Գյումրիի թատրոնում մասնագիտական տոնն աշխատանքային էր

Այսօր թատրոնի միջազգային օրն է: Թատերական գործիչների մասնագիտական տոնը սահմանվել է 1961 թվականին ՅՈՒՆԵՍԿՕ-ին կից Թատրոնի միջազգային ինստիտուտի 9-րդ կոնգրեսի նախաձեռնությամբ: Ավանդաբար նշվում է «Թատրոնը որպես ժողովուրդների միջև խաղաղության ամրապնդման և փոխըմբռնման միջոց» խորագրով: 154-ամյա պատմություն ունեցող Գյումրու Աճեմյանի անվան դրամատիկական թատրոնն իր բեմադրություններում ներկայացնում է այն արդիական մոտեցումները, որոնք պահանջ են ներկայիս թատերական արվեստում:

Մասնագիտական տոնի օրը աճեմյանցիների մոտ աշխատանքային միջավայր էր ու նոր ներկայացման փորձ: Աճեմյանցիները նոր ներկայացման են պատրաստվում: Պիեսը նոր չէ, բայց շեշտադրումներն են արդիական: Սա նշում է ՀՀ ժողովրդական արտիստ ու թատրոնի գեղարվեստական խորհրդատու Նիկոլայ Ծատուրյանը: «Կյանքը վանդակի կողքով» ներկայացման դերակատարները ընտրություն են կատարելու վանդակի և ազատության միջև:

«Հարցադրումները շատ այժմեական են, կասեի ոչ թե այժմեական, այլ մշտնջենական են: Վանդա՞կ, թե՞ ազատություն: Որն ենք նախընտրում վանդակը, որտեղ մեզ կերակրում են, խնամում, թե՞ ազատությունը, որտեղ մենք պիտի ի հայտ բերենք մեր կարողությունները: Ներկայացման մեջ նորամուծություն կա մեզ՝ հայերիս համար, ինչը արտասահմանում նորամուծություն չէ, հնամուծություն է: Օդում դերասանները պետք է թռչեն: Բավական խնդիրներ կան տեխնիկական»,- SHANTNEWS.am-ին ասել է ՀՀ ժողովրդական արտիստ Նիկոլայ Ծատուրյանը:

Նոր ներկայացման մեջ խաղալ հրավիրել են դերասանուհի Անի Խաչիկյանին: Դերասանները բեմին թռչում են, ինչպես թռչունները, որոնց նրանք մարմնավորում են: Իսկ պայքարը 2 սերունդների միջև է՝ ավագների, որոնք վանդակն են նախընտրում և երիտասարդների, որոնք ազատության են ձգտում:

Գլխավոր դերակատարաներից Սամվել Գրիգորյանն այսօրվա փորձին տոնական ու պաշտոնական էր հագնված: «Արտավազդ» մրցանակաբաշխության մասնակիցներից է:

Ամեն տարի թատրոնի միջազգային օրը թատերական գործիչներին պարգևներ են շնորհում: Թե Գյումրիի թատրոնի դերասաններից ովքեր այսօր մայրաքաղաքից մրցանակով կվերադառնան, դեռ գաղտնի է: Իսկ Գյումրիի թատրոնում անկախ մրցանակներից իրենց ձեռքբերումներն են նշում՝ թատրոնը հանդիսատեսի խնդիր չունի, պահանջված է ոչ միայն հանրապետությունում, նաև նրա սահմաններից դուրս: Իրականությունը արվեստի լեզվով ժամանակին Գյումրիի թատրոնի բեմից ներկայացրել են Մհեր Մկրտչյանը, Ազատ Շերենցը , Խորեն Աբրահամյանը, Արուս Ասրյանը և շատ ուրիշներ: Սա 1865 թվականին ստեղծված թատրոնի պատմության մի մասնիկն է: Այդ պատմությունը գրվում է ամեն օր ու հարստանում նոր դերասաններով ու ներկայացումներով: Հերթական պրեմիերան Գյումրիի դրամատիկականի բեմում մայիսի վերջին է նախատեսվում: