Արցախյան հակամարտությունից մինչև ԵԱՏՄ-ԵՄ հարաբերություններ. Լավրովի հարցազրույցը հայկական ՀԸ-ներին

ՌԴ արտգործանախար Սերգեյ Լավրովը հարցազրույց է տվել Ռուսաստանում գործող հայկական հեռուստաընկերություններին: Լավրովն անդրադարձել է Հայաստանի և Ռուսաստանի հարաբերություններին, Արցախյան հակամարտության լուծման հեռանկարներին, ինչպես նաև Եվրոպական միություն-Եվրասիական տնտեսական միություն համագործակցությանը:

Ռուսաստան-Հայաստան հարաբերությունները Լավրովը որակել է որպես համագործակցության և ռազմավարական գործընկերության հարաբերություններ:

«Այդ կապերն ընդգրկում են մեր երկրների և ժողովուրդների գործունեության բոլոր ոլորտներն անխտիր՝ անվտանգության ոլորտում քաղաքականությունից, արտաքին քաղաքականությունից մինչև մշակույթ, տնտեսություն, տեխնոլոգիական հարաբերություններ, հումանիտար կապեր, կրթություն և այլն: Վերջին 10 տարիների հարաբերություններն, անշուշտ, զարգացել են մեր երկրների նախագահների՝ Վլադիմիր Պուտինի և Սերժ Սարգսյանի միջև ուղիղ և վստահության վրա հիմնված շփման ազդեցության ներքո», – նշել է Սերգեյ Լավրովը:

Ռուսաստանի արտգործնախարարը հատուկ ընդգծել է Հայաստանի անդամակցումը Եվրասիական տնտեսական միությանը, որն, ըստ նրա, լրացուցիչ, շատ հզոր խթան է հանդիսացել երկու երկրների առևտրատնտեսական և ներդրումային ոլորտի համագործակցության համար:

«Բավական է նշել, որ 2016թ. համեմատությամբ՝ նախորդ տարի Ռուսաստանի և Հայաստանի միջև ապրանքաշրջանառությունը ավելի քան 30%-ով ավելացել է՝ հասնելով 1 մլրդ 750մլն դոլարի», – շեշտել է Լավրովը:

Սերգեյ Լավրովն անդրադարձել է նաև Արցախյան հակամարտությանը՝ ընդգծելով, որ հակամարտության լուծումը հետխորհրդային տարածքում Ռուսաստանի գերակայություններից մեկն է: Լավրովի կարծիքով՝ հետագա բանակցությունների ժամանակ կողմերը կարող են օգտագործել նաև 2011թ. Կազանում տեղի ունեցած գագաթաժողովի արդյունքները:

«Կազանում կազմակերպված հանդիպումից մենք լուրջ արդյունքներ, դրական արդյունքներ էինք ակնկալում… Սակայն հենց գագաթաժողովի ընթացքում լրացուցիչ հարցեր, լրացուցիչ մեկնաբանություններ առաջ եկան: Այդպես լինում է: Մենք դրանից ողբերգություն չենք սարքում. աշխատանքը կշարունակվի:  Վստահ եմ, որ Կազանի փաստաթղթում ընդգրկված շատ կետեր դեռ պահանջված են: Այնպես որ, այդ տարիներին կատարված աշխատանքից ոչինչ չի կորել՝ չնայած այս ընթացքում նոր գաղափարներ են ի հայտ եղել, որոնք առաջարկում են համանախագահները», – նշել է ՌԴ արտգործնախարարը:

Ըստ Լավրովի՝ հակամարտության կողմերը պետք է հաղթահարեն միմյանց հանդեպ անվստահությունը:

«Ամենակարևորն այն է, որ հարկավոր է հաղթահարել այն անվստահությունը, որը դեռ նախկինի պես երբեմն արտահայտվում է բանակցությունների ընթացքում: Հարկավոր է կենտրոնանալ իրատեսական, պրագմատիկ գաղափարների վրա, որոնք բավական շատ են, և դրանք պետք է թղթին հանձնել: Չնայած կողմերը տեսականորեն համաձայնում են դա անել, սակայն երբ ամեն ինչ արդեն սկսում է կոնկրետ ձևակերպումներ ստանալ կոնկրետ իրավիճակներում, բարդություններ են առաջանում: Սակայն կարծում եմ, որ մենք կշարունակենք հետևողականորեն հաղթահարել դրանք», – հավելել է Լավրովը:

Անդրադառնալով Եվրոպական խորհրդի և Եվրասիասկան տնտեսական միության համագործակցությանը՝ Լավրովը նշել է, որ հենց կյանքը կստիպի ԵՄ-ին համագործակցել ԵԱՏՄ-ի հետ:

«Ես շատ լավատեսականորեն եմ նայում ԵԱՏՄ-ի և ԵՄ-ի միջև հարաբերությունների ապագային: Չնայած այն շուտ չի գա, սակայն կյանքը կստիպի աստիճանաբար միմյանց ընդառաջ գնալ: Հենց կյանքը մեր եվրոպական գործընկերներին կստիպի աշխատել Եվրոպական տնտեսական միության հետ: Բրյուսելում ողջամիտ մարդիկ են հայտնվել, ովքեր տրամադրված են համագործակցության», – նշել է Լավրովը:

ՌԴ արտգործնախարարը նաև վստահություն է հայտնել, որ Եվրասիական տնտեսական հանձնաժողովի Կոլեգիայի նախագահ Տիգրան Սարգսյանը կնպաստի այդ ուղղությամբ կատարվող քայլերին: