Նոր զարգացումներ «Գյումրին առանց տնակների» հիմնադրամում

«Գյումրին առանց տնակների» հիմնադրամում նոր զարգացումներ են: Երեկ տեղի է ունեցել հիմնադրամի հոգաբարձուների խորհրդի հերթական նիստը, որի օրակարգում հիմնադրամում անցկացված աուդիտի արդյունքներն են եղել:

Հիշեցնենք՝ «Գյումրին առանց տնակների» հիմնադրամի տնօրեն Մհեր Խաչատրյանը նախկին տնօրեն Ղարիբ Հարությունյանին կոռուպցիոն չարաշահումների մեղադրանք էր ներկայացրել: Այս մասին հիմնադրամի հոգաբարձուների խորհուրդը հանդես է եկել ֆեյսբուքյան հայտարարությամբ:

«Տեղեկացնում ենք, որ «Գյումրին առանց տնակների» հիմնադրամի ֆինանսական գործունեության ներքին մասնագիտական ուսումնասիրության արդյունքում պարզվել է, որ նախկին գործադիր տնօրեն Ղարիբ Հարությունյանի պաշտոնավարման ընթացքում նրա կողմից որևէ չարաշահում չի եղել: Հիմնադրամի տարեկան արտաքին աուդիտի արդյունքները կհրապարակվեն ավելի ուշ՝ օրենքով սահմանված ժամկետում:
Հարգանքներով՝ «Գյումրին առանց տնակների» հիմնադրամի հոգաբարձուների խորհուրդ»,- ասված է գրառման մեջ։

Հոգաբարձուների խորհրդի հայտարարությանը հետևել է հիմնադրամի տնօրեն Մհեր Խաչատրյանի հայտարարությունը, որում նա նշում է, որ պատրաստ է անգամ լքել հիմնադրամի տնօրենի պաշտոնը.

««Գյումրին առանց տնակների» հիմնադրամի վերջին աղմկահարույց իմ հայտարարությունից հետո, ինչպես գիտեք, հոգաբարձուների խորհուրդը որոշում էր ընդունել սահմանափակել թեմայի շուրջ հրապարակային հայտարարությունները՝ մինչև արտաքին աուդիտի եզրակացությունը: Ես, հավատարիմ մնալով հիմնադրամի կանոնադրությանը, միաժամանակ հետաձգեցի փաստերի հրապարակումը, ինչն անգամ ավելորդ խոսակցությունների տեղիք տվեց ու որոշակիորեն վտանգեց իմ հեղինակությունն ու բարի համբավը: Սակայն հոգաբարձուների խորհրդի վերջին նիստի ժամանակ կայացվեց տրամաբանորեն հակառակ որոշում և խորհուրդը հայտարարություն տարածեց այն մասին, իբր ներքին մասնագիտական ուսումնասիրության արդյունքում պարզվել է, որ նախկին տնօրենը չարաշահումներ թույլ չի տվել:

Հաշվի առնելով այլևս, որ այսքանից հետո իմ լռությունը կարող էր իմ խոսքերի և հեղինակության հանդեպ կասկածի տեղիք տալ, ստիպված եմ հրապարակել ձեռքիս տակ ունեցած չարաշահումների փաստերից մեկը: Այս փաստաթղթերով ապացուցվում է, որ 2017 թվականի օգոստոս ամսին «Գյումրին առանց տնակների» հիմնադրամի նախկին տնօրեն Ղարիբ Հարությունյանը, չունենալով օգնական, ֆինանսական հաշվետվության մեջ ծախս է ներկայացրել որպես օգնականի աշխատավարձ 100 000 դրամի չափով:
Գիտակցում եմ նաև, որ այսքանից հետո, ըստ կանոնադրության, հնարավոր է քննարկվի հիմնադրամի տնօրենի պաշտոնից իմ հեռացման հարցը: Սակայն, ի սկզբանե իմ գործունեությունն ուղղված է եղել արդարության կայացմանն ու անօրինականությունների բացահայտմանը ու եթե դրա արժեքը իմ պաշտոնանկությունն է, ես այն կընդունեմ առանց երկմտանքի՝ միաժամանակ արդեն հրապարակելով իմ ձեռքի տակ ունեցած չարաշահումների ողջ փաթեթը՝ չսպասելով արտաքին աուդիտի եզրակացությանը»,- ասված է Մհեր Խաչատրյանի հայտարարության մեջ:

Նշենք, որ հիմնադրամում անցկացված աուդիտի արդյունքները պաշտոնապես հրապարակվելու են ավելի ուշ:

Հիշեցնենք, որ «Գյումրին առանց տնակների» հիմնադրամի տնօրենը նաև Գյումրիում տարբեր տարիների բնակբաշխման և տնակների ապամոնտաժման գործընթացներում չարաշահումների մասին էր բարձրաձայնել և փաստեր ներկայացրել: Դրանց քննությամբ զբաղվում է Շիրակի մարզի դատախազությունը: