Կոնգրեսում ներկայացված հակառուսական օրինագծում անդրադարձ է արվում նաև Վրաստանի անվտանգությանը

«Կրեմլի ագրեսիայից Ամերիկայի անվտանգության պաշտպանություն» (DASKA) օրինագիծը նախատեսում է ՆԱՏՕ-ի ուժեղացում, միջազգային կիբերհանցագործության դեմ պայքար, ինչպես նաև Ռուսաստանի դեմ հավելյալ պատժամիջոցների հաստատում: Այն ամերիկյան մամուլում ստացել է«դժոխային պատժամիջոցներ» անվանումը:

Օրինագծի նորացված տարբերակը Սենատին էր ներկայացվել դեռևս փետրվարի 13-ին: Ամերիկյան մամուլի հաղորդմամբ՝ օրինագիծն ուղղված է Ռուսաստանի ղեկավարության և ռուսական տնտեսության հիմնական սեկտորների դեմ:

Միաժամանակ փաստաթուղթը որոշ պարտավորություններ է սահմանում ԱՄՆ-ի հետախուզության համար: Մասնավորապես, օրենքի ուժի մեջ մտնելուց հետո 180 օրվա ընթացքում ազգային հետախուզությունը Կոնգրեսի կոմիտեներին պետք է ներկայացնի մանրամասն հաշվետվություն Ռուսաստանի նախագահ Վլադիմիր Պուտինի անձնական ակտիվների և կապիտալի մասին: Հաշվետվությունը պետք է ներառի լրատվություն, Պուտինի և նրա ընտանիքի անդամների եկամտի աղբյուրների, ներդրումների, բանկային հաշիվների և այլ բաժնեմասերի մասին: Բացի այդ, հետախուզական ծառայությունը Կոնգրեսին պետք է ներկայացնի տեղեկություններ Պուտինին մոտ կանգնած արտասահմանցի բարձր պաշտոնյաների և օլիգարխների մասին:

Բացի այդ, ԱՄՆ կոնգրեսին պետք է տեղեկություններ փոխանցվեն ռուս ընդդիմադիր գործիչ Բորիս Նեմցովի սպանության և Ռուսաստանն ահաբեկչության հովանավոր երկրների ցուցակում ներառելու հնարավորության վերաբերյալ:

Օրինագծի հաստատման դեպքում ԱՄՆ-ն չի լքի ՆԱՏՕ-ն առանց Սենատի անդամների մեծամասնության աջակցության:

Ինչ վերաբերում է Վրաստանին, ըստ օրինագծի, ԱՄՆ-ի նախագահը հրապարակավ պետք է կոչ անի Ռուսաստանի դաշնության կառավարությանը՝ վերադարձնել Ղրիմը Ուկրաինայի կառավարության վերահսկողության տակ, դադարեցնել արևելյան Ուկրաինայում Ռուսաստանի ղեկավարությամբ գործող ուժերի աջակցությունը, Վրաստանի և Մոլդովայի տարածքների բռնազավթումը և այդ տարածքներում ռուսամետ ուժերին աջակցությունը:

Փաստաթղթում նշված է նաև, որ Ռուսաստանի ազդեցությանը դիմադրելու համար հիմնադրամից որոշ գումարներ պետք է օգտագործվեն Վրաստանում, Մոլդովայում և Ուկրաինայում ՌԴ-ի բռնազավթման հետևանքով առաջացած և սրված մարդասիրական ճգնաժամերին  արձագանքելու համար:

Հիմնադրամի ռեսուրսները պետք է ուղղվեն նաև այդ երկրներում քաղաքացիական հասարակության, մամուլի, ոչ կառավարական կազմակերպությունների աջակցությանը, որոնք պայքարում են Ռուսաստանի ազդեցության, քարոզի և կոռուպցիայի դեմ:

Փաստաթղթի պատրաստմանը մասնակցել են ինչպես դեմոկրատ, այնպես էլ հանրապետական կոնգրեսականները:

Օրինագծի նախնական տարբերակը Ռոբերտ Մենենդեսը և Լինդսի Գրեմը ներկայացրել էին դեռևս 2018 թվականի օգոստոսի 1-ին, սակայն Կոնգրեսի միջանկյալ ընտրությունների պատճառով քվեարկությունը հետաձգվել էր:

Որպեսզի օրինագիծն օրենքի ուժ ստանա, անհրաժեշտ է, որ այն հաստատեն ԱՄՆ-ի Կոնգրեսի երկու պալատները, որից հետո փաստաթուղթը պետք է ստորագրի նախագահ Դոնալդ Թրամփը: