Ես առաջադրվել եմ չընտրվելու համար. Նիկոլ Փաշինյան

ԱԺ «Ելք» խմբակցությունը վարչապետի պաշտոնում առաջադրել է ՀՀ վարչապետի պաշտոնակատար Նիկոլ Փաշինյանի թեկնածությունը: Խմբակցության նախագահ Լենա Նազարյանը, իրենց թեկնածուին ներկայացնելով, նշեց, որ այս առաջադրումը ձևական բնույթ է կրում, իրենք բոլորովին նպատակ չունեն այժմ նրան ընտրելու: Նազարյանի խոսքերով՝ սա արվում է Սահմանադրությամբ սահմանված ընթացակարգի լիարժեք կիրառումն ապահովելու համար, հետագայում տարընթերցումներից ու անիմաստ բանավեճերից խուսափելու համար: Նա ասաց, որ թեկնածուի կենսագրությունը ներկայացնելու անհրաժեշտություն չի տեսնում: Նազարյանին հարցեր չուղղվեցին:

Փաշինյանը պարզաբանեց, որ այսօրվա իր առաջադրումը ձևական բնույթ է կրում, ինքն առաջադրվել է ոչ թե ընտրվելու, այլ վարչապետ չընտրվելու համար, հետևաբար այսօր ԱԺ-ն պետք է չքվեարկի իր օգտին, իսկ առաջադրման իմաստը առաջիկա խորհրդարանական ընտրությունների լեգիտիմության շուրջ շահարկումների որևէ հնարավորություն չթողնելն է, առաջիկա ընտրությունների կասեցման որևէ սողանք չթողնելը:

Նա պատասխանեց շահարկվող մի հարցի՝ ի՞նչ էր Հայաստանում տեղի ունեցածը, հեղափոխությու՞ն, թե՞ պարզապես իշխանափոխություն:

«Միանշանակ է և աներկբա, որ Հայաստանում տեղի է ունեցել հեղափոխություն, որովհետև տեղի է ունեցել հասարակական ֆորմացիայի իրական փոփոխություն: Մինչև ապրիլ Հայաստանում դոմինանտ քաղաքական գործոնը հանդիսանում էր քրեական, քաղաքական, տնտեսական էլիտան, իսկ հեղափոխությունից հետո՝ ժողովուրդը, որը կարողացավ այդ նույն էլիտային պարտադրել, որ իր նախընտրած թեկնածուին ընտրեն ՀՀ վարչապետ և ճանաչեն ժողովրդի իշխանությունը»,- ասաց նա:

Փաշինյանը նշեց, որ ժողովուրդը դեռ չունի իր գաղափարները լիարժեքորեն կյանքի կոչելու գործիքը, որովհետև պետական համակարգը առնվազն մի հսկայական մասով գործում է հին սովորույթներով՝ հին համակարգի վերադարձի թաքուն հույսն իր մեջ պահած:

Վարչապետի թեկնածուն ասաց, որ Հայաստանում տասնյակ պաշտոնյաների նկատմամբ քրգործեր են հարուցվել, ապա ընդգծեց, որ տվյալ պահին նկատի չունի այն գործերը, որոնք հարուցվել են ապրիլ-մայիսից առաջ տեղի ունեցած դեպքերի կապակցությամբ, խոսում է այն արարքների մասին, որ տեղի են ունեցել հեղափոխությունից, իր՝ վարչապետ ընտրվելուց հետո: Փաշինյանը նշեց, որ իր համար զարմանալի էր, թե դրանից հետո ինչպես կարող էր որևէ պաշտոնյայի մտքով անցնել կաշառք վերցնել:

Վարչապետի թեկնածուն նշել է, որ իր պաշտոնավարման ժամանակից սկսած՝ ՀՀ-ում տասնյակ պաշտոնյաների նկատմամբ քրեական հետապնդում է սկսվել չարաշահումների համար:

«Պատկերացնո՞ւմ եք, հեղափոխությունից հետո ՀՀ-ում կան պաշտոնյաներ, որոնք կաշառք են պահանջում և ստանում են, և բռնվում են: Այսինքն՝ նախկին համակարգից ազդակներ են գնում այդ մարդկանց, թե այս ամենը ժամանակավոր է, և շուտով ամեն ինչ կվերադառնա հին ժամանակներին»,- ասել է Փաշինյանը՝ շեշտելով, որ նախկին իշխանությունն ամեն ինչ անում է՝ խաթարելու հեղափոխական առաջընթացը, թույլ չտալու, որ ՀՀ-ում ձևավորվի ներդրումային միջավայր: Փաշինյանն ասել է, որ ՀՀԿ-ի կողմից ռևանշի ակնառու քայլերից են ՀՀ երկրորդ նախագահ Ռոբերտ Քոչարյանի շուրջ քաղաքական ուժ ձևավորելու գործողությունները, որոնք ձախողվել են:

Ազգային ժողովի հոկտեմբերի 24-ի նիստի օրակարգում ներառված մի շարք հարցերի թվում է նաև վարչապետի ընտրության հարցը:

Նշենք, որ վարչապետի միակ թեկնածուն վարչապետի պաշտոնակատար Նիկոլ Փաշինյանն է, որին առաջադրել է «Ելք» խմբակցությունը: «Ելք»-ն արդեն կոչ է արել չընտրել իրենց առաջադրած թեկնածուին: Հիշեցնենք, որ համաձայն սահմանադրության՝ երկու անգամ վարչապետ չընտրելու դեպքում Ազգային ժողովը լուծարվում է:

Նիկոլ Փաշինյանն արդեն հայտարարել է, որ դեկտեմբերին Հայաստանում կայանալու են արտահերթ խորհրդարանական ընտրություններ: