«Գյումրին առանց տնակների» հիմնադրամը քաղաքի բնակբաշխման գործընթացում կոռուպցիոն հետքեր է հայտնաբերել

1990–ականներից մինչև 2012 թվականը Գյումրիում քանի՞ բնակարան է կառուցվել,  ինչպե՞ս են դրանք բաշխվել և ովքե՞ր են եղել շահառուները…

Նման ուսումնասիրություն է սկսել «Գյումրին առանց տնակների» հիմնադրամը:  Ու այդ ուսումնասիրության առաջին արդյունքները ժամանակին ոչ ճիշտ բաշխման կասկածներ են հարուցում:  Հետերկրաշարժյան տարիների բնակբաշխման գործընթացում հիմնադրամի նախագահը հայտնաբերել է դեպքեր, երբ մեկ շահառուի անունը 3 բնակարանի դիմաց է նշվել կամ նույն փլված հասցեի տակ 6 ընտանիք տարբեր տարիներին բնակարան են ստացել: Մանրամասն ուսումնասիրության արդյունքում հիմնադրամի տնօրեն Մհեր Խաչատրյանի ուշադրությունը գրավել է Շիրակացի 4-րդ թաղամաս, 1-ին շենք , բնակարան 20 հասցեն: 88-ին փլված շենքի այս բնակարանում պարզվում է՝ իրար հետ կապ չունեցող 6 ընտանիք է հաշվառված եղել ու տարբեր տարիներին տարբեր հասցեներում բնակարան ստացել:

Նույն պատմությունն է նաև Շիրակացի 4-րդ թաղամաս, 3 շենք, բն. 14 հասցեում: Այս դեպքում էլ փլված շենքի հասցեն 5 ընտանիքի բնակարան հատկացնելու հիմք է հանդիսացել: Եվս 5 ընտանիք էլ տուն է ստացել՝ հաշվառված լինելով նույն շենքի 10-րդ բնակարանում: Ինչպե՞ս է ստացվել, որ բազմանդամ ընտանիքները նույն թաղամասում են ապրել: Տեսականորեն նման համընկնում հնարավոր է,  բայց և կասկածելի:

«Մարզպետարանի, պետական այլ գերատեսչությունների ներկայացուցիչները միշտ մեջբերում են, թե այն ժամանակ օրենքները հետևյալ կերպ էին, որ եթե ընտանիքը մեծ էր, տարբեր բնակարաններ էին ստանում, մեկ բնակարան չէին ստանում: Սա հասկանալի է, եթե հատկացրել են 2 եղբոր, կամ քրոջ ու եղբոր, կամ ծնողներին ու երեխաներին առանձին: Իսկ տվյալ դեպքում, ընտանիքներն իրար հետ կապ չունեն: Հնարավոր է իրոք տվյալ մարդիկ փաստաթղթեր են բերել, որ իրենք այդ հասցեի բնակարանն են կորցրել: Ո՞վ է տվել այդ փաստաթուղթը, ինչի՞ հիման վրա է տրվել: Ստացվում է, որ երկրաշարժից առաջ նույն բնակարանում 20 հոգի է ապրել, ովքեր իրար հետ բացարձակ կապ չեն ունեցել»,- Shantnews–ին ասել է «Գյումրին առանց տնակների » հիմնադրամի տնօրեն Մհեր Խաչատրյանը:

Ըստ Մհեր Խաչատրյանի՝ ուսումնասիրությունները կասկածի տեղիք են տալիս, որովհետև ինֆորմացիան բնակբաշխման պետական բազայում լիարժեք չէ: Առանձին դեպքերում նույն մարդու անունը հայտնվել է 3 տարբեր բնակարանների հասցեների դիմաց: Արդյո՞ք սա նշանակում է, որ նույն շահառուն 3 բնակարան է ստացել: Հարցը պարզելու համար բազայի տվյալները սահմանափակ են: Մարզպետարանը խորհուրդ է տալիս բոլոր հարցերով դիմել Քաղաքաշինության կոմիտեին, իսկ քաղաքապետարանը պատասխանատու է միայն իր աշխատած տարիների համար, այսինքն՝ 2012 թվականից սկսած, թեև քաղաքապետարանի լիազորությունները բնակբաշխման գործում ավելի վաղ՝ 2008-ին են դադարեցվել: «Գյումրին առանց տնակների» հիմնադրամի տնօրենի հաջորդ բացահայտումը տնակների ապամոնտաժմանն է վերաբերում: Քանդման ակտերը կան, բայց փաստացի տնակները կան:

«10-15 տնակ կա, որ կարող եմ փաստել, տնակներն անձամբ տեսել եմ, դրանք հաշվառման մեջ են մինչև հիմա: Իսկ փաստաթղթերի ուսումնասիրություններով երևում է, որ նույն այդ տնակներն ապամոնտաժվել են այսինչ թվականին»,- նշել է Մհեր Խաչատրյանը:

Այս փաստերն ուսումնասիրելու է դատախազությունը: Հիմնադրամի տնօրենը ներկայացնելու է նաև կառավարության հատուկ հանձնախումբը, որը զբաղվում է Գյումրիում տնակների հաշվառմամբ: