500 և ավելի մահճակալ ունեցող բուժհաստատությունները կունենան հատուկ բաժանմունք՝ ազատազրկված անձանց համար. արդարադատության նախարար

ՀՀ կառավարության օգոստոսի 9-ի նիստում Արդարադատության նախարար Արտակ Զեյնալյանը հանդես եկավ երկու առաջարկով, որոնք պայմանավորված են բանտային առողջապահության ոլորտի բարեփոխման և այդ ոլորտը առողջապահական ընդհանուր համակարգին ինտեգրելու հրամայականով:

Նախարարի ներկայացրած նախագծերով առաջարկվում է Երևանում 500 և ավելի մահճակալ ունեցող բուժհաստատություններում լիցենզավորման պայմանների մեջ ավելացնել պայման, ըստ որի՝ նրանք պետք է ունենան հատուկ բաժանմունք՝ ազատազրկված անձանց համար, որպեսզի անհրաժեշտ բժշկական ցուցումների առկայության պայմաններում պահման պայմանների բացակայությունը խոչընդոտ չլինի նրանց առողջության իրավունքը ապահովելու համար:

Առաջարկվում է, որ մարզերում 100 և ավելի մահճակալ ունեցող հիվանդանոցներում ևս լինեն նման բաժանմունքներ: Սա, ըստ Զեյնալյանի, նշանակում է, որ 500 և ավելի մահճակալ ունեցողները պարտադիր պետք է ունենան նման բաժանմունքներ, իսկ 500-ից քիչ մահճակալ ունեցողները կարող են իրենց նախաձեռնությամբ նախատեսել նման բաժանմունքներ և ակնկալել, որ այդպիսի պատվեր իրենց մոտ կտեղադրվի:

Նախարարի խոսքով՝ անհրաժեշտություն է առաջացել, որ բժշկական սպասարկումը և ծառայությունները դուրս բերվեն քրեական ծառայության ենթակայության տակից, սա միջազգային պարտավորությունների համատեքստում է, որը ևս կոչված է նրան, որ աստիճանաբար կարողանան այս համակարգն ինտեգրել ընդհանուր առողջապահական համակարգին, և բոլոր ստանդարտները գործեն միանման:

Վարչապետ Նիկոլ Փաշինյանը հետաքրքրվեց՝ արդյո՞ք դա նշանակում է, որ ապագայում չի լինի այնպիսի քրեակատարողական հիմնարկ, ինչպիսին «Դատապարտյալների հիվանդանոց» ՔԿՀ-ն է: Զեյնալյանը պատասխանեց, որ օբյեկտիվորեն անհնար է չունենալ այդպիսի հիվանդանոց, ապա տեղեկացրեց, որ բարձր որակավորում պահանջող սպասարկումը կկատարվի մասնագիտացված հիվանդանոցներում, իսկ ավելի թեթև հսկողության կարիք ունեցող հիվանդների դեպքում կգործի երկու այդպիսի հիվանդանոց. նախատեսվում է ներկայիս Կենտրոնական հիվանդանոցը փոխարինել փոքր՝ մոտ 100 մահճակալներ ունեցող հիվանդանոցով, իսկ Արմավիր ՔԿՀ-ն օպտիմալացնել, այնտեղի բժշկական մասը հարմարեցնել փակ ռեժիմի համար նախատեսված դեպքերին: Նախարարը խոստացավ՝ կօպտիմալացնեն հիվանդանոցը, կբարձրացնեն ծառայությունների որակը, կնվազեցնեն սպասարկման գինը:

ՀՀ տնտեսական զարգացման և ներդրումների նախարար Արծվիկ Մինասյանը հետաքրքրվեց՝ այս նախագծերի ընդունման դեպքում հավելյալ բեռ է լինելու հիվանդանոցների՞ վրա, թե՞ պետության:

Զեյնալյանն արձագանքեց, որ Կառավարությունը կարող է այդ պայմանները սահմանել, դրա համար իրենք սահմանել են ողջամիտ ժամկետ, որ հիվանդանոցները կարողանան այդ միջոցների հաշվին իրենց մոտ ստեղծել այդ բաժանմունքները: Երևանում «Գրիգոր Լուսավորիչ» ԲԿ-ն է այդ պայմաններին համապատասխանում, այն, ըստ նախարարի, պետական սեփականություն է, ուստի այստեղ պետությունը կիրականացնի սպասարկումը, իսկ ոչ պետականները իրենք են շահագրգռված, քանի որ լրացուցիչ վճարովի ծառայություններ են մատուցելու: Նախարարը շեշտեց՝ այս փոփոխություններին անցումը նախատեսել են ողջամիտ ժամկետում, որպեսզի իրենց բյուջեն նախատեսելիս բուժհիմնարկները նաև սա նկատի ունենան:

Առողջապահության նախարար Արսեն Թորոսյանն իր հերթին հայտնեց, որ Երևանում կա 4 նման հիվանդանոց, որ ունեն 500 և ավելի մահճակալ, դրանք են «Ուռուցքաբանության կենտրոն»-ը, «Սուրբ Գրիգոր Լուսավորիչ»-ը, «Արմենիա» և «Էրեբունի» բուժկենտրոնները, որոնք պարտավոր են լինելու այս կարգերի հիման վրա իրենց մոտ բացել այդ բաժանմունքները: