Պետական աջակցության ծրագրով Շիրակի մարզում 5100 տոննա ազոտական պարարտանյութ կսուբսիդավորվի

Մատչելի գներով ազոտական, ֆոսֆորական և կալիումական պարարտանյութերի ձեռքբերման համար ներկայացված հայտերով Շիրակի մարզում կսուբսիդավորվի մոտ 5100 տոննա ազոտական պարարտանյութ: Ավելի վաղ ՀՀ էկոնոմիկայի նախարարությունը հրապարակել էր այն 14 ընկերությունների ցանկը, որոնք ծրագրի շրջանակներում հողօգտագործողներին կմատակարարեն սուբսիդավորված պարարտանյութի անհրաժեշտ խմբաքանակը:

Մարզում պահեստավորած ազոտական պարարտանյութը ներկրված է Վրաստանից։ 34.4 տոկոսանոց պարարտանյութը որակով չի զիջում: Մինչ պահեստներ հասնելն այն արդեն սահմանին փորձաքննություն է անցնում, համապատասխանության դեպքում է միայն թույլատրվում ներկրել Հայաստան:

Շիրակի մարզից բացի, մատակարար ընկերությունը նաև պարարտանյութ է պահեստավորել տարբեր մարզերում: Սպասում են համայնքներից հայտերի ստացմանը: Ըստ պահանջագրերի՝ կփորձեն ապահովել մարզի պահանջարկը, մեկ պարկ պարարտանյութն առաջարկում են 20-21 հազար դրամով:

«Առանց սուբսիդավորման էս պահին մոտ 20 հազար դրամ է մեկ պարկ պարարտանյութը, էս ամսվա գինը  12 հազար դրամ  է ֆիքսված, որ գյուղացիները պետք է տվյալ հաշվեհամարին փոխանցում կատարեն, մնացածն էլ պետությունը մեզ կսուբսիդավորի՝ ըստ  վաճառքի քանակի։ Էս պահին ներմուծողներ կան, որ ավելի էժան գին են առաջարկում, բայց էսօր ռեալ մենք ունենք ապրանք պահեստավորած»,- նշել է «Սապսան  թրեյդ» ՍՊԸ ներկայացուցիչ Լենդրուշ Գարեգինյանը։

Գնագոյացման վրա ազդել է ոչ միայն արտադրող ընկերության առաջարկվող բարձր գինը, արտարժույթի տատանումներն ու ներկրման, այլև տեղափոխման լրացուցիչ ծախսերը։ Այս պահին նաև պարարտանյութի պակաս էլ կա, արտադրող մի քանի խոշոր եվրոպական ընկերություններ փակվել են, Ռուսաստանի գործարանում ևս արտադրության ժամանակավոր դադար է, մնում է միայն վրացական շուկան։

Ախուրյան խոշորացված համայնքում, ամենաշատ բարձրակարգ վարելահողեր ունեցող տարածաշրջանում, այս տարի 3300 տոննա ազոտական պարարտանյութի պահանջարկ կա՝ շուրջ 3000 հողօգտագործողներից: Բայց ներկրող ընկերություններից ոչ մեկի հետ պարարտանյութի ձեռք բերման  հստակ պայմանավորվածություններ դեռ չունեն, սպասում են գների կայունացմանը:

«Էս պահի դրությամբ արդեն ունենք ամփոփ տեղեկատվություն՝ համայնքներից ստացված։ Ընդհանուր առմամբ, շուրջ 5100 տոննա ազոտական պարարտանյութի պահանջ կա այս պահին, 50 տոննայի չափով ֆոսֆորական և նույնքան էլ  կալիումական պարարտանյութի հայտեր ենք ստացել»,- նշել է Շիրակի մարզպետարանի գյուղատնտեսության և բնապահպանության վարչության պետ Ռոման  Համայակյանը։

Մարզից ներկայացվել է ազոտական պարարտանյութի գրեթե այն քանակությունը, որը, նախնական տվյալների հիման վրա, սուբսիդավորման ենթակա էր: Իսկ երեք հեկտար սահմանաչափը խնդիրներ է առաջացրել գյուղացիական այն տնտեսությունների համար, որոնք մշակում են ավելի շատ հեկտարներով վարելահողեր:

«Եթե մարդն ուներ 10 հեկտար, երեք հեկտարի համար սուբսիդավորում տվեցին, էն մնացածն էլ, ով կարողացավ՝ ասենք հող էր վարձակալել, համասեփականատեր էր, բայց էդ հողամասի մասով ինքը պարարտանյութ չէր վերցրել, կարողացավ իրեն վարձակալած հողերի դիմաց հայտ ներկայացնել, կամ կարող է հարազատներից, հարևաններից փորձեն, ում որ պետք չի իրենց հողերի համար, վերցնեն օգտագործեն»,- ասում է Ախուրյան խոշորացված համայնքի ղեկավարի տեղակալ Վարդան Իկիլիկյանը։

Հանրապետությունում մինչև 3 հեկտար հողատարածք ունեցողները կազմում են գյուղացիական տնտեսությունների 90 տոկոսը։ Մոտ երկու շաբաթից մարզում կսկսվեն գարնանացանի աշխատանքները: