Գյումրիում գործարարը 10 տարի է՝ արտադրությունը նկուղում է կազմակերպում

Գյումրիում տրիկոտաժի արտադրությամբ զբաղվող անհատ ձեռներեց Ռուստամ Հակոբյանին ավելի քան 10 տարի չի հաջողվում արտադրական շենքի հարց լուծել: Ընդամենը 6 աշխատակցով արտադրությունը կազմակերպում են Անի թաղամասի շենքերից մեկի նկուղում, որտեղ պայմաններ չկան: 7 տարի առաջ բազմաթիվ դիմումներից հետո վերջապես տարածք էր հատկացվել, որտեղ անհատ ձեռներեցը նոր արտադրական շենք է կառուցել, մնում են ներքին հարդարման աշխատանքները, ինչն էլ ավարտին հասցնել չի կարողանում:

Խնդիրը միայն ֆինանսական չէ, կառույցը նախագծային անհամապատասխանություններ ունի, ինչի պատճառով քաղաքաշինության տեխնիկական և հրդեհային անվտանգության տեսչական մարմինը ավարտական ակտ չի տրամադրում:

Անի թաղամասի շենքերից մեկի նկուղային հարկում 10 տարի առաջ, երբ Ռուստամ Հակոբյանը արտադրություն էր հիմնում, համոզված էր, որ տեղակայումը ժամանակավոր է լինելու, բայց այդպես չէղավ: Բնակելիի նկուղային հատվածները վերածել է կարի արտադրամասի, ձևարանի, հումքի և պատրաստի արտադրանքի պահեստի:

Արտերկրից ներկրված հումքով ստացված արտադրանքը վաճառվում է ոչ միայն Հայաստանում և Արցախում, նաև Ռուսաստանի Դաշնությունում: Գործարարն ասում է՝ իրացման խնդիր չունի, միայն թե կարողանա շենքային հարցերը լուծել: 2 տարի առաջ դիմել էր կառավարություն՝ խոստացած ցածր տոկոսադրույքով վարկերից օգտվելու համար, բայց այդ մասին խոսակցություն չկա, իրենք էլ սեփական միջոցներով են ձեռնարկել շենքի շինարարությունը՝ վաճառելով հումքը և գնված նոր մեքենասարքավորումները:

Շրջանառու միջոցներն արտադրություն ընդլայնելու փոխարեն ուղղվել են նոր շենքի կառուցմանը: 20 նոր աշխատատեղ էր բացվելու, որը այդպես էլ իրականություն չդարձավ: 7 տարում էլ Ռուստամ Հակոբյանը կարողացավ կառուցել երկհարկանի այս շինությունը, որը մնում է անավարտ, ֆինանսներն են սպառվել:

Այս դեպքում էլ ավարտական ակտ չեն տալիս, որպեսզի շենքը գրավադնի և գումար վերցնի, որով հույս ունի, որ կկարողանա ոչ միայն շինարարությունն ավարտել, այլև արտադրությունն ընդլայնել: Քաղաքաշինության, տեխնիկական և հրդեհային անվտանգության տեսչական մարմինը մերժել է՝ պատճառաբանելով, որ կան նաև նախագծային անհամապատասխանություններ:

Նախագծով նախատեսված է, որ շենքի առաստաղը պետք է լինի կախովի, բայց կառուցվել է երկաթբետոնյա սալերով, ինչը, ըստ գործարարի, ավելի ամուր է, քան նախագծածը: Քաղաքաշինության, տեխնիկական և հրդեհային անվտանգության տեսչական մարմնի դեկավար Գեղամ Շախբազյանի խոսքերով՝ եթե տեխնիկական հսկողն առարկություն չունի, ապա լիցենզավորված կազմակերպությունը կարող է տալ փաստաթուղթ, որ շինությունն համապատասխանում է սեյսմիկ նորմերին և այդ դեպքում, հարցը կհամարվի փակված:

Բայց տեսչական մարմնի ստորագրությամբ Ռուստամ Հակոբյանին ներկայացվել են մերժման այլ պատճառներ ևս, հայտնաբերված թերությունները՝ 11 կետից են բաղկացած: Գործարարը պետք է կիսակառույց շենքի ներքին հարդարումն ավարտի, կոմունիկացիոն համակարգը լրիվ կառուցի, որ նոր կարողանա ավարտական ակտ ստանալ:

Ըստ տեսչական մարմնի ղեկավարի՝ շենքը նախագծում ներկայացված է ոչ թե արտադրական, այլ որպես բնակելի տարածք: Այն արտադրականի վերածելու դեպքում անհրաժեշտ է նաև, որ հրդեհաշիջման նվազագույն չափորոշիչները ապահովվեն: Տեսչական մարմինը առանց այս աշխատանքները կատարելու չի պատրաստվում կիսակառույց շենքին ավարտական ակտ տալ, իսկ գործարարը դրա համար ֆինանսներ չունի ու 5 ամիս շարունակվող փաստաթղթային քաշքշուկների պատճառով արտադրական պատվերներ է կորցրել: