֆոնիկ նվագախումբը բացել են Սերգեյ Ռախմանինովի 2-րդ դաշնամուրային կոնցերտով, ինչը Անտոնիո Կոնսալեսի համար պատահական ընտրություն չէր։

«Առնո Բաբաջանյանն էլ հայերի Ռախմանինովն է, ես այդպես եմ համարում, երկուսն էլ վիրտուոզ կոմպոզիտորներ են, ռոմանտիկ, նրանցից լավ սերը, բնությունն ու նուրբ զգացմունքները ոչ ոք իր գործերում չի ներկայացրել: Սիրո, քնքշության մեղեդիներում երկուսն էլ անգերազանցելի հանճարներ են»,- ասել է Անտոնիո Կոնսալեսը։

Անտոնիո Կոնսալեսը «Ֆրանկո Ֆերարա» միջազգային երաժշտական ակադեմիայի հիմնադիր տնօրենն է, նաև դասավանդում է: Իր դասախոսական նյութերի անբաժանելի մասն են կազմում հայ երաժշտարվեստի պատմությունը, հայտնի կոպմոզիտորների ստեղծագործությունները: Չի պատկերացնում դասախոսական ժամ և համերգային ծրագիր առանց Արամ Խաչատրյանի ու Առնո Բաբաջանյանի:

«Արամ Խաչատրանին, Առնո Բաբաջանյանին  բոլորն են ճանաչում, իսկ ամենալավը պետք է իմանան երաժշտական ակադեմիայի ուսանողները, հայ հանճարների ստեղծագործական կյանքի ու գործերի մասին քննական տոմսերում հարցաշար եմ կազմում,  երաժշտությունը լեզու չի ճանաչում, ցանկացած երաժիշտ պարտավոր է ճանաչել բոլոր հայտնի կոմպոզիտորներին»,- ասել է դաշնակահարը։

Դաշնակահարը հայ ազգային, հոգևոր երաժշտարվեստի, կոմպոզիտորական դպրոցի հիմնադիր, երգահան ու վարդապետ Կոմիտասի ստեղծագործական ժառանգությունը ուսումնասիրած  օտարազգի երաժշտագետներից մեկն է։ Կոմիտասին նվիրված Գյումրու համերգային երեկոն Անտոնիոյի համար լավագույն առիթը դարձավ կատարելու երգահանի օրորոցային ստեղծագործությունը:

«Կոմիտասի մասին ինձ հարազատ  մի մարդ՝ հայ երաժիշտ Սերգեյ Սարաջյանն է շատ պատմել: Ես հետաքրքրված սկսեցի ավելի ու ավելի ուսումնասիրել Կոմիտաս։ Մի շատ հետաքրքիր բան կա նրա գործերի մեջ, հեշտ է տարբեր երաժշտական գործիքներով կատարելը, մեծ ուժ ու էմոցիա կա նրա մեղեդիներում: Դրանք հասնում են հոգուդ խորքը, դիպչում սրտիդ, ես զգում եմ այդ ամենը, հետո նվագում»,-ասել է Անտոնիո Կոնսալեսը։

Կոմիտասի մշակութային ժառանգությունը իտալացի դաշնակահարը անգնահատելի արժեք է համարում, որն աշխարհի երաժշտագետների ուշադրության ու ուսումնասիրման թեման է նաև: Կոմիտասյան երաժշտություն հնչեցնելուց հետո Անտոնիո Կոնսալեսը համերգային երեկոյի ընթացքում չմոռացավ կատարել նաև իր հայրենակցի՝ իտալացի կոմոպոզիտոր Էնիո Մարիկոնեի հայտնի գործերից մեկը և նշեց, որ նվիրում է Կոմիտաս վարդապետի 150-ամյակին։