Գյումրիի թատրոնում տեղադրված Հակոբ Հակոբյանի «Սարերում» որմնանկարի պահպանությունը վտանգված է

Հակոբ Հակոբյանի «Սարերում» որմնանկարի պահպանությունը վտանգված է: Այն գտնվում է Գյումրիի Վարդան Աճեմյանի անվան պետական դրամատիկական թատրոնի ճեմասրահում, որտեղ պահպանության պայմաններն ապահոված չեն: 3 տարի առաջ որմնանկարը այստեղ է տեղափոխվել «Քարհատ մեքենաներ»  գործարանի նախկին ճաշարանի շենքից: Տարածքի ընտրությունը ժամանակավոր էր. այն այդտեղ պետք է մնար մինչ նոր ու ավելի հարմար կառույց գտնելը:

Ճեմասրահի ուղիղ մեջտեղում տեղադրված որմնանկարը փակել է ամբողջ լուսավորությունն ու թատրոնում տարբեր միջոցառումների անցկացման համար նախատեսված տարածքը: Դրա դիմաց տեղադրված է տոնածառը. այստեղ են ողջունել ամանորյա ներկայացման մասնակից փոքրիկներին:

Որմնանկարի մյուս հատվածն էլ առանձնացված է արգելապատնեշներով: Այսպես թատրոնի աշխատակիցները փորձել են ապահովագրել որմնանկարը վնասվելուց: Որմնանկարի պահպանություն, որպես այդպիսին, թատրոնը չի ստանձնել, բայց և առանց ուշադրության թողնել արվեստի գործը, պարզապես չեն կարող: 2016թ. վերականգման և տեղափոխման համար ՀՀ-ում ԱՄՆ դեսպանատունն էր ֆինանսավորում հատկացրել: Տարածքի ընտրության հարցում երկար փնտրելու կարիք չէր եղել՝ թատրոնի ճեմասրահը միակ տարածքն էր Գյումրիում, որտեղ այն կտեղավորվեր:

Մշակույթի նախարարությունը տեղի ընտրությունը ժամանակավոր է կատարել, մինչև ավելի հարմար կառույց գտնելը: Այդպիսին չեն գտել, իսկ որմնանկարն արդեն պահպանության խնդիրներ ունի՝ թատրոնը համապատասխան ջերմային ռեժիմ ու լուսավորություն չի կարող ապահովել:

«Որմնանկարն ունի արդեն խնդիրներ: Ես ճաքեր եմ տեսնում նկարին: Միայն ամանորյա ներկայացման ժամանակ 15 հազար երեխա է եղել այստեղ: Նման պայմաններում շատ դժվար է պահպանության հարցը: Երևի այն ժամանակ թատրոնի տնօրենի համաձայնությունն էլ չի եղել: Մշակույթի նախարարության որոշումն է եղել ու բերել, դրել են որմնանկարը: Իսկ թե ինչքանով է տուժում թատրոնի ճեմասրահը և որմնանկարը, այս հարցում ոչ մեկի կարծիքը հաշվի չեն առել: Տեղադրումից մինչև օրս մենք խոսում ենք այն մասին, որ նկարը ճիշտ տեղում չէ: Մի պահ մշակույթի նախարարությունում ասացին, որ հնարավոր է այն «Շիրակ» օդանավակայան տեղափոխել: Մենք սպասեցինք, բայց ներկա պահին դրա ընթացքը հույս չի ներշնչում»,- SHANTNEWS.am-ի հետ զրույցում ասաց Գյումրիի թատրոնի տնօրենի ժամանակավոր պաշտոնակատար Լյուդվիգ Հարությունյանը:

Որմնանկարի տեղափոխման ընթացքում նաև թատրոնի ապակիներն են վնասել: Հիմա թատրոնի տնօրինությունը մտադիր է նոր ապակիներ տեղադրել ու սպասում են որմնանկարի տեղափոխմանը: Մշակույթի նախարարությունը թատրոնի և «Մինաս Ավետիսյան» հիմնադրամի նույնաբովանդակ դիմումները ո՛չ մերժել է, ո՛չ էլ հաստատել: «Մինաս Ավետիսյան» հիմնադրամը մեկ այլ առաջարկ էր արել, որը վերաբերում էր բոլոր որմնանկարները մեկ վայրում հավաքելուն: Մինասի որդին առաջարկել էր Գյումրիում մոնումենտալ գործերի թանգարան ստեղծել:

«Դա կլինի ամենաճիշտ և միակ որոշումը: Միևնույն ժամանակ, հնարավորություն կունենանք մեկ վայրում ցուցադրել 60-70-ական թվականների հայկական որմնանկարչությունը: Մոնումենտալ արվեստի թանգարան ունենալու համար պետք է կամք դրսևորել: Օբյեկտիվորեն ասեմ, որ այս որմնանկարը տեղադրելու համար Գյումրիում այլ հարմար տարածք չկա, բայց նաև թատրոնի ճեմասրահը նրա տեղը չէ»,- SHANTNEWS.am-ի հետ զրույցում ասել է «Մինաս Ավետիսյան» հիմնադրամի խորհրդի նախագահ Արման Ավետիսյանը:

Որմնանկարը Գյումրիի թատրոնի շենքից տեղափոխելու հարցով հիմնադրամն ու թատրոնը նորից են պատրաստվում դիմել իրենց վերադասին. առայժմ պարզ չէ, թե դա որ գերատեսչությունն է լինելու՝ մշակույթի նախարարությո՞ւնը, թե՞ նույնանուն վարչությունը կրթության նախարարության կազմում: